قازاقستان • 01 اقپان، 2022

قازاقستاندا قۇرىلىس ساپاسىن باقىلاۋ كۇشەيتىلەدى

قولدانىستاعى زاڭناماعا سايكەس مەملەكەتتىك ساۋلەت-قۇرىلىس باقىلاۋ ورگاندارى قۇرىلىس ساپاسىن شاعىمسىز تەكسەرە المايدى، دەپ حابارلايدى Egemen.kz.

بوتاكوز باقبەرگەن

قازىرگى ۋاقىتتا ەلىمىزدە قۇرىلىس سالاسىندا باقىلاۋ ءالسىز بولعاندىقتان، كەيبىر وبەكتىلەردىڭ كەمشىلىكتەرى بايقالادى.

مەملەكەتتىك باقىلاۋدى كۇشەيتۋ ءۇشىن كەلەسى شۇعىل شارالاردى قامتيتىن زاڭ جوباسى ازىرلەندى:

اۋماقتا قۇرىلىستى ساپاسىز جوسپارلاۋدى بولدىرماۋ ءۇشىن قالا قۇرىلىسى ساراپتاماسىن ەنگىزۋ;
قۇرىلىستىڭ بارلىق كەزەڭىندە (قازانشۇڭقىر قازۋدان باستاپ اباتتاندىرۋ جۇمىستارىنا دەيىن) وبەكتىلەرگە جوسپارلى باقىلاۋ ەنگىزۋ جانە مەملەكەتتىك ساۋلەت-قۇرىلىس باقىلاۋ ورگاندارىنىڭ وبەكتىلەردى پايدالانۋعا قابىلداۋعا قاتىسۋى;
پايدالانىلاتىن ماتەريالدار مەن ورىندالعان جۇمىستاردىڭ ساپاسىنا زەرتحانالىق جانە تەحنيكالىق تەكسەرۋ جۇرگىزۋ ءۇشىن تاۋەلسىز مەملەكەتتىك زەرتحانالىق قىزمەت قۇرۋ.

مەملەكەت باسشىسى 2021 جىلعى جولداۋىندا قالالاردى كەشەندى سالۋدىڭ جاڭا ستاندارتتارىن ازىرلەۋ قاجەتتىگى جونىندە ايتقان بولاتىن. وسىعان بايلانىستى مينيسترلىك قالا اۋماعىن ساپالى جوسپارلاۋ ستاندارتتارىنىڭ ءبىرىنشى رەداكتسياسىن ازىرلەپ، مەملەكەتتىك ورگاندار مەن ۇيىمدارعا كەلىسۋگە جىبەردى.

ستاندارتتار تارتىمدى جانە ىڭعايلى قوعامدىق كەڭىستىك قالىپتاستىرادى دەپ كۇتىلۋدە. جاياۋ جۇرگىنشىلەر مەن ۆەلوسيپەد ينفراقۇرىلىمىن دامىتۋدى ەسكەرە وتىرىپ، جيناقى قۇرىلىستى جوبالاۋدىڭ قاراپايىم جانە كورنەكى قۇرالى بولادى.

جاڭا ستاندارتتاردى بيىلعى ماۋسىم ايىندا بەكىتۋ جوسپارلانعان. وندا قالا اۋماقتارىن كەشەندى دامىتۋ پرينتسيپتەرى، قالا اۋماقتارىن دامىتۋ ستاندارتى، قالالاردىڭ كەلبەتىن قالىپتاستىرۋ ستاندارتى، بوس اۋماقتاردى يگەرۋ ستاندارتى، جوبالاردى ازىرلەۋ جانە ىسكە اسىرۋ جونىندەگى نۇسقاما قامتىلادى.

وسى ستاندارتتاردى ەسكەرە وتىرىپ، اكىمدىكتەر ءارتۇرلى كوزدەردەن قارجىلاندىرىلاتىن ورام/اۋدان ارالىق جوسپارلاردى ازىرلەپ، بەكىتۋى ءتيىس. ينجەنەرلىك ينفراقۇرىلىمدى، تۇرعىن ءۇي قورىن كەزەڭ-كەزەڭمەن رەكونسترۋكتسيالاۋدىڭ كەشەندى ءتاسىلىن ازىرلەۋى قاجەت.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز