كەنەپتەگى كەيىپكەر – سۋرەتشى توققوجا قوجاعۇلوۆتىڭ قىزى توميريس. كارتينا دا سولاي اتالادى. پورترەت جانرىندا جازىلعان شىعارما ناتيۋرمورتقا ءتان دەتالدارمەن تولىققان. اۆتوردىڭ كومپوزيتسيانى تۇرلەندىرۋ ءۇشىن ءتۇرلى امالعا بارىپ, مۇقيات زەرتتەۋ-زەردەلەۋ جۇرگىزگەنى بايقالادى. جارىق پەن كولەڭكەنىڭ ءوزارا بايلانىسى دا كوزگە وتتاي باسىلادى.
قىلقالام شەبەرى توميريس وبرازىنىڭ كوپقىرلى ەكەنىن, ونىڭ جان دۇنيەسى تازالىعىن ناقتى اشىپ كورسەتە العان. ياعني كەسكىندەمەنى جازۋ بارىسىندا سۋرەتشى ونى جاقىن ادامى رەتىندە ەلەستەتىپ قانا قويماي, شىعارماسىنىڭ باستى كەيىپكەرى رەتىندە دە تاماشا سومدايدى. بويجەتكەن نازىك ساۋساقتارىمەن كۇزگى المالارعا قول سوزىپ, وزىنە الماقشى بولعانىن بايقايمىز. ۇستەل ۇستىندە تىزبەكتەلگەن وزگە دە المالار ءبىر-بىرىمەن بايلانىسقان تۇتاستاي ناتيۋرمورت سياقتى, ءوزارا اجىرامايتىن كومپونەنت قۇرعان. دەمەك كارتينا جانرلىق جاعىنان دا وزگەشە.
كومپوزيتسيانىڭ نەگىزگى مازمۇنى – ون جەتى جاسار قىزدىڭ ومىرگە دەگەن كوزقاراسى جايىندا. قىز باسىنداعى ادەمى گۇلدەرمەن بەزەندىرىلگەن سارى تەلپەك, ياكي گۇلدەستە ونىڭ ارمانىنىڭ اسقاقتىعىنان حابار بەرىپ تۇرعانداي. سىرت كەلبەتىنە ۇيلەسكەن جاراسىمدى كيىمى, باتىس ۇلگىسىندەگى ويۋ-ورنەكپەن بەزەندىرىلگەن ۇزىن كويلەگى تۇلا بويىنا ۇيلەسىپ تۇر. ونىسى ارۋدىڭ شىنايى ءارى ءموپ-ءمولدىر كوڭىلىنىڭ لايلانباعانىن اڭعارتادى.
كارتينانىڭ سول جاق تومەنگى بولىگىندە ءبىر-بىرىمەن شيەلەنىسكەن تامىرلارى ء«ومىر اعاشى» دەسەك بولاتىنداي. باس-اياعى جوق ۇزىن-سونار كۇرە تامىرلار شەكسىزدىكتىڭ جانە جاستىق شاقتىڭ سيمۆولى ىسپەتتەس ءبىر-بىرىمەن تىعىز بايلانىسقان. مۇندا البىرت سەزىمنىڭ بوياۋى دا بار. ارۋدىڭ الداعى تاعدىرىنىڭ سان تاراۋلى بولاتىنىن بولجاپ تۇرعانداي. سۋرەتشى ەموتسيالى سەزىم قۇبىلىسىن رۋحاني الەمىنە ەنگىزىپ, شەبەر شىعارما جازعان.
