6 اقپانداعى دەرەككە سۇيەنسەك, ايماقتا 345 ادام كوروناۆيرۋسقا شالدىققان. ال 613 ناۋقاس اۋرۋىنان ايىعىپتى. جالپى, سوڭعى اپتادا وڭىردەگى ەپيدەميالىق احۋالدىڭ تۇراقتالعانى بايقالادى. ايتسە دە ارقانى كەڭگە سالۋعا بولماس. وبلىستاعى ەمدەۋ مەكەمەلەرىندە توسەكتىك ورىن سانى, ءدارى-دارمەك قورى, مەديتسينا قىزمەتكەرلەرى جەتكىلىكتى مە؟
وبلىستىق دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆتىڭ ايتۋىنشا, وڭىردە «وميكرون» رەسمي تۇردە تىركەلمەگەن. جەرگىلىكتى پتر-تالداۋ زەرتحانالارى كوروناۆيرۋس ينفەكتسياسىنىڭ بار-جوعىن عانا انىقتاۋعا قاۋقارلى. ونىڭ «دەلتا» نەمەسە «وميكرون» ەكەنىن راستايتىن مۇمكىندىك جوق. تالدامالار الماتى قالاسىنداعى زەرتتەۋ ورتالىقتارىنا جولدانادى ەكەن.
– ايماعىمىزدا مەديتسينالىق قىزمەتكەرلەردىڭ, ءدارى-دارمەكتەردىڭ, اپپاراتتار مەن توسەكتىك ورىنداردىڭ سانى جەتكىلىكتى. جاعدايدىڭ ودان ءارى ۋشىعۋى مۇمكىن ەكەنىن ەسكەرىپ, بىرنەشە شارا جوسپارىن دايىندادىق. ماسەلەن, قاۋىپتى ىندەتتى جۇقتىرعاندار سانى كۇرت وسسە, وبلىس اۋماعىنداعى 4 مىڭعا جۋىق توسەكتىك ورىننىڭ بارلىعىن جۇمىلدىرامىز. قازىرگى ۋاقىتتا تەك 1 280 ورىن اشىلدى, ونىڭ 42 پايىزى تولىق. رەانيماتسيالىق 130 ورىننىڭ 16 پايىزىندا ناۋقاستار ەم قابىلداۋدا, – دەيدى ا.سەيىتقازينوۆ.
جىل باسىنان بەرى قاۋىپتى ىندەتتى جۇقتىرعان بالالار سانى ايتارلىقتاي كوبەيگەنى بايقالادى. قاڭتار ايىنىڭ العاشقى كۇندەرى شامامەن 10 بالا ستاتسيونارلىق جاعدايدا ەم قابىلداسا, بۇگىندە 70-تەن اسا جەتكىنشەك اۋرۋحانالارعا جاتقىزىلعان. تاعى 170-تەن اسا ءجاسوسپىرىم امبۋلاتورلىق تۇردە دارىگەرلەردىڭ باقىلاۋىنا الىنعان.
قاۋىپتى كەسەلمەن كۇرەستە مەديتسينالىق مەكەمەلەردىڭ جۇمىسى سايابىرلاعان ەمەس. ع.سۇلتانوۆ اتىنداعى وبلىستىق اۋرۋحانانىڭ جۇقپالى اۋرۋلار ورتالىعىنىڭ ماماندارى ادامداردىڭ ءومىرىن قاتەرلى اۋرۋدان اراشالاپ قالۋعا بارىن سالۋدا.
قىسقا مەرزىمدە سالىنىپ, وتكەن جىلدىڭ كۇزىندە پايدالانۋعا بەرىلگەن مودۋلدىك جۇقپالى اۋرۋلار گوسپيتالىندە Covid-19 دەرتىنە شالدىققان ناۋقاستاردى ەمدەۋگە بارلىق جاعداي جاسالعان. جۇقپالى اۋرۋلار ورتالىعىنىڭ ءبولىم مەڭگەرۋشىسى قىمبات قازكەنوۆانىڭ ايتۋىنشا, بىلتىر مودۋلدىك ورتالىقتا 4 712 ناۋقاس كۆي-دەن ەمدەلىپ شىققان. جىل باسىنان 248 ادام زاماناۋي اۋرۋحانادا ەم قابىلداعان. ورتالىقتا قازىر 155 ناۋقاس ەم قابىلداۋدا. جانساقتاۋ بولىمىندە 11 ناۋقاستىڭ ءبىرى وكپەنى جاساندى تىنىس الدىرۋ اپپاراتىنا قوسىلعان. تاۋلىكتىك جۇكتەمە – شامامەن 15-20 ادام. مۇندا 20 ورىندىق جانساقتاۋ بولىمشەسى, كىشى وپەراتسيالىق بولمە, پتر-تالداۋلارعا ارنالعان زەرتحانا, ەكسپرەسس-زەرتحانا, كومپيۋتەرلىك توموگرافيا, رەنتگەنوگرافيا, ۋدز, ەلەكتروكارديوگرافيا جانە برونحوسكوپيا كابينەتتەرى جۇمىس ىستەيدى.
– دەرتتەن ساقتانۋدىڭ بىردەن-ءبىر جولى ەكپە سالعىزۋ بولعاندىقتان, ءاربىر ادام سانالى تۇردە ۆاكتسينالاۋ مەن رەۆاكتسينالاۋدان ءوتۋى ءتيىس. كۆي-دەن ەمدەلىپ شىققاندارعا ءۇش ايدان سوڭ ەكپە الۋعا رۇقسات ەتىلەدى. رەۆاكتسينالاۋ ءۇشىن ەرەسەكتەر «سپۋتنيك لايت» ۆاكتسيناسىن سالعىزسا, 60 جاستان اسقاندار, جاسوسپىرىمدەر مەن جۇكتى ايەلدەر Pfizer كومپانياسىنىڭ (اقش) Comirnaty ۆاكتسيناسىن سالعىزۋى قاجەت, – دەيدى ق.قازكەنوۆا.
ەلورداداعى احۋال كۇردەلەنسە, ىلە-شالا پاۆلودار وڭىرىندەگى جاعداي ۋشىعا تۇسەتىنى راس. ايماقتار كورشى ورنالاسقاندىقتان, اۋرۋدىڭ دا «قىدىرىپ ءجۇرۋى» زاڭدىلىق. سول ءۇشىن تۇرعىنداردىڭ سەبەپسىز قىدىرماۋى قاجەت-اق.
ورالحان قوجانوۆ,
جۋرناليست
پاۆلودار وبلىسى
