بۇل رەتتە ءبىرىنشى كەزەكتە جاستاردىڭ الەۋەتىنە نازار اۋدارىلعانى بەلگىلى. پرەزيدەنت ايتىپ وتكەندەي, Jas Otan ناقتى جۇمىس ىستەۋ ءۇشىن زور الەۋەتكە يە. ءبىز بۇل مۇمكىندىكتى قالاي پايدالاندىق, ماسەلە سوندا. مەملەكەت باسشىسى ايتىپ وتكەندەي, پارتيانىڭ جاستار قاناتىندا ەلىمىز بويىنشا 100 مىڭنان استام مۇشە بار. بىراق وسىناۋ رەسۋرس لايىقتى دەڭگەيدە پايدالانىلماي وتىر. Jas Otan قاتارىنا قوعامدىق قىزمەتپەن اينالىسۋعا دايىن, جاستار تىڭدايتىن, سىيلايتىن, ولاردىڭ اراسىندا ۇلكەن سەنىمگە يە بولعان كوشباسشىلاردى تارتۋ كەرەك. مەملەكەت باسشىسى ايتىپ وتكەندەي, جاس ازاماتتاردى جۇمىسپەن قامتۋ, ءبىلىم بەرۋ جانە وقىتۋ سالاسىندا بىرقاتار ماڭىزدى جوبا اتقارىلدى. بىراق الەۋمەتتىك ساۋالداما ناتيجەسى جاستاردىڭ بۇل باعدارلامالار جايىندا حابارسىز ەكەنىن كورسەتتى. بۇل جايت ءبىرىنشى كەزەكتە نازار اۋدارۋعا ءتيىس باعىتتىڭ قالتارىستا قالعانىن ايعاقتايدى.
Jas Otan جاستار قاناتىنىڭ مۇمكىندىگىن قاجەتتى تەتىكتەرگە پايدالانۋ ماسەلەسى بۇرىننان ايتىلاتىن. بىراق بۇل ماسەلە كوپ ەلەنە بەرمەي, تاسادا قالىپ قويىپ جاتتى. جاستاردىڭ ەرىك-جىگەرىن دۇرىس باعىتتاماسا, ولاردى وزگەلەردىڭ پايدالانىپ كەتەتىنىن قاڭتارداعى وقيعا اڭعارتتى. جاستاردىڭ الەۋەتىن عانا پايدالانىپ قالۋعا باسىمدىق بەرىلمەي, ولاردىڭ بيزنەسپەن اينالىسۋىنا جاعداي جاساۋ قاجەت. سونىمەن قاتار جاس ازاماتتاردى ەڭبەككە باۋلىپ, شالعاي وڭىرلەردى دامىتۋ سەكىلدى پايدالى جوبالارعا تارتقان ءجون. بۇل ماسەلە Nur Otan پارتياسىنىڭ عانا ەمەس, پرەزيدەنت اكىمشىلىگى ىشكى ساياسات ءبولىمىنىڭ دە نازارىندا تۇرۋى كەرەك.
سەزدە پارتيانىڭ قوعامدىق باقىلاۋ قىزمەتىن السىرەتىپ العانىمىز دا اشىق ايتىلدى. 2010 جىلداردىڭ ورتا شەنىنە دەيىن بۇل قىزمەت Nur Otan پارتياسىنىڭ الەۋەتىن اسىرىپ, حالىقپەن اراداعى بايلانىستى جالعاپ تۇرعان نەگىزگى فاكتورلار بولدى. سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس جۇمىسى دا ناتيجەسىن بەردى. مەملەكەت باسشىسى ايتىپ وتكەندەي, پارتيانىڭ ەل بويىنشا 238 قوعامدىق قابىلداۋ بولمەسى بار. بىراق ولاردىڭ جۇمىسى كورىنە بەرمەيتىنى, ازاماتتاردىڭ بارلىق ءوتىنىشىن باقىلاۋعا الىپ, قاتاڭ قاداعالاپ وتىرۋ ماڭىزدى ەكەنىنە پرەزيدەنت ەرەكشە نازار اۋداردى.
بۇگىنگە دەيىن اۋدان نەمەسە وبلىس باسشىلارى پارتيانىڭ جەرگىلىكتى فيليالدارىن باسقارىپ كەلدى. بۇل فاكتور كەشەگى كسرو كەزىندەگىدەي ورتالىقتاندىرىلعان جۇيەنى ەسكە تۇسىرەدى. باسقاشا ايتقاندا, ءبىر ورتالىقتان باسقارۋعا, ۋىسىندا ۇستاۋعا تىرىساتىن اكىمشىل-ءامىرشىل جۇيەنىڭ كەرى جاڭعىرىعى. سەزد بارىسىندا ايتىلعان ۇسىنىستاردان ۇققانىمىز, الداعى ۋاقىتتاعى وزگەرىستەر بىرنەشە باعىتتى قامتيدى. وبلىس نەمەسە اۋداندىق دەڭگەيدەگى باسشىلارعا پارتيانىڭ ايماقتىق فيليالدارىن باسقارۋعا بەرۋ ماسەلەسى الداعى ۋاقىتتا شەشىمىن تابۋى كەرەك. بۇل ۇسىنىس تا مەملەكەت باسشىسى تاراپىنان ايتىلدى.
قارالاتىن ماسەلە كوپ ەكەنى بەلگىلى. قاڭتارداعى قايعىلى وقيعالار پارتيا مۇشەلەرىنىڭ بەدەلى جوعىن ءارى ەلدىڭ پروبلەمالارىن شەشۋگە ق ۇلىقسىز ەكەنىن كورسەتتى. بۇل جايت پرەزيدەنتتىڭ كەز كەلگەن پارتيا مەن قوزعالىستىڭ قىزمەتىنەن الشاق بولۋدى تالاپ ەتەدى. بۇل ۇسىنىس بيلىك پارتياسىنا عانا ەمەس, قازاقستانداعى بارلىق ساياسي پارتيالارعا دا قاتىستى. «سوندىقتان ءبىراز ۋاقىتتان كەيىن, بالكىم, وسى جىلدىڭ سوڭىنا قاراي مەنىڭ Nur Otan-عا توراعالىق ەتۋىم قانشالىقتى ورىندى ەكەنىن قايتا قاراۋىمىز مۇمكىن», دەدى مەملەكەت باسشىسى. دەمەك بيلىك پارتياسىنىڭ قۇرىلىمى مەن ىقپال ەتۋ دەڭگەيى تۋرالى كوپ وزگەرىستىڭ بەتالىسى الداعى ۋاقىتتا ايقىندالىپ قالادى دەپ ويلايمىن.
اندرەي چەبوتارەۆ,
«التەرناتيۆا» وزەكتى زەرتتەۋلەر ورتالىعىنىڭ ديرەكتورى
