تمككك كىمگە تيەسىلى؟
تەگىن مەديتسينالىق كومەكتىڭ كەپىلدىك بەرىلگەن كولەمى بيۋدجەت قاراجاتىنان تولەنەدى جانە ولار:
- قازاقستان رەسپۋبليكاسىنىڭ ازاماتتارىنا,
- قانداستارعا,
- بوسقىندارعا,
- قازاقستان رەسپۋبليكاسىنىڭ اۋماعىندا تۇراقتى تۇراتىن
(جانە تۇرۋعا ىقتيارحاتى بار) شەتەلدىكتەرگە,
- قازاقستان رەسپۋبليكاسىنىڭ اۋماعىندا تۇراقتى تۇراتىن (جانە تۇرۋعا ىقتيارحاتى بار) ازاماتتىعى جوق ادامدارعا.
قازاقستان رەسپۋبليكاسىندا ۋاقىتشا بولاتىن شەتەلدىكتەر مەن ازاماتتىعى جوق ادامداردىڭ, پانا ىزدەگەن ادامداردىڭ اينالاسىنداعىلارعا قاۋىپ توندىرەتىن اۋرۋلارى بولعان كەزدە تمككك الۋعا قۇقىعى بار.
تمككك پاكەتىنە نە كىرەدى؟
تەگىن مەديتسينالىق كومەكتىڭ كەپىلدىك بەرىلگەن كولەمىنە مىنالار كىرەدى:
- جەدەل جاردەم قىزمەتتەرى, ونىڭ ىشىندە بەلگىلى ءبىر جاعدايلاردا مەديتسينالىق اۆياتسيانى تارتا وتىرىپ (ياعني شۇعىل كومەك قاجەت بولعان جاعدايدا پاتسيەنتكە ونىڭ ساقتاندىرىلعانىنا نەمەسە ساقتاندىرىلماعانىنا قاراماستان كورسەتىلۋگە ءتيىس);
- مەديتسينالىق-سانيتارلىق العاشقى كومەك قىزمەتتەرى (مساك, ياعني بۇل نەگىزىنەن ەمحاناڭىزدىڭ ۋچاسكەلىك قىزمەت دەڭگەيىندە كورسەتىلەتىن نەگىزگى قىزمەتتەر), ونىڭ ىشىندە:
1) ەڭ كوپ تارالعان اۋرۋلاردى دياگنوستيكالاۋ, ەمدەۋ جانە باسقارۋ;
2) حالىقتىڭ نىسانالى توپتارىن (بالالاردى, ەرەسەكتەردى) پروفيلاكتيكالىق تەكسەرۋ;
4) يممۋنداۋ (ۆاكتسينالاۋ);
5) سالاماتتى ءومىر سالتىن قالىپتاستىرۋ جانە ناسيحاتتاۋ;
6) ۇرپاقتى بولۋ دەنساۋلىعىن قورعاۋ جونىندەگى ءىس-شارالار;
7) جۇكتى جانە بوسانعاننان كەيىنگى كەزەڭدەگى ايەلدەردى باقىلاۋ;
8) ينفەكتسيالىق اۋرۋلار وشاقتارىنداعى سانيتارلىق-ەپيدەمياعا قارسى جانە سانيتاريالىق-پروفيلاكتيكالىق ءىس-شارالار.
- امبۋلاتوريالىق جاعدايدا مامانداندىرىلعان مەديتسينالىق كومەك (بۇل ەمحانا دەڭگەيىندە, ونىڭ ىشىندە ەسەپتە تۇرعاندار ءۇشىن جانە شۇعىل جاعدايلار تۋىنداعان كەزدە كورسەتىلەتىن قىزمەتتەر):
1) ايتۆ-ينفەكتسياسىنىڭ جانە تۋبەركۋلەزدىڭ پروفيلاكتيكاسى جانە دياگنوستيكاسى;
2) جاراقاتتار, ۋلانۋلار نەمەسە باسقا دا شۇعىل جاعداي كەزىندەگى قىزمەتتەر, ونىڭ ىشىندە ەلدەگى ەپيدەميالىق جاعدايدىڭ ناشارلاۋىن تۋدىراتىن اۋرۋلار كەزىندەگى جانە ولارعا كۇدىك تۋىنداعان جاعدايلاردا ساقتاندىرىلعان مارتەبەسىنە قاراماستان بارلىق ادام ءۇشىن ءموبيلدى بريگادانىڭ قىزمەتتەرى;
3) الەۋمەتتىك ماڭىزدى اۋرۋلار كەزىندەگى دياگنوستيكا جانە ەمدەۋ;
4) ديناميكالىق باقىلاۋعا جاتاتىن سوزىلمالى اۋرۋلار كەزىندەگى دياگنوستيكا جانە ەمدەۋ.
- ستاتسيوناردى الماستىراتىن جاعدايلاردا مامانداندىرىلعان مەديتسينالىق كومەك (ايتپاقشى, بۇل كوروناۆيرۋسپەن اۋىرعان ناۋقاستاردى ۇيدە ەمدەۋدى دە قامتيدى):
1) الەۋمەتتىك ءمانى بار اۋرۋلاردى ەمدەۋ كەزىندە;
2) ەلدەگى ەپيدەميالىق احۋالدىڭ ناشارلاۋىن تۋدىراتىن اۋرۋلار كەزىندە جانە ولارعا كۇدىك تۋىنداعان جاعدايلاردا ساقتاندىرىلعان مارتەبەسىنە قاراماستان بارلىعى ءۇشىن ۇيدەگى ستاتسيوناردىڭ قىزمەتتەرى;
3) ديناميكالىق باقىلاۋعا جاتاتىن سوزىلمالى اۋرۋلار كەزىندە ەمدەۋ.
- ستاتسيونارلىق جاعدايداعى مامانداندىرىلعان مەديتسينالىق كومەك (پاتسيەنتتەردىڭ بەلگىلى ءبىر ساناتتارى ءۇشىن اۋرۋحانادا ەمدەۋ):
1) اينالاسىنداعىلارعا قاۋىپ توندىرەتىن ينفەكتسيالىق نەمەسە پارازيتتىك اۋرۋمەن اۋىراتىن ناۋقاسپەن قاتىناستا بولعان ادامداردى, سونداي-اق باكتەريا تاسىمالداۋشىلاردى, ۆيرۋس تاسىمالداۋشىلاردى جانە قاۋىپ توندىرەتىن ينفەكتسيالىق نەمەسە پارازيتتىك اۋرۋعا كۇدىكتى ادامداردى وقشاۋلاۋ كەزىندە;
2) ينفەكتسيالىق, پارازيتتىك اۋرۋلاردى جانە اينالاسىنداعىلارعا قاۋىپ توندىرەتىن اۋرۋلاردى ەمدەۋ كەزىندە;
3) ساقتاندىرىلۋ مارتەبەسىنە قاراماستان ادامدارعا شۇعىل كومەك كورسەتۋ, ونىڭ ىشىندە تاۋلىك بويى ستاتسيوناردىڭ قابىلداۋ بولىمشەسىندە ەمدەۋ-دياگنوستيكالىق ءىس-شارالار وتكىزۋ;
4) جوسپارلى تارتىپتە.
- مەديتسينالىق وڭالتۋ:
1) نەگىزگى اۋرۋدى ەمدەۋدە;
2) تۋبەركۋلەزبەن اۋىراتىن ناۋقاستار ءۇشىن.
- ءپاللياتيۆتى مەديتسينالىق كومەك;
- مامانداندىرىلعان مەديتسينالىق كومەك كورسەتۋ كەزىندە مەديتسينالىق كورسەتىلىمدەر بولعان كەزدە قان پرەپاراتتارىمەن جانە ونىڭ كومپونەنتتەرىمەن قامتاماسىز ەتۋ;
- امبۋلاتوريالىق, ستاتسيوناردى الماستىراتىن جانە ستاتسيونارلىق جاعدايلاردا مامانداندىرىلعان مەديتسينالىق كومەك كورسەتۋ كەزىندەگى پاتولوگيالىق-اناتوميالىق دياگنوستيكا;
- قازاقستاندىقتاردى شەتەلگە ەمدەلۋگە جىبەرۋ جانە (نەمەسە) وتاندىق مەديتسينالىق ۇيىمداردا ەمدەلۋ ءۇشىن شەتەلدىك مامانداردى تارتۋ;
- دارىلىك زاتتارمەن, مەديتسينالىق بۇيىمدارمەن, مامانداندىرىلعان ەمدىك ونىمدەرمەن, يممۋندىق-بيولوگيالىق دارىلىك پرەپاراتتارمەن قامتاماسىز ەتۋ. (الەۋمەتتىك ماڭىزى بار, سوزىلمالى اۋرۋلارى بار ديناميكالىق ەسەپتە تۇرعان ادامدار ءۇشىن قاراستىرىلعان. بۇگىندە امبۋلاتوريالىق دەڭگەيدە تمككك شەڭبەرىندە دارىلىك زاتتار مەن مەديتسينالىق بۇيىمداردىڭ 347 اتاۋى بويىنشا 49 نوزولوگيا قامتاماسىز ەتىلەدى. تىزبە دەنساۋلىق ساقتاۋ ءمينيسترىنىڭ № 75 بۇيرىعىمەن بەكىتىلگەن).
اتالعان بارلىق جاعدايدا ساقتاندىرىلماعان ازاماتتار مەملەكەت كەپىلدىك بەرگەن تەگىن مەديتسينالىق كومەك كولەمى شەڭبەرىندە ولارعا كورسەتىلەتىن قاجەتتى كومەككە سەنە الادى.
«ەگەر سىزگە شۇعىل كومەك قاجەت بولسا, الايدا سىزگە ءمامس-دە ساقتاندىرىلۋ مارتەبەسىنىڭ جوقتىعىنا سىلتەمە جاساي وتىرىپ, شۇعىل كومەك كورسەتۋدەن باس تارتىلسا, دارىگەرگە پاتسيەنتتىڭ ءوز قۇقىقتارى تۋرالى مالىمدەۋ جانە ولاردىڭ ساقتالۋىن تالاپ ەتۋ قاجەت. قورعا وسىنداي وتىنىشتەر ءجيى كەلىپ تۇرادى, سوندىقتان ازاماتتاردى ءوز قۇقىقتارىن بىلۋگە شاقىرامىز», دەپ ءتۇسىندىردى امسق باسقارما توراعاسىنىڭ ورىنباسارى ءىلياس مۇحامەدجان.
ەگەر ءمامس ءۇشىن جارنالار تولەمەسە, پاتسيەنتتەر ءتىپتى ەمحاناعا جۇگىنبەيتىن دە فاكتىلەر بار. ەستەرىڭىزگە سالا كەتەيىك, جوعارىدا اتالعان جاعدايلار بويىنشا تەگىن كومەكتەن سىزگە باس تارتپاۋ كەرەك.
سونىمەن بىرگە قور مەديتسينالىق قىزمەتتەردىڭ كەڭ ءتىزىمىن پايدالانۋ ءۇشىن ءمامس جۇيەسىنىڭ قاتىسۋشىسى بولۋدى ۇسىنادى. اتاپ ايتقاندا, بۇل – تار بەيىندى مامانداردىڭ كونسۋلتاتسيالارى, دياگنوستيكالىق زەرتتەۋلەر, جوسپارلى وپەراتسيالار, سونىڭ ىشىندە قىمبات تۇراتىن وپەراتسيالار.
ايتا كەتەلىك, قوسىمشا سۇراقتار تۋىنداعان جاعدايدا ولاردى ەمحانانىڭ انىقتاما قىزمەتىنە قويۋعا نەمەسە جاعدايدى شەشۋ ءۇشىن پاتسيەنتتەردى قولداۋ قىزمەتىنە حابارلاسۋعا بولادى. ەگەر سول جەردە تۇسىنىستىككە قول جەتكىزۋ مۇمكىن بولماسا, ءسىز ءۇشىن ىڭعايلى بايلانىس ارناسى بويىنشا الەۋمەتتىك مەديتسينالىق ساقتاندىرۋ قورىنا حابارلاسۋ كەرەك: fms.kz رەسمي سايتى, 1406 بايلانىس ورتالىعى, Qoldau 24/7 ءموبيلدى قوسىمشاسى جانە Telegram-داعى SaqtandyryBot.
