ەلوردادا اباتتاندىرۋ ماۋسىمى باستالىسىمەن جوندەۋ جۇمىستارىنا كىرىسۋ ءۇشىن قازىردىڭ وزىندە قالا تۇرعىندارىمەن كەزدەسۋلەر وتكىزىلۋدە. كەزدەسۋدە ءاربىر ادام الداعى ۋاقىتتا سالىناتىن اۋلالار مەن قوعامدىق كەڭىستىكتەر, ساياباقتار, گۇلزارلار مەن جەلەكجولداردىڭ تۇجىرىمداماسى بويىنشا ءوز يدەيالارى مەن ۇسىنىستارىن ۇسىنا الادى.
جىل باسىنان بەرى اۋداندىق اكىمدىكتەردىڭ بارلىعى ۋربانيستيكا ورتالىعىمەن بىرلەسىپ قالا تۇرعىندارىمەن, ونىڭ ىشىندە ەلدى مەكەندەردىڭ تۇرعىندارىمەن كەزدەسۋلەر وتكىزدى. مىسالى, 19 قاڭتاردا بايقوڭىر اۋدانىنىڭ اكىمى, قالالىق ءماسليحات دەپۋتاتتارى اۋداننىڭ بەلسەندى تۇرعىندارىمەن كەزدەستى, وندا اۋلا اۋماقتارىن اباتتاندىرۋ ماسەلەلەرى قارالدى. 29 قاڭتاردا ايدارلى, قۇسمۇرىن 2, جەتى جول جانە ك.بايسەيىتوۆ كوشەسى 105, 107 تۇرعىندارىمەن اۋلا كەڭىستىكتەرىن اباتتاندىرۋ ماسەلەلەرى تالقىلاندى.
سونىمەن قاتار, bmx, پاركۋر, سكەيتبوردينگ جانە فريستايل سياقتى ەكسترەمالدى سپورت تۇرلەرىنىڭ كاسىبي سپورتشىلارىمەن كەزدەسۋ ءوتتى. وسىلايشا, قالادا ەكستريم-سپورتتى سۇيەتىندەر ءۇشىن تارتىمدى ءۇش ورىن اشۋ جوسپارلانىپ وتىر. سكەيت-پاركتەر قۇرۋ جوبالارى رايدەرلەر مەن سكەيتبوردشىلاردىڭ پىكىرىن ەسكەرە وتىرىپ جۇزەگە اسىرىلادى.
«بۇل كەزدەسۋلەر ءوز تيىمدىلىگىن دالەلدەپ, ءوزارا بايلانىستى جاقسارتۋدا. مىسالى, تۇرعىنداردىڭ قاتىسۋىمەن ازىرلەنەتىن, ەنگىزىلەتىن جانە ىسكە اسىرىلاتىن «حالىقتىق قاتىسۋ بيۋدجەتى» جوباسىن الايىق. جوبا اياسىندا قالا تۇرعىندارى اۋلالار مەن قوعامدىق كەڭىستىكتەردى اباتتاندىرۋ بويىنشا ءوز يدەيالارىن ۇسىنا الادى. «حالىقتىق قاتىسۋ بيۋدجەتى» جوباسى العاش رەت سارىارقا اۋدانىنا ەنگىزىلدى. ءبىز ءىس جۇزىندە جوبانىڭ بار ەكەنىن جانە تۇرعىندار وعان قاتىسۋعا دايىن ەكەنىن كوردىك. وسى سەبەپتى «حالىقتىق قاتىسۋ بيۋدجەتى» جوباسى قالانىڭ باسقا اۋداندارىندا دا ەنگىزىلدى», دەدى قالالىق ۋربانيستيكا ورتالىعىنىڭ باسشىسى ەلنار بازىكەن.
ءاربىر اۋداندا قالا تۇرعىندارى, ۋربانيستيكا ورتالىعىنىڭ جانە اكىمدىك قىزمەتكەرلەرى كىرەتىن جۇمىس توپتارى قۇرىلۋدا. تۇجىرىمدامانى تالقىلاعاننان كەيىن جوبانى ىسكە اسىرۋ قولعا الىنادى. جوبا مەن كونكۋرس تۋرالى تولىق اقپاراتتى اۋداندىق اكىمدىكتەردىڭ رەسمي سايتتارىنان الۋعا بولادى.
ەلوردا اكىمى التاي كولگىنوۆ اتاپ وتكەندەي, شاعىن اۋداندار مەن ەلدى مەكەندەردىڭ تۇرعىندارى كەزدەسۋ بارىسىندا نەگىزىنەن اۋلا اۋماقتارى مەن قوعامدىق كەڭىستىكتى اباتتاندىرۋ ماسەلەسىن قوزعايدى. وسىلايشا, سوڭعى جىلدارى «نۇر-سۇلتان – جايلى قالا» ماستەر-جوسپارى اياسىندا ەلوردادا 500-دەن استام اۋلا مەن قوعامدىق كەڭىستىك (ساياباقتار, گۇلزارلار, جەلەكجولدار) سالىندى جانە اباتتاندىرىلدى. قالانىڭ وڭ جاق بولىگى مەن ەلدى مەكەندەرگە باسا نازار اۋدارىلدى.
مەملەكەت باسشىسى اباتتاندىرۋ جۇمىسىندا «حالىقتىق قاتىسۋ بيۋدجەتىنىڭ» ۇلەسىن ارتتىرۋدى تاپسىردى.
