كومىرسۋتەك قورىنىڭ ءوسىمى «قازمۇنايگاز» ۇك اق ەكونوميكالىق كورسەتكىشتەرىنە ەلەۋلى اسەر ەتەدى.
2017 جىلى «قازمۇنايگاز» ۇك اق, «وزەنمۇنايگاز» اق, «قمگ ينجينيرينگ» جشس جانە «اقتاۋ قالاسىنداعى قمگ ينجينيرينگ» فيليالىنىڭ گەولوگتەر توبى وزەن كەن ورنىن جەتە بارلاۋدىڭ ەگجەي-تەگجەيلى باعدارلاماسىنا باستاماشى بولدى. وسى باعدارلاما شەڭبەرىندە 2017-2021 جىلدارى ىشىندە جوعارى كورسەتكىشتى سەيسموبارلاۋ 3D ءتۇسىرىلىمى (368 شارشى شاقىرىم) جۇرگىزىلدى, بارلىق ۇڭعىما قورىنا قايتا تالداۋ جاسالدى (7 500-دەن استام), گەولوگيالىق تۇجىرىمداماسى قايتا قارالدى جانە گەولوگيالىق 3D-ۇلگىسى قايتا قۇراستىرىلدى.
جۇرگىزىلگەن جۇمىستاردىڭ ناتيجەسىندە كەن ورنىنىڭ قۇرىلىمى ناقتىلاندى جانە جاڭا مۇناي شوعىرى تابىلدى. اتقارىلعان جۇمىستاردىڭ قورىتىندىسى بويىنشا وزەن كەن ورنىنىڭ مۇناي قورى 8%-عا ۇلعايدى, بۇل ءوز كەزەگىندە شىعارىلاتىن قوردىڭ 39,9 ملن تونناسىن قۇراپ وتىر.
قازاقستان رەسپۋبليكاسىنىڭ پايدالى قازبالار قورى جونىندەگى مەملەكەتتىك كوميسسياسى كومىرسۋتەكتىڭ ناقتىلانعان كولەمىن 2021 جىلدىڭ سوڭىندا بالانسىنا قابىلدادى.
قازىرگى ۋاقىتتا جاڭا قوردى ەسەپكە الۋ جانە ولاردى ءوندىرۋدى جوسپارلاۋ ماقساتىندا كەن ورىندى يگەرۋ جوباسىنا تۇزەتۋ ەنگىزىلۋدە.
ايتا كەتەلىك, «وزەنمۇنايگاز» اق – «قازمۇنايگاز» ۇك اق-نىڭ 100 پايىز ەنشىلەس كومپانياسى. 2020 جىلى كاسىپورىنعا قازاقستانداعى مۇناي جانە گاز كوندەنساتىن ءوندىرۋ قۇرىلىمىندا 6%-ى تيەسىلى بولدى. كاسىپورىن ماڭعىستاۋ وبلىسىنداعى وزەن جانە قاراماندىباس كەن ورىندارىندا مۇناي جانە گاز كوندەنساتىن وندىرەدى.
وزەن كەن ورنى – قازاقستان رەسپۋبليكاسىندا عانا ەمەس, سونىمەن قاتار الەم بويىنشا بىرەگەي باستاپقى گەولوگيالىق قورى بار ەڭ ءىرى كەن ورىندارىنىڭ ءبىرى. بۇل قۇرىلىمى كۇردەلى كوپقاباتتى كەن ورنى, ونىڭ مۇناي مەن گاز شوعىرلارى يۋرا-بور شوگىندىلەرىنىڭ تەرريگەندىك بولىنىسىندە ورنالاسقان.
