تالدىقورعاندا اۋىر اتلەتيكادان قازاقستان چەمپيوناتى وتەدى

لوندون وليمپياداسىنىڭ چەمپيوندارى يليا يلين, مايا مانەزا, سۆەتلانا پودوبەدوۆا مەن زۋلفيا چينشانلو ءساۋىر ايىنىڭ 18-24 كۇندەرى تالدىقورعان قالاسىندا وتەتىن قازاقستان چەمپيوناتىنا قاتىسادى دەپ كۇتىلۋدە. بۇل تۋرالى قازاقستان اۋىر اتلەتيكا فەدەراتسياسى حابارلادى. بۇل دودانى اۋىر اتلەتيكادان قازاقستان قۇراماسى الماتىدا وتەتىن الەم چەمپيوناتىنا دايىندىق رەتىندە قاراستىرۋدا.  اۋىر اتلەتيكا فەدەراتسياسىنىڭ حابارلاۋىنشا, جوعارىدا اتالعان سپورتشىلارىمىزدىڭ ءبارى ءبىر جىلدىق ۇزىلىستەن كەيىن بىلتىر جەلتوقسان ايىندا جاتتىعۋلارىنا كىرىسكەن بولاتىن.   يليا يلين وليمپيادادان كەيىن ۇلتتىق قۇرامادان بولەك جاتتىعا باستاعانى بەلگىلى. قازىر دە سولاي شەتەلدە جاتتىعادى. ال مايا مانەزا, سۆەتلانا پودوبەدوۆا مەن زۋلفيا چينشانلو بولسا, بۇرىنعىسىنشا ۇلتتىق قۇرامامەن بىرگە الماتىدا وقۋ-جاتتىعۋ جيىندارىن وتكىزىپ ءجۇر. تاعى ءبىر ايتاتىن نارسە,  بيىل زىلتەمىرشىلەرىمىز بىرنەشە حالىقارالىق تۋرنيرلەرگە قاتىسادى. ولار  19 قىركۇيەك پەن 4 قازان ارالىعىندا كورەيانىڭ ينچحون قالاسىندا وتەتىن ازيا ويىندارىنا, 18-24 قاراشا ارالىعىندا 2016 جىلعى ريو-دە-جانەيرو وليمپياداسىنا ليتسەنزيالىق ۇپاي بەرەتىن الەم چەمپيوناتىنا بارادى. داستان كەنجالين. دەرەككوز: confederation.kz فوتو: www. Alaman.kz.