سونىمەن قاتار HRW قاماۋعا الىنعاندارعا قاتىستى باسقا دا زاڭ بۇزۋشىلىقتار تۋرالى اقپارات جاريالادى. وسىعان بايلانىستى ۆەدومستۆو رەسمي تۇردە جاۋاپ بەردى.
«قازاقستان رەسپۋبليكاسى شەكتەن تىس كۇش قولدانۋدىڭ, زاڭسىز ۇستاۋدىڭ, ازاپتاۋدىڭ جانە قاماۋعا الىنعاندارعا قاتىگەزدىك كورسەتۋدىڭ ىقتيمال جاعدايلارىن ايىپتايدى.
پرەزيدەنت قاسىم-جومارت توقاەۆ قارۋلى تارتىپسىزدىكتەرگە تەرگەۋ ءادىل بولۋى جانە زاڭ اياسىندا جۇرگىزىلۋى ءتيىس ەكەنىن بىرنەشە رەت مالىمدەگەن بولاتىن. قاماۋعا الىنعانداردىڭ قۇقىقتارىن قاتاڭ ساقتاۋ جانە سوتتا ءىستىڭ ادىلەتتى قارالۋى مىندەتتى شارت بولۋى ءتيىس.
مەملەكەت باسشىسى باس پروكۋراتۋرا مەن ىشكى ىستەر مينيسترلىگىن تەرگەۋ ءىس-شارالارىن جۇرگىزگەن كەزدە ازاپتاۋ مەن قاتىگەزدىكتىڭ وزگە تۇرلەرىن قولدانۋعا تىيىم سالاتىن ەلىمىزدىڭ كونستيتۋتسياسى مەن قىلمىستىق-پروتسەستىك كودەكسiنىڭ ساقتالۋىن قامتاماسىز ەتۋگە شاقىردى», دەلىنگەن حابارلامادا.
مينيسترلىكتىڭ حابارلاۋىنشا زاڭسىز ۇستاۋ جانە قاماۋعا الىنعان ازاماتتارعا قاتىگەزدىك كورسەتۋ تۋرالى كەز كەلگەن مالىمەتتەر مۇقيات قاراستىرىلاتىن بولادى. تەرگەۋ ورگاندارى كەلىپ ءتۇسىپ جاتقان بارلىق زاڭ بۇزۋشىلىق فاكتىلەرىن تەكسەرۋدە. ازاماتتاردىڭ قاجەتتى اقپاراتتى كەدەرگىسىز جانە جەدەل الۋى, ونىڭ ىشىندە پوليتسيا قىزمەتكەرلەرىنىڭ ءىس-ارەكەتتەرىنە شاعىم جولداۋى ماقساتىندا «شۇعىل جەلى» اشىلعان. قر باس پروكۋراتۋراسىنىڭ دەرەكتەرى بويىنشا, بۇگىنگى كۇنى ازاماتتاردىڭ تەرگەۋ جۇرگىزۋدىڭ رۇقسات ەتىلمەگەن ادىستەرىنە جانە قۇقىقتارىن بۇزۋعا قاتىستى شاعىمدارى بويىنشا قۇقىق قورعاۋ ورگاندارى تاراپىنان بارلىعى 98 قىلمىستىق ءىس تەرگەلۋدە.
«قر باس پروكۋراتۋراسى جانە باسقا دا تەرگەۋ ورگاندارى قازاقستاندىق جانە حالىقارالىق قوعامداستىق كوتەرگەن ءاربىر جەكە ءىستى جان-جاقتى قاراستىرۋعا دايىن.
قاماۋعا الىنعان ازاماتتاردىڭ قۇقىقتارىنىڭ ساقتالۋىنا مونيتورينگ جۇرگىزۋ ءۇشىن ادام قۇقىقتارى جونىندەگى ۋاكىل ەلۆيرا ازىموۆاعا, ازاپتاۋلاردى بولدىرماۋدىڭ ۇلتتىق الدىن الۋ تەتىگىنىڭ (ۇات) جانە ۇلتتىق قوعامدىق سەنىم كەڭەسىنىڭ مۇشەلەرىنە پەنيتەنتسيارلىق جۇيە مەكەمەلەرىنە قولجەتىمدىلىك قامتاماسىز ەتىلگەن.
ۇات وڭىرلىك توپتارى قازاقستاننىڭ 16 وڭىرىندەگى 83 جابىق مەكەمەگە 97 تاۋەلسىز مونيتورينگ جۇرگىزدى. ادام قۇقىقتارى جونىندەگى ۋاكىلدىڭ اتىنا ازاماتتاردان قۇقىقتارىنىڭ بۇزىلۋى جونىندە 48 ءوتىنىش ءتۇسىپ, قاراستىرىلۋدا. سونىمەن قاتار, وڭىرلىك توپتاردىڭ ۇسىنىسى بويىنشا قاماۋعا الىنعان جانە تۇتقىندالعان ازاماتتارعا ادۆوكاتتار مەن ازاماتتىق دارىگەرلەردىڭ كىرۋى قامتاماسىز ەتىلدى», دەلىنگەن قر ءسىم جاۋابىندا.
ازاماتتىق قوعامنىڭ بەدەلدى وكىلدەرى, ونىڭ ىشىندە قۇقىق قورعاۋشىلار جانە زاڭگەرلەر قاڭتار وقيعالارىنا تەرگەۋ جۇرگىزۋ بويىنشا قوعامدىق كوميسسيالار قۇردى.
«قازاقستان ادام قۇقىقتارى سالاسىنداعى ءوزىنىڭ بارلىق مىندەتتەمەلەرىن ساقتاۋعا بەيىلدى جانە حالىقارالىق ۇكىمەتتىك ەمەس ۇيىمدارمەن اشىق ديالوگقا جانە ىنتىماقتاستىققا دايىن. اتاپ ايتقاندا, قر سىرتقى ىستەر ءمينيسترى مۇحتار تىلەۋبەردىنىڭ Human Rights Watch ۇيىمىنىڭ اتقارۋشى ديرەكتورى كەننەت روتپەن كەزدەسۋ وتكىزۋى جونىندە ۋاعدالاستىققا قول جەتكىزىلدى. قازاقستان رەسپۋبليكاسى ادام قۇقىقتارى سالاسىنداعى بۇۇ ورگاندارىمەن جانە تەتىكتەرىمەن بەلسەندى ءوزارا ءىس-قيمىلدى جالعاستىرۋدا», دەپ جازدى ۆەدومستۆو.
