ەل ۇكىمەتىنىڭ 2021 جىلعى 17 قاراشاداعى №820 قاۋلىسىنا سايكەس ساتىپ الۋ قابىلەتىن ساقتاۋ ماقساتىندا بيىلعى 1 قاڭتاردان باستاپ ەڭبەك ەتۋ قابىلەتىنەن ايىرىلعان جاعدايدا (75 130 الۋشى) جانە اسىراۋشىسىنان ايىرىلعان جاعدايدا (52 096 الۋشى) ماسق-تان تولەنەتىن اي سايىنعى الەۋمەتتىك تولەمدەردىڭ مولشەرى 5%-عا ارتتىرىلدى.
بۇل تولەمدەر ۇزاقمەرزىمدى سانالادى, ويتكەنى بىرنەشە جىل بويى تولەنۋى مۇمكىن: ەڭبەك ەتۋ قابىلەتىنەن ايىرىلعان جاعدايدا – ادام ەڭبەككە قابىلەتتىلىگىن قالپىنا كەلتىرمەيىنشە نە زەينەتكەرلىك جاسقا جەتكەنشە; اسىراۋشىسىنان ايىرىلعان جاعدايدا – بالالارعا كامەلەتكە تولعانعا دەيىن جانە كۇندىزگى وقۋ نىسانىنىڭ ستۋدەنتتەرىنە 23 جاسقا دەيىن جۇزەگە اسىرىلادى.
ايتا كەتۋ كەرەك, جوعارىدا اتالعان تولەمدەردى الۋشىلار بيۋدجەت قاراجاتى ەسەبىنەن وسىنداي مەملەكەتتىك الەۋمەتتىك جاردەماقىلاردى دا الادى.
سونداي-اق وسى جىلعى 1 قاڭتاردان باستاپ اەك مولشەرىنىڭ ۇلعايۋىنا بايلانىستى بالا كۇتىمىنە بايلانىستى تابىسىنان ايىرىلعان جاعدايدا, ماسق-تان 1 جاسقا دەيىنگى اي سايىنعى الەۋمەتتىك تولەم مولشەرى ارتتىرىلدى. بۇل شارا 220 462 الۋشىعا اسەر ەتتى.
ەستەرىڭىزگە سالا كەتەيىك, جوعارىدا اتالعان الەۋمەتتىك تولەمنىڭ مولشەرى بالانىڭ تۋعان كۇنىنە دەيىنگى سوڭعى 2 جىلداعى ورتاشا تابىستىڭ 40%-ىن قۇرايدى. بۇل رەتتە بۇل الەۋمەتتىك تولەمنىڭ ەڭ تومەنگى مولشەرى ۇستالۋعا جاتاتىن مىندەتتى زەينەتاقى جارنالارىن قوسىمشا ەسەپتەي وتىرىپ, «بالالى وتباسىلارعا بەرىلەتىن مەملەكەتتىك جاردەماقىلار تۋرالى» زاڭعا سايكەس تۋىلعان بالانىڭ كەزەكتىلىگىنە قاراي بەلگىلەنگەن اي سايىنعى مەملەكەتتىك جاردەماقى مولشەرىنەن كەم بولماۋعا ءتيىس.
جوعارىدا كورسەتىلگەن بارلىق الەۋمەتتىك تولەمدەردىڭ مولشەرىن ارتتىرۋ ماسق اكتيۆتەرى ەسەبىنەن جۇزەگە اسىرىلدى. وسىلايشا, الەۋمەتتىك قامسىزداندىرۋدىڭ قوسىمشا نىسانىن الۋدا جۇمىس ىستەيتىن حالىقتىڭ مۇددەلەرى قورعالدى, دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
