بەيبىتشىلىك جانە كەلىسىم سارايىندا ءدىن ماسەلەسىنە بايلانىستى جيىن ءوتتى

بۇگىن, 19 ناۋرىز كۇنى بەيبىتشىلىك جانە كەلىسىم سارايىندا ەلىمىزدىڭ ءدىن ىستەرى اگەنتتىگى مادەنيەتتەر مەن دىندەردىڭ حالىقارالىق ورتالىعى جانىنداعى بۇقارالىق اقپارات قۇرالدارىندا ءدىني تاقىرىپتى جاريالاۋ بويىنشا ادىستەمەلىك كەڭەستىڭ ۇيىتقى بولۋىمەن جۋرناليستەرگە ارنالعان سەمينار ءوتتى. سەمينار اياسىندا «قازاقستان-2050» ستراتەگياسىنداعى ءدىن سالاسىنا قاتىستى باسىمدىقتاردى باق-تا جاريالاۋ ادىستەرى» تاقىرىبى قوزعالدى. بۇل ءىس-شاراعا ادىستەمەلىك كەڭەس قۇرامىنا كىرەتىن تانىمال ءدىنتانۋشى-عالىمدار, ساراپشىلار, سونداي-اق, ءدىني بىرلەستىكتەر مەن ۇەۇ وكىلدەرى, جۋرناليستەر قاتىستى. سەميناردىڭ تاقىرىبى اياسىندا ءدىنتانۋشىلار كونگرەسىنىڭ توراعاسى عاريفوللا ەسىم, «باس رەداكتورلار كلۋبى» قب پرەزيدەنتى كەنجەبولات ماحمۇت ۇلى, ل.ن. گۋميلەۆ اتىنداعى ەۇۋ ەتنيكالىق جانە ءدىني تولەرانتتىلىق جونىندەگى يۋنەسكو كافەدراسىنىڭ مەڭگەرۋشىسى عادىلبەك شالاحمەتوۆ, «ازىرەت سۇلتان» مەشىتىنىڭ نايب يمامى باقىتجان وتكەلباەۆ, استاناداعى قاسيەتتى-ۋسپەن كافەدرالدىق سوبورىنىڭ پروتويەرەيى دميتري بايدەك, بۇقارالىق اقپارات قۇرالدارىندا ءدىني تاقىرىپتى جاريالاۋ بويىنشا ادىستەمەلىك كەڭەستىڭ توراعاسى ايدار ابۋوۆ ءسوز سويلەدى. وتىرىستا وعان قاتىسۋشىلار قازاقستان پرەزيدەنتىنىڭ «قازاقستان-2050» ستراتەگياسىندا ايتىلعان XXI عاسىرداعى قازاقستانداعى ءدىن, ءداستۇرلى دىندەردىڭ جاس ۇرپاق بويىنداعى رۋحاني قۇندىلىقتاردى قالىپتاستىرۋداعى ءرولى, ءدىني ەكسترەميزم مەن ونىڭ الدىن الۋ جولدارى سىندى ماسەلەلەردى تالقىلادى. بۇل رەتتە, وتاندىق جۋرناليستەردىڭ ءدىن سالاسىنداعى وزەكتى تاقىرىپتاردى قوعامنىڭ ءاربىر مۇشەسىنە تۇسىنىكتى ءارى وبەكتيۆتى تۇردە جاريالاۋ جايى ءسوز بولدى. سەمينار سوڭىندا جۋرناليستەر ادىستەمەلىك كەڭەس مۇشەلەرىنە قوعام نازارىن اۋدارىپ جۇرگەن ماسەلەلەر بويىنشا ءوز ساۋالدارىن قويدى. ءلايلا ەدىلقىزى. دەرەككوز: Egemen.kz. فوتو: ۋvision.kz.