ادامداردىڭ ءۇسىپ قالۋى نەمەسە سۋىقتان كوز جۇمۋى سياقتى توتەنشە جاعدايلارعا جول بەرىلسە, بۇل جۇمىس ناتيجەسىنىڭ تومەندىگىن كورسەتەدى. ايتەۋىر ازىرگە ونداي كەلەڭسىزدىككە جول بەرىلگەن جوق. اۋا رايىنىڭ بۇزىلا باستاعانىن بىلسە بۇل قىزمەت دەرەۋ سمس حابارلامالار جىبەرىپ نەمەسە «دارمەن» قوسىمشاسى ارقىلى ادامداردى الىس جولعا شىعۋدان ساقتاندىرا باستايدى.
وسى ۋاقىتقا دەيىن 4 رەت جولداردى قار باسۋى بولىپ, 3 رەت قۇتقارۋ جۇمىستارى جۇرگىزىلگەن. تج قىزمەتكەرلەرى قارعا باتىپ قالعان 13 تەحنيكانى بوساتىپ, 38 ادامدى قۇتقارىپ قالدى. سونىڭ ىشىندە ءۋاليحانوۆ اۋدانىنىڭ ورتالىعى كىشكەنەكول اۋىلىنان 28 جەلتوقساندا تۇنگى ون جارىم كەزىندە ماي اۋىلىنا قاراي شىققان ەرلى-زايىپتى ادامداردىڭ قار استىندا قالعانى تۋرالى دابىل تۇسكەن. جەدەل شىققان قۇتقارۋ توبى ولاردى ماي اۋىلىنا 15 شاقىرىمداي قالعان جەردە قالىڭ قاردا تۇرىپ قالعان جەرىنەن تاپتى. قالىڭ جاۋعان قار جەڭىل ماشينانى جولدان اداستىرىپ, ايدالادا توقتاتىپ تاستاعان. ابىروي بولعاندا جولاۋشىلار ۇسۋدەن امان ەكەن.
31 قاڭتاردا دا توتەنشە وقيعا بولىپ, تيميريازەۆ اۋدانىنداعى اقسۋات پەن يشيم اۋىلدارىنىڭ اراسىندا جاياۋ شىققان جىگىتتىڭ جوعالعان دابىلى تۇسكەن. ابىروي بولعاندا اۋىلدار اراسىندا بايلانىس بار ەكەن, جىگىت ءوزىنىڭ جولدان اداسقانىن تەلەفونمەن حابارلاعان. «جەدەل شىققان ىزدەۋ توبى ونى تۇنگى ساعات 12-دە تاپتى. ەلۋ جاستاعى ادام امان-ساۋ, مەديتسينالىق كومەككە ءزارۋ بولمادى, سوندىقتان ول اقسۋاتتاعى ۇيىنە جەتكىزىلدى», دەيدى وبلىستىق تج دەپارتامەنتى باسشىسىنىڭ ورىنباسارى مۇرات قانعوجين.
قىس ايلارىندا ادامداردىڭ ومىرىنە قاۋىپ توندىرەتىن ءبىر شارۋا –بالىقشىلىق. وندايعا كەيبىرەۋلەر اششى سۋدان تاتىپ الىپ, كوڭىلدەرىن كوتەرىپ تە بارادى. مۇزدىڭ قالىڭدىعىن بىلمەي تاۋەكەلگە باراتىندار دا وسىندايلار. ارينە, سولتۇستىكتىڭ قىسىندا مۇزدىڭ قالىڭدىعى قاۋىپ تۋعىزا قويماس, بىراق كوكتەم شىعا مۇزدىڭ استىنان ەرۋى سەبەبىنەن ول جۇقارىپ قالادى. وسى جىلدىڭ باسىنان بەرى ەلىمىزدە قاۋىپتى جاعدايدا بالىققا شىققان ءتورت ادام سۋعا باتىپ كەتتى. سونىڭ بىرەۋى كامەلەتكە تولماعان ءجاسوسپىرىم. وندايدان ايتەۋىر سولتۇستىكتىڭ بالىقشىلارى امان.
توتەنشە جاعداي تۋدىراتىن «جاۋدىڭ» تاعى ءبىرى – ءورت. بيىلعى, 2021-2022 جىلى وبلىستا 195 رەت ءورت بولعان. بۇل بىلتىرعى سايكەس مەرزىممەن سالىستىرعاندا 19 پايىزعا از بولعانىمەن قاۋىپتىڭ قاتەرى زور. ءورتتىڭ كەسىرىنەن 12 ادام قازا تاپتى, 4 ادام اۋىر جارالاندى. بيىلعى ماتەريالدىق شىعىن دا ۇلكەن, بىلتىرعىمەن سالىستىرعاندا 2,6 ەسە ارتىق.
سولتۇستىك قازاقستان وبلىسى
