قالباتاۋعا كارەلين كەلگەن كۇن

سارسەنبى – جارمالىقتار ءۇشىن ءساتتى كۇن بولدى. وبلىس اكىمى بەردىبەك ساپارباەۆتىڭ باستاماسىمەن قولعا الىنعان «تۋعان جەرگە – تاعزىم» اكتسياسى شەڭبەرىندە قالباتاۋ اۋىلىندا ايگىلى بالۋان داۋلەت تۇرلىحانوۆ جەرلەستەرىنە حالىقارالىق تالاپتارعا ساي ايدىك سپورت كەشەنىن تارتۋ ەتتى. بۇل – جارما جەرىنە وليمپيادا چەمپيوندارى جينالعان كۇن ەدى. اتالعان شاراعا وليم­پيادانىڭ ءۇش, الەمنىڭ توعىز, ەۋروپانىڭ ون ەكى دۇركىن چەمپيونى, رەسەي فەدەراتسياسى مەملەكەتتىك دۋماسىنىڭ دەپۋتاتى الەكساندر كارەلين باستاعان نوۆوسىبىرلىك دەلەگاتسيا ارنايى كەلدى. سونىمەن بىرگە, قازاقتىڭ رۋحىن جانىعان وليمپيادا چەمپيوندارى جاقسىلىق ۇشكەمپىروۆ پەن باقتيار ارتاەۆ جانە سالتاناتتى شارانىڭ يەسى, ايگىلى بالۋان داۋلەت تۇرلىحانوۆ باستاعان مارتەبەلى مەيماندار قاتىستى. – جارما توپىراعىنا وسىعان دەيىن داڭقتى بالۋان الەكساندر كارەلين باستاعان ءتورت بىردەي وليمپيادا جەڭىمپازىنىڭ تابان تىرەۋى سياقتى وقيعا بولعان جوق, – دەدى بەردىبەك ساپارباەۆ. بۇل ىزگى شارانىڭ ادام ءومىرىنىڭ كەيىنگى ۇرپاققا ايتا جۇرەر ماڭىزدى, ايتۋلى وقيعا بولىپ ەستە قالاتىنىن جەتكىزگەن ءوڭىر باسشىسى رەسەيلىك اتاقتى مەيماننىڭ وسى ءىس-شاراعا ارنايى كەلۋى ەكى ەل اراسىنداعى دوستىق پەيىلدىڭ جارقىن كورىنىسى ەكەنىن اتاپ ءوتتى. قالباتاۋ اۋىلى – وليمپيا ويىندارىنىڭ كۇمىس جانە قولا جۇلدەگەرى, الەم جانە ەۋروپا چەمپيونى, كەڭەس وداعىنىڭ جەتى دۇركىن جەڭىمپازى داۋلەت تۇرلىحانوۆتىڭ تۋعان جەرى. «تۋعان جەرگە – تاعزىم» اكتسياسى اياسىندا داڭقتى بالۋان شىعىس وڭىرىنە, ونىڭ ىشىندە جارما اۋدانىنا ۇنەمى قولۇشىن سوزىپ, ءتۇرلى الەۋمەتتىك جوبالاردىڭ دەمەۋشىسى بولىپ كەلەدى. ال تۇر­لى­حانوۆتار اۋلەتىنىڭ بۇل جولعى تارتۋى – ايرىقشا. بولات تۇرلىحانوۆ اتىنداعى زاما­ناۋي سپورت كەشەنىندە 1 مىڭ ادام جاتتىعا الادى. ءزاۋلىم نىسان ءۇش سپورت زالىنان تۇرادى. ونىڭ ىشىن­دە بوكس, اۋىر اتلەتيكا جانە كۇرەسكە ارنالعان امبەباپ زالدار بار. سپورت نىسانىندا كەز كەلگەن ءدۇبىرلى جارىستى قىسىلماي, ەمىن-ەركىن وتكىزۋگە مۇمكىندىك جاسالعان. جارىستى ءبىر مەزەتتە 450 جانكۇيەر تاماشالاي الادى. – قازاقستاندا, ونىڭ ىشىندە شىعىس وڭىرىندە تۋعان ولكە مەن اعا تولقىنعا دەگەن ۇلكەن ءىلتيپات پەن بيىك قۇرمەت قالىپتاسقانىن بايقادىم. بۇگىن حالىقتىق يگى ءداستۇردىڭ ارقاسىندا تاماشا سپورت نىسانىنىڭ اشىلۋىنا كۋا بولىپ وتىرمىز. سپورت كەشەنىنىڭ پايدالانۋعا بەرىلۋى – بارشامىزعا ءوز ەلىمىزدىڭ پاتريوتى بولىپ, تۋعان ولكەمىزدى ءسۇيۋدىڭ ۇلگىسىن كورسەتتى. مۇندا ەرتەڭنەن باستاپ بالالار سپورتپەن شۇعىلدانا باستايدى, ولاردىڭ اراسىنان كەلەشەكتە تالاي چەمپيوندار شىعاتىنىنا سەنەمىن, – دەدى ا.كارەلين. داۋلەت تۇرلىحانوۆ ءوز سوزىندە سپورت عيماراتىنىڭ ورنىندا 50-60-جىلدارى اباي اتىنداعى ورتا مەكتەپ بولعانىن جەتكىزىپ, جاڭا كەشەننىڭ ەل يگىلىگىنە قىز­مەت ەتۋىنە تىلەكتەستىگىن ءبىلدىر­دى. ەلىنە ەلەۋلى بالۋاننىڭ اناسى ءمارزيا تۇرلىحانوۆاعا گۇل شوقتارى تابىس ەتىلدى. كەش قوناقتارى ءوڭىر باسشىسىنىڭ «تۋعان جەرگە – تاعزىم» اكتسياسى تۋعان ەل مەن جەردى كوركەيتۋگە نەگىز بولاتىن پاراساتتى باستاما بولىپ وتىرعانىن ايرىقشا اتاپ ءوتتى. مەرەكەلىك جيىن سوڭىندا وليمپياداشىلار شەرۋى اۋدان ورتالىعىنداعى ەل تاۋەلسىزدىگىنە ارنالعان مونۋمەنتتىڭ اشىلۋىنا قاتىستى. سپورتتىق مەرەكە بارىسىندا شىعىس قازاقستان جانە رەسەي فەدەراتسياسىنىڭ ءنوۆوسىبىر وبلىستارىنىڭ جاسوسپىرىمدەر كوماندالارى اراسىندا گرەك-ريم كۇرەسىنەن جولداستىق كەزدەسۋ ءوتتى. داڭقتى بالۋان الەكساندر كارەلينگە شىعىسقازاقستاندىق سپورتسۇيەر قاۋىم ەرەكشە قۇرمەت كورسەتتى. ماسەلەن, مارتەبەلى مەيمان وبلىس ورتالىعىندا وتكەن رەسپۋبليكالىق جاراتىلىستانۋ جانە ماتەماتيكا پاندەرى بويىنشا وليمپيادانىڭ جابىلۋ سالتاناتىنا قاتىستى. جارما اۋدانىنا بارا جاتقان كۇرە جولدا ۇلان اۋدانىنىڭ تۇرعىندارى ارنايى تىككەن كيىز ۇيدەن ءدام تاتىپ, ۇلىستىڭ ۇلى كۇنىمەن قۇتتىقتادى. ال قالباتاۋدا جارمالىق اعايىندار رەسەيلىك قوناققا بوزشۇبار سايگ ۇلىك سىيلاپ, يىعىنا شاپان جاپتى. سونىمەن بىرگە, وسكەمەندە جانكۇيەرلەرىمەن جۇزدەسكەن ا.كارەلين شىعىس قازاقستان مەملەكەتتىك ۋنيۆەرسيتەتىنىڭ قۇرمەتتى پروفەسسورى اتاندى. دۋمان اناش, «ەگەمەن قازاقستان». شىعىس قازاقستان وبلىسى, جارما اۋدانى.