دوستىق ءۇيى – ىنتىماق ۇياسى
تاتۋلىقتىڭ تىرەگىنە ءھام ىنتىماقتىڭ ۇيىتقىسىنا اينالعان تالدىقورعانداعى دوستىق ۇيىنە ۇلتتىق كيىمدەرىن مالىنتا كيىپ, جادىراي, ادەمى قالجىڭدارىن جاراستىرا جينالعان ەتنوستاردىڭ بۇگىنگى تالقىلايتىن تاقىرىبى – ەلباسىنىڭ ءداستۇرلى جولداۋى بولدى. دوڭگەلەك ۇستەل اڭگىمەسىن الماتى وبلىستىق قحا ءتوراعاسىنىڭ ورىنباسارى, حاتشىلىق مەڭگەرۋشىسى عابيت تۇرسىنباي اشىپ, «ەلباسى نۇرسۇلتان نازارباەۆ وتكەن جىلعى قازاقستان حالقى اسسامبلەياسىنىڭ 20-سەسسياسىن «ءبىر حالىق – ءبىر ەل – ءبىر تاعدىر» دەپ اتاۋىمىزدىڭ استارىندا ۇلكەن ءمان بار. كەزىندە تاعدىردىڭ جازۋىمەن قاسيەتتى قازاق دالاسىنا سان ءتۇرلى ۇلت وكىلدەرى قونىس تەپكەن ەدى. بۇگىندە ولار تەگى باسقا بولعانمەن, تەڭدىگى ءبىر, قانى بولەك بولعانىمەن, جانى ءبىر, ارمانى ورتاق ءبىرتۇتاس حالىققا اينالدى», دەگەن ەدى. بيىلعى جولداۋدىڭ تاقىرىبى دا وسىمەن ۇندەسىپ, «قازاقستان جولى – 2050: ءبىر ماقسات, ءبىر مۇددە, ءبىر بولاشاق» دەپ اتالۋى بەكەر ەمەس. مەملەكەتىمىزدىڭ جۇيەلى تۇردە ساباقتاسىپ دامىپ, ساتىلاپ جوعارىلاپ كەلە جاتقانىنىڭ بەلگىسى. بۇل – ءبىرتۇتاس حالقىمىزدىڭ ەرتەڭىنە نىق قادام باسۋعا باعىتتالعان, بارلىق سالانى قامتيتىن, ۇزدىكسىز ءوسۋدى قامتاماسىز ەتەتىن, جاڭعىرۋ جولىنىڭ جاڭا بەلەستەرى. سول بەلەستەردەن ەلدىگىمىز بەن بىرلىگىمىزدى, ىنتىماعىمىز بەن تاتۋلىعىمىزدى ساقتاي وتىرىپ وتەتىن بولساق, ءبىزدىڭ ماڭگىلىك ەل بولاتىنىمىز, ەگەر ماڭگىلىك ەل بولساق, ءتىلىمىز دە ماڭگىلىك بولاتىنى اقيقات», دەپ دوڭگەلەك ۇستەل اڭگىمەسىنىڭ باعىتىن ناقتىلادى.
كەلەسى كەزەكتە ءسوز العان تالدىقورعانداعى «ۆيدەرگەبۋرت» نەمىس قاۋىمداستىعىنىڭ توراعاسى ۆلاديمير مولودتسوۆ: «بۇگىندە وبلىس اۋماعىندا تۇراتىن 103 ەتنوس وكىلدەرى – قازاقستاننىڭ تەڭ قۇقىقتى ازاماتتارى, ارمانى ءبىر, جانى ءبىر ءبىرتۇتاس حالىقتىڭ اجىراماس بولىگى. ەتنومادەني ورتالىقتار ەلباسىمىزدىڭ ساياساتىن حالىققا جەتكىزۋ, جىل سايىنعى جولداۋلاردىڭ نەگىزگى تاراۋلارىن جۇرتشىلىققا ءتۇسىندىرۋ جانە ۇگىت-ناسيحات جۇمىستارىنا بەلسەنە ارالاسىپ ءجۇر. الماتى وبلىسىنىڭ اكىمى اڭسار مۇساحانوۆ قازاقستان حالقى اسسامبلەياسى مۇشەلەرىمەن ءجيى كەزدەسىپ, جۇمىسىمىزعا ناقتى كومەك كورسەتەدى. سونىڭ ارقاسىندا ەتنومادەني بىرلەستىكتەردىڭ جۇمىسىندا ساپالى وزگەرىستەر بايقالۋدا. ولار قوعامداعى تۇراقتىلىقتى جانە ەلدىڭ بىرلىگىن ساقتاۋدا وزىنە جۇكتەلگەن مىندەتتى ابىرويلى ورىنداپ كەلەدى», دەسە, ارىپتەسىنىڭ ءسوزىن الماتى وبلىستىق «ەلەفتەريا» گرەك قاۋىمداستىعىنىڭ توراعاسى گەورگي يوردانيدي ساباقتاي ءتۇستى. ول: «ەلباسىمىز بيىلعى جولداۋىندا پرەزيدەنت اكىمشىلىگىنە, ۇكىمەتكە جانە قازاقستان حالقى اسسامبلەياسىنا, «نۇر وتان» پارتياسىنا, «قازاقستان 2050» قوزعالىسىنا «ماڭگىلىك ەل» پاتريوتتىق اكتىن جاساپ, قابىلداۋدى تاپسىردى. بۇل, ەڭ الدىمەن, مەملەكەتتىڭ جانە حالىقتىڭ بىرلىگى, ولاردىڭ ءوزارا سەنىمىن نىعايتاتىن ۇلتتىق يدەيا بولۋى ءتيىس ەكەندىگىن اتاپ كورسەتتى. قازاق ەلىن جانە ونىڭ جەتىستىكتەرىن ازاماتتارىمىزدىڭ ماقتان تۇتۋى ەرتەڭگى كۇنگە دەگەن سەنىم مەن حالىقتىڭ رۋحىن كوتەرەتىن ماڭىزدى فاكتور ەكەندىگى راس», دەدى.
ءوز كەزەگىندە قازاقستان كارىستەر اسسوتسياتسياسى تالدىقورعان ايماقتىق فيليالىنىڭ توراعاسى ۆلاديمير لي: «بيىلعى جىلعى اسسامبلەيانىڭ العاشقى كەڭەسى ەلباسىنىڭ ءداستۇرلى جولداۋىنا ارنالىپ, ونىڭ نەگىزگى ەرەجەلەرىن ناسيحاتتاۋ جانە حالىققا ءتۇسىندىرۋ ءۇشىن جۇمىس جوسپارىن بەكىتتى. ارنايى لەكتورلار توبىن جانە ادىستەمەلىك قۇرال دايىنداۋ جونىندە شەشىم قابىلدادى. وسىعان سايكەس, الماتى وبلىستىق قازاقستان حالقى اسسامبلەياسى ءوز قۇرامىنداعى ءاربىر ەتنومادەني بىرلەستىكتى جۇمىلدىرا وتىرىپ, «قازاقستان-2050» ستراتەگياسىن جۇرتشىلىققا ءتۇسىندىرۋ ىسىنە كىرىسىپ كەتتىك. قوعامداعى تۇراقتىلىق پەن كەلىسىمدى ساقتاۋ, مەملەكەتتىك ءتىلدى مەڭگەرۋ, اعا ۇرپاقپەن تاجىريبە الماسۋ جانە قازاقستان حالقى اسسامبلەياسىنىڭ قۇرىلعانىنا 19 جىل تولۋىنا ارنالعان مادەني-كوپشىلىك شارالار ارقىلى ەلباسىمىزدىڭ ۇستانىپ وتىرعان ساياساتىن حالىققا جەتكىزۋ بويىنشا كەشەندى جوسپارمەن جۇمىس باستادى», دەپ تۇيىندەدى ءسوزىن.
ستراتەگيانى ورىنداۋعا اتسالىسۋ – ەلىمىزدىڭ ءاربىر ازاماتىنىڭ ءوز ەلىنىڭ پاتريوتى رەتىندەگى ابىرويلى مىندەتى. قازاقستان ازاماتتارى كۇننەن-كۇنگە, جىلدان-جىلعا ەلىمىزدىڭ ءومىرىن جاقسارتا تۇسەتىن يگى ىستەردىڭ اۋقىمدى ءارى ناقتى باعدارلاماسىن بىرىگىپ جۇزەگە اسىرعانى ءلازىم.
نۇربول الدىباەۆ,
«ەگەمەن قازاقستان».
الماتى وبلىسى.
تاتۋلىقتىڭ شىنايى مەكەنى
الەمدە ۇلكەندى-كىشىلى ەل كوپ. ال ءبىزدىڭ تاۋەلسىز قازاقستانىمىز – جاھان جۇرتىنا تەمىرقازىقتاي مىقتى ساياسي تۇراقتىلىعىمەن تانىلعان ساناۋلى ەلدەردىڭ ءبىرى. قازاقتىڭ كەڭ-بايتاق جەرىن كوپ ۇلت مەكەن ەتىپ عانا قويماي, تاتۋلىق پەن دوستىقتىڭ بۋىنىن بەكىتىپ, ەلىمىزدىڭ الەمدىك دامۋدىڭ كوشباسشىسى بولۋىنا اتسالىسىپ كەلەدى. بىزدەگى ساياسي, ەكونوميكالىق تۇراقتىلىقتى قازاقستاننىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ تاۋەلسىز ەلىمىزدى جاھاندىق وركەنيەت كوشىنىڭ العى شەبىندەگى قۋاتتى مەملەكەتتەردىڭ قاتارىنا شىعارۋداعى ولشەۋسىز ەڭبەگىمەن بايلانىستىرا الامىز. مۇنى قازاق جەرىندە ءوسىپ-وركەندەپ, وسى ەلدەن باقىت تاپقان وزگە ۇلتتاردىڭ بارلىعى دا سەزىنەدى.
ارينە, تەك سەزىنەدى دەۋمەن شەكتەلسەك ۇستىرتتەۋ پىكىر بولار. شىندىعىن ايتساق, بىزبەن كورشىلەس كەي ەلدەردەگى, ءتىپتى, الىستاعى كوپتەگەن مەملەكەتتەردەگى قارجىلىق داعدارىستىڭ شىرماۋىن, ىشكى دۇردارازدىقتى كورگەندە, قازاقستانداعى ەتنوسارالىق تاتۋلىق پەن ساياسي تۇراقتىلىقتىڭ ماڭىزى ارتا تۇسەدى. مىنە, سول سەبەپتەن قازاقستانداعى ءار ۇلتتىڭ وكىلى كەلەشەك ۇرپاعىمىز ءۇشىن ەتنوسارالىق دوستىقتىڭ, كونفەسسياارالىق تۇسىنىستىكتىڭ ءتىنى بۇزىلماۋىنا, وتاندىق ەكونوميكانىڭ جاڭا تەحنولوگيالارمەن قارقىندى وركەندەۋىنە قىزمەت ەتەدى.
ۇلتارالىق تاتۋلىقتى نىعايتۋعا قازاقستاندى مەكەن ەتكەن ازەربايجانداردىڭ دا قوسىپ وتىرعان ۇلەسى زور. مەن اتىراۋداعى ازەربايجانداردىڭ باسىن قوسقان «نوۆۋرز» ەتنومادەني بىرلەستىگىنىڭ بەلسەندى مۇشەسىمىن, ءارى توراعانىڭ ورىنباسارى رەتىندە ۇلتارالىق دوستىقتى نىعايتۋعا بەلسەندى ۇلەسىمدى قوسىپ كەلەمىن. ەتنومادەني ءبىرلەستىككە مۇشە بولعاننان كەيىن ءوز ۇلتىمنىڭ وكىلدەرىمەن دە, وزگە دە ءبىرلەستىكتەرگە بىرىككەن كورەي, نەمىس, چەشەن, ينگۋش, ورىس, گرۋزين, بولگار جانە باسقا ۇلتتاردىڭ وكىلدەرىمەن ءجيى كەزدەسەمىن. سوندا ولار «قازاقستان – دوستىق پەن تاتۋلىقتىڭ شىنايى مەكەنى» دەگەندى ۇنەمى ايتىپ جاتادى. ەلباسىمىز نۇرسۇلتان نازارباەۆتىڭ ءوزى دە قازاقستانداعى تۇراقتىلىقتى ساقتاۋدىڭ العىشارتى رەتىندە الدىمەن ەكونوميكانى وركەندەتۋدىڭ قاجەتتىلىگىن العا تارتىپ كەلەدى. سوندىقتان «...الدىمەن – ەكونوميكا» قاعيداسىن ۇستانۋىن ورىندى سانايمىن. ال ەكونوميكانىڭ ءار سالاسىندا بەلسەندى ەڭبەك ەتىپ جۇرگەن ءار ۇلتتىڭ باسىن قوسىپ, قازاقستان حالقى اسسامبلەياسىن قۇرۋى وزگە ەلدەرگە ۇلگى-ونەگە بولاتىنداي قادام ەدى.
قازىر قازاقستان حالقى اسسامبلەياسىنىڭ ەل ىشىندەگى بەدەلى تەك ەتنوسارالىق دوستىقتى نىعايتۋمەن عانا شەكتەلمەيدى. اسسامبلەيا مۇشەلەرى ءار ەتنوستىڭ مادەنيەتى مەن ءتىلىن, ءداستۇرى مەن ءدىنىن ساقتاۋمەن بىرگە, قوعامداعى تۇراقتىلىقتى نىعايتۋ باعىتىنداعى بارلىق ءىس-شاراعا بەلسەنە ارالاسادى. پارلامەنت ماجىلىسىنە دە اسسامبلەيادان ارنايى دەپۋتاتتار توبىنىڭ سايلانۋى وسىناۋ قۇرىلىمنىڭ بەدەلىن كوتەرە تۇسۋگە سەپتىگىن تيگىزدى. وزگە ەتنوستار اراسىندا قازاق ءتىلىن جەتە مەڭگەرگەندەر دە بار. ءوزىم دە قازاقشا ءتاپ-ءتاۋىر سويلەيمىن. ەلباسىنىڭ تولەرانتتىلىق ۇستانىمىنا سايكەس كەلەتىندىكتەن, قازاق جەرىن مەكەن ەتكەن وزگە ەتنوستار جەرگىلىكتى حالىقتىڭ تاريحىن, مادەنيەتىن عانا جەتىك ءبىلىپ قويماي, مەملەكەتتىك ءتىلدى مەڭگەرۋگە دەگەن تالپىنىسى ۇدايى قولداۋ تاۋىپ كەلەدى. ويتكەنى, قازاق حالقىنىڭ دارحان كوڭىلى, دوسى تۇگىل قاسىنا دا قاستىق جاسامايتىن كەڭپەيىلدىگى بارشا ۇلىستى ءبىر شاڭىراقتىڭ استىنا ۇيىستىرۋعا سەبەپ بولىپ وتىر.
راس, قوعامدىق دامۋدىڭ ۇدايى وزگەرىپ وتىراتىن وزىندىك زاڭدىلىقتارى بار. دەگەنمەن دە, نارىقتىڭ قيىندىعىنان امان ءوتىپ كەلەمىز. ەلىمىز جاھانعا تۇراقتىلىقتىڭ, ەكونوميكالىق وركەندەۋدىڭ مەكەنى رەتىندە تانىلدى. ءبىزدىڭ ەلىمىزدە ۇلتارالىق تاتۋلىقتىڭ, دوستىقتىڭ, سونىمەن بىرگە, كونفەسسياارالىق كەلىسىمنىڭ دە بەرىك نەگىزى قالاندى. بۇل كۇندەرى, تاۋبە دەپ ايتالىق, اعا بۋىننىڭ وكىلدەرى ۇرپاعىنىڭ كەلەشەگىنە ەش الاڭدامايتىن بولدى. ءار ەتنوستىڭ وسكەلەڭ ۇرپاعى قۇتتى مەكەنىنە بالايتىن تاۋەلسىز قازاقستاننىڭ تاريحىن, مادەنيەتىن بىلۋمەن بىرگە, ءوز ۇلتىنىڭ قۇندىلىقتارىن دا ەركىن مەڭگەرىپ وسەدى. مۇنداي مۇمكىندىك الەمنىڭ قاي ەلىندە جاسالىپ وتىر؟ ال بۇل – قازاقستاندى ءوز وتانىم دەپ سانايتىن ءار ازاماتىنا, ءار ەتنوستىڭ وكىلىنە ۇلكەن جاۋاپكەرشىلىك. سول سەبەپتەن ءبىزدىڭ باستى ماقساتىمىز – ىشكى تۇراقتىلىقتى ساقتاپ, ەكونوميكالىق وركەندەۋدى دامىتا بەرۋ, سونىمەن بىرگە, تاۋەلسىز وتانىمىز – قازاقستاننىڭ وركەندەي بەرۋىنە ادال قىزمەت ەتەتىن سانالى ۇرپاق تاربيەلەۋ. بارشا قازاقستاندىقتار ءۇشىن ەڭ باستى قۇندىلىق – ۇلتارالىق تاتۋلىق!
شيرازي اليەۆ,
اتىراۋداعى
«نوۆۋرز» ازەربايجان ەتنومادەني بىرلەستىگى توراعاسىنىڭ ورىنباسارى.
اتىراۋ وبلىسى.
بىرلىگىمىز – باعا جەتپەس بايلىعىمىز
الەمنىڭ ەشبىر مەملەكەتىندە قازاقستان حالقى اسسامبلەياسى (قحا) سىندى قوعامدىق ينستيتۋت جوق. ەل تاريحىنداعى ءرولى ەرەكشە قحا بۇگىنگى كۇنى قوعامداعى تۇراقتىلىق پەن كەلىسىمدى ساقتايتىن جانە قامتاماسىز ەتەتىن ورگانعا اينالعان. قازاقستان حالقى اسسامبلەياسىنىڭ جۇمىس تاجىريبەسىن رەسەي, قىتاي, اقش, فرانتسيا سياقتى كوپتەگەن شەتەل مەملەكەتتەرى زەرتتەۋدە. ەلىمىز الەم مەملەكەتتەرىمەن ءوزىنىڭ ۇلتتىق ساياساتتىڭ ستراتەگياسىمەن, ساياسي تۇراقتىلىقتى, قوعامدىق بىرلىك پەن كەلىسىمدى نىعايتۋداعى تاجىريبەلەرىمەن بولىسۋدە. مەملەكەتىمىزدىڭ ساياساتى حالىقتىڭ رۋحاني-ادامگەرشىلىك قۇندىلىعىن ساقتاۋ مەن بايىتۋعا باعىتتالعان.
وسىناۋ بىرەگەي ۇيىم قازاقستاندا ءومىر ءسۇرىپ جاتقان ەتنوستاردىڭ ءتىلى مەن مادەنيەتىن ساقتاۋىنا, ەتنو-مادەني بىرلەستىكتەردىڭ جۇمىس ىستەۋىنە باعىت-باعدار بەرىپ, باسشىلىق جاساپ كەلەدى. بۇگىندە وبلىس ورتالىعىنداعى دوستىق ۇيىندە 22 ەتنومادەني بىرلەستىك بار. ولاردىڭ اراسىندا ءبىزدىڭ ء“رادزىما” بەلارۋس مادەنيەتى ورتالىعى” قوعامدىق بىرلەستىگى دە وڭىرىمىزدەگى 10 مىڭعا جۋىق بەلارۋستاردىڭ باسىن قوسىپ, انا ءتىلىمىزدىڭ, مادەني سالت-ءداستۇرىمىز بەن ادەت-عۇرپىمىزدى ناسيحاتتاۋدى, ۇلتتىق سانا-سەزىمىمىزدى نىعايتۋدى, ەتنوسارالىق بىرلىكتى, بەيبىتشىلىكتى, دوستىقتى ساقتاۋدى باستى ماقسات تۇتادى. وبلىستىق اسسامبلەيا وتكىزەتىن شارالارعا بەلسەنە قاتىسادى. مەرەكەلەردە, كەزدەسۋلەردە, كونتسەرتتەردە بەلارۋستاردىڭ تاريحى مەن مادەنيەتى, قىمبات قۇندىلىقتار ۇلگى ەتىلەدى. ۇلتتىق جاڭعىرتۋ مەكتەبىندە بەلارۋس تىلىندە ارنايى سىنىپ جۇمىس ىستەيدى. تاريحي وتانىمىزبەن تىعىز بايلانىس ورناتىلعان. ورتالىقتىڭ مينسكىدەن الاتىن “گولاس ءرادزىمى” گازەتى وقىرماندارىن بەلارۋس رەسپۋبليكاسىندا بولىپ جاتقان جاڭالىقتارمەن, وقيعالارمەن تانىستىرادى. اتالمىش گازەت شەتەلدە تۇراتىن وتانداستار ءۇشىن ارنايى شىعارىلادى.
قازاقستان مەن بەلارۋس رەسپۋبليكاسى اراسىنداعى قاشىقتىق 3 مىڭ شاقىرىمداي بولسا دا, كەدەن وداعى ءبىرتۇتاس ەكونوميكالىق كەڭىستىك ءبىر-ءبىرىمىزدى ءتىپتى جاقىنداتا ءتۇستى. رەسپۋبليكامىزدى مەكەن ەتەتىن 100 مىڭداي قانداستارىمىزدىڭ كوپشىلىگى سولتۇستىك وڭىرلەردە تۇرادى. ولاردىڭ قاي-قايسىسى بولسىن قازاقستاندى وتانىم, تۋعان جەرىم دەپ ەرەكشە قادىرلەيدى.
«بەس ساۋساق جۇمىلسا – جۇدىرىق» دەگەن ناقىل ءسوز بار. ورتاق ەكونوميكا مەن مادەنيەتتى قۇرا وتىرىپ, ءبىز – ەلىمىزدىڭ بارلىق ەتنوستارى ورتاق بولاشاعىمىزعا ۇمتىلعان قازاقستاننىڭ ءبىرتۇتاس حالقىمىز. ءبىز ەلباسى, پرەزيدەنتىمىز نۇرسۇلتان نازارباەۆتىڭ باسشىلىعىمەن قازاقستاندى گۇلدەندىرە, قۋاتتاندىرا بەرەتىن بولامىز.
قازىر شىعىستىڭ جاڭا جىلى, ءاز ناۋرىزعا تىڭعىلىقتى ازىرلىكتەر جاساۋدامىز. ەلىمىزدىڭ باستى مەرەكەسىندە قازاق, بەلارۋس تىلدەرىندە اندەر شىرقاپ, بيلەر بيلەپ, بەلسەنە اتسالىساتىن بولامىز. ءبىز ءۇشىن كەز كەلگەن مەيرام دوستىق, بىرلىك تۋى بولىپ تابىلادى.
رايسا سولوپوۆا,
پەتروپاۆلداعى
«ءرادزىما» بەلارۋس مادەني بىرلەستىگىنىڭ ءتورايىمى.
سولتۇستىك قازاقستان وبلىسى.
ايىرىلماستاي دوسىڭا قايىرىلماستاي ءسوز ايتپا
دوستىقتىڭ قادىرىن ءبىر بىلسە, ءبىزدىڭ دۇنگەن حالقى جاقسى بىلەدى. سوناۋ جىلدارى قۋعىن-سۇرگىن كورىپ, تاۋ اسىپ, تاس باسىپ, ارىپ-اشىپ كەلگەن اتا-بابالارىمىزدى قازاق حالقى بوتەنسىمەي, باۋىرىنا باستى. مىنە, سودان بەرى ءبىزدىڭ بىرنەشە ۇرپاق ءوسىپ-ءونىپ, بۇگىندە جەمىسى جايقالعان ماۋەلى داراققا اينالىپ وتىر. ولار وبلىسىمىزدىڭ قورداي, جامبىل سياقتى ىرگەلى اۋداندارىندا بەيبىت تە بەيمارال ءومىر ءسۇرىپ جاتىر. بۇل ءۇشىن ءبىز, ەڭ الدىمەن, قيىن-قىستاۋ زاماندا باسىمىزدى سۇيەگەن قازاق حالقىنا قارىزدارمىز. قازىر دە ارقا تۇتار اسقار تاۋىمىز سياقتى كورەمىز.
الەۋمەتتىك جاعدايىمىز قازاق مەملەكەتى تاۋەلسىزدىك العالى بەرى بۇرىنعىدان دا جاقسارا ءتۇستى. بۇگىندە دۇنگەن حالقىنىڭ وكىلدەرى وبلىستىڭ اۋىل شارۋاشىلىعى جۇمىستارىنا, مەديتسينا سالاسىنا, مادەنيەتى مەن ونەرىنە جانە سپورتىنا حال-قادەرىنشە اتسالىسۋدا. مەن تۇرىپ جاتقان بۇرىنعى دۋنگانوۆكا, بۇگىنگى جالپاقتوبە اۋىلى وبلىسقا عانا ەمەس, رەسپۋبليكامىزعا تانىمال اۋىل. مۇندا كەزىندە اتاقتى كومپوزيتور ءشامشى قالداياقوۆتىڭ ءوزى تۇرىپ, بەلگىلى «دۇنگەن قىزى» ءانىن دۇنيەگە اكەلگەن.
مەن ءشامشى اعانىڭ باسقا ەمەس, تۋرا ءبىزدىڭ ۇيدە تۇرعانىن وسى كۇنى ماقتانىشپەن ايتىپ ءجۇرمىن. ول كىسىنى ءبىزدىڭ وتباسىنا جاقىنداستىرعان دا ۇلى دوستىق. ءبىزدىڭ ءۇيدىڭ قاسىنان وزىنە جەكە ءۇي سالامىن دەپ ىرگەتاسىن قالاعان كەزدە وسمان دەگەن ءىنىم ۇلى سازگەردىڭ قاسىنان تابىلىپ, كومەك قولىن سوزدى. ءشامشىنى انام دا بالاسىنداي جاقسى كورىپ, «بۇل سەندەردىڭ اعالارىڭ بولادى» دەپ وتىرۋشى ەدى, جارىقتىق.
ايتايىن دەگەنىم, بىزدەر ءدۇنگەندەر بۇگىندە قازاق حالقىمەن توسكەيدە مالى, توسەكتە باسى قوسىلعان مىڭجىلدىق قۇدا, دوس-جاران بولىپ كەتتىك. ءدىلىمىز عانا ەمەس, تىلەگىمىز دە ءبىر. ول تىلەك – تاۋەلسىز قازاقستاننىڭ عاسىرلاردان عاسىرلارعا گۇلدەنىپ, كوركەيە بەرۋى. دۇنيە ءجۇزىنىڭ ەڭ وركەنيەتتى, ەڭ دامىعان وزىق ەلدەرىنىڭ قاتارىنان كورىنۋى جانە سوعان دۇنگەندەر تاراپىنان ۇلكەن ۇلەس قوسۋ. ارينە, مەن بۇگىندە زەينەتتەگى وفيتسەرمىن. بىراق, تىلەگىم ەل ۇستىندەگى بەيبىتشىلىك پەن بەرەكە ەكەنىندە ءسوز جوق. بالالارىم مەن نەمەرەلەرىمە دە وسىنى ايتىپ, قازاقستاننىڭ بەيبىت ساياساتىن ۇدايى ناسيحاتتاپ وتىرامىن.
قازاقتا «ايىرىلماستاي دوسىڭا قايىرىلماستاي ءسوز ايتپا» دەگەن تاماشا ماقال بار. قازاقستاندى وتانىم دەپ تۇسىنەتىن ەلىمىزدەگى جۇزدەن استام ۇلتتار مەن ۇلىستاردىڭ وكىلدەرىنە ايتارىم, ءبىر-ءبىرىمىزدى سىيلاپ, ءبىر-ءبىرىمىزدى قۇرمەتتەۋدى ەشقاشان ۇمىتپايىق. كۇنى ەرتەڭ تويلاعالى وتىرعان ناۋرىز مەرەكەسىنىڭ تىلەگى دە دوستىق, بىرلىك, بەرەكە ەمەس پە. ەندەشە, ەلدە تەك قانا تىنىشتىق بولسىن! ءاۋمين!
يليا گاشيزوۆ,
تارازداعى «ۆىنحۋا» دۇنگەن مادەني بىرلەستىگى اسسوتسياتسياسىنىڭ مۇشەسى.
جامبىل وبلىسى,
جامبىل اۋدانى,
جالپاقتوبە اۋىلى.
