الەم • 04 اقپان، 2022

شەنگەن كەلىسىمى تالاپتارىن قايتا قاراۋدى ۇسىندى

144 رەت كورسەتىلدى

فرانتسيا پرەزيدەنتى ەممانۋەل ماكرون ەو ىشكى ىستەر مينيسترلەرىنىڭ بەيرەسمي كەزدەسۋىنىڭ الدىندا ەو-نىڭ سىرتقى شەكارالارىن باقىلايتىن شەنگەن ايماعى كەڭەسىن قۇرۋدى ۇسىندى.

ول «بۇل كوشى-قون پروبلەماسىنىڭ شيەلەنىسۋىنە جانە ەۋروپاعا قاۋىپ توندىرەتىن تەرروريزمگە بايلانىستى قابىلدانعان شەشىم» دەپ ءتۇسىندىردى. پرەزيدەنت «فرانتسيا ەو ەلدەرىنىڭ ىشكى ىستەر مينيسترلەرى تۇراقتى تۇردە شەشىم قابىلداۋى، اتاپ ايتقاندا سىرتقى شەكارالارعا قاتىستى ءتيىستى قاۋلىلار بەكىتۋى ءۇشىن شەنگەن ايماعىنىڭ كەڭەسىن قۇرۋدى قولدايدى» دەپ مالىمدەدى.

«شەنگەن ايماعى بۇگىنگىدەن مۇلدەم وزگەشە ۋاقىتتا قۇرىلدى. ياعني بۇل ايماق ەۋروپالىق وداق اۋماعىندا تەرروريستىك ءىس-ارەكەتتىڭ قايتا باستالۋىنا دەيىن، ليۆياداعى جانە 2015 جىلى باستالعان باسقا دا داعدارىستاردىڭ سالدارىنان تۋىنداعان كوشى-قون اعىنىنا دەيىن قۇرىلدى»، دەيدى فرانتسيا پرەزيدەنتى.

فرانتسيانىڭ سولتۇستىگىندەگى تۋركۋەن قالاسىندا وتكەن ەۋروپا ىشكى ىستەر مينيسترلەرىنىڭ بەيرەسمي كەزدەسۋىنەن كەيىن ەممانۋەل ماكرون بەيسەنبى جانە جۇمادا باستامانى ليللدە تالقىلاۋدى ۇسىندى.

ەممانۋەل ماكروننىڭ پىكىرىنشە، شەنگەن ايماعىنىڭ جاڭا قۇرىلىمى ارنايى تاعايىندالعان ۇيلەستىرۋشى ارقىلى تۇراقتى كەزدەسۋلەر وتكىزۋى كەرەك. ولاردىڭ العاشقىسى 3 ناۋرىزدا وتەتىن كورىنەدى.

بۇل يدەيانى ىشكى ىستەر جونىندەگى ەۋروپالىق كوميسسار يلۆا يوحانسسون قولدادى. ول ءوزى دە جەلتوقسان ايىنىڭ ورتاسىندا ەۋروپا شەكارالارىنىڭ قاۋىپ­سىزدىگىن نىعايتۋ ماقساتىندا شەنگەن ايماعىن رەفورمالاۋدى ۇسىنعان-دى.

Frontex مالىمەتى بويىنشا 39 ميلليون ادام شەنگەن ايماعىنىڭ اقپارات­تىق جۇيەسى ارقىلى تەكسەرۋدەن وتپەي ەۋروپالىق وداققا كىرگەن.

قازىرگى ۋاقىتتا شەنگەن كەڭىستىگىن باسقارۋعا ەو كەڭەسى، ىشكى ىستەر جانە ادىلەت مينيسترلەرى جاۋاپ بەرەدى.

سوڭعى جاڭالىقتار

ۇقساس جاڭالىقتار