ىنتىماقتاستىق نىعايا تۇسەدى

ەكى ەل اراسىنداعى رەسمي بايلانىس 1992 جىلى 28 قاڭتاردا ورنادى. «كورەيا قازاقستان تاۋەلسىزدىك العاننان كەيىن كەلەسى جىلى، ياعني 1992 جىلدىڭ قاڭتا­رىندا ديپلوماتيالىق قاتىناستار ورناتقان العاشقى ەلدەردىڭ ءبىرى بولدى. سودان بەرى كورەيا مەن قازاقستان ارقاشان جاقىن دوس جانە سەنىمدى سەرىكتەس بولىپ كەلەدى. سونداي-اق ەكى ەلدىڭ كوشباسشىلارى اراسىندا قاتىناس جالعاسىپ، ءتۇرلى جەتىستىكتەرگە قول جەتكىزدى»، دەدى ەلشى.

ديپلوماتيالىق ميسسيا وكىلىنىڭ ايتۋىنشا، قازاق­ستان كورەيا ۇكىمەتىنىڭ ىسكە اسىرىپ جاتقان ەكونوميكالىق ىنتىماقتاستىق باستاماسى – «جاڭا سولتۇستىك ساياساتىنىڭ» نەگىزگى سەرىكتەسى.

بۇگىندە ورتالىق ازيا ەلدەرى اراسىندا قازاقستان – كورەيامەن ساۋدا جاساۋ جانە ينۆەستيتسيا قۇيۋ كولەمى بويىنشا جەتەكشى ەل، ال قازاقستان ءۇشىن كورەيا كولەمى جاعىنان ءتورتىنشى ساۋدا سەرىكتەسى. پاندەميانىڭ سالدارىنان تۋىنداعان قيىندىقتارعا قاراماستان، ەكى ەل اراسىنداعى ساۋدا كولەمى جوعارى دەڭگەيدە ساقتالىپ تۇر.

«قازاقستان جولدارىندا كورەيادا جاسالعان كوپتەگەن اۆتوكولىكتەردى كورۋگە بولادى، كورەيادا وندىرىلگەن سمارت­فوندار مەن تۇرمىستىق تەحنيكا ءاربىر ۇيدەن، ءار­بىر وقۋ ورنىنان تابىلادى. سوڭعى ۋاقىتتا كورەيالىق كوم­پانيالار تسيفرلى يندۋستريا، دەنساۋلىق ساقتاۋ جانە بولاشاقتاعى اۋىل شارۋاشىلىعى سياقتى جاڭا سالالارداعى ىنتىماقتاستىقتى ارتاراپتاندىرۋعا تىرىسىپ كەلەدى. اتاپ ايتقاندا، ەكى ەل اراسىنداعى كومىرتەگى بەيتاراپتىلىعى مەن جاڭارتىلاتىن ەنەرگەتيكا سالاسىندا ستراتەگيالىق ىنتىماقتاستىق ورناتۋ ءۇشىن ۇلكەن الەۋەتىمىز بار دەپ ەسەپتەيمىن.

تاۋەلسىزدىك العان ساتتە كولەمى بويىنشا الەمدەگى ءتورتىنشى يادرولىق دەرجاۆا مارتەبەسىنەن باس تارتۋ جونىندە باتىل شەشىم قابىلداعان قازاقستان – يادرولىق قارۋسىزدانۋ مەن دەنۋكلەاريزاتسيانى بەلسەندى قولدايتىن حالىقارالىق قوعامداستىقتىڭ جاۋاپتى مۇشەسى. مەنىڭ ويىمشا، قازاقستاننىڭ بەيبىتشىلىك پەن الەمنىڭ بىرلەسىپ وركەندەۋى ءۇشىن يادرولىق ارسەنالدان باس تارتۋ تۋرالى شەشىمى ورتالىق ازيانىڭ تۇراقتىلىعى مەن وركەندەۋىندە ماڭىزدى ءرول اتقارادى، سونداي-اق قازاقستاننىڭ حالىقارالىق قوعامداستىقتاعى مارتەبەسىن نىعايتا ءتۇستى. يادرولىق قارۋسىزدانۋ تۋرالى شەشىم قابىلداعان قازاقستاننىڭ ۇلگىسى كورەيا تۇبەگىندە بەيبىتشىلىك ورناتۋعا جاقسى ۇلگى بولادى دەپ سانايمىن. سونداي-اق مەن كورەيا رەسپۋبليكاسى ۇكىمەتىنىڭ كورەي تۇبەگىندەگى بەيبىتشىلىك پروتسەسىن ىلگەرىلەتۋ جونىندەگى كۇش-جىگەرىنە مىزعىماس قولداۋ كورسەتكەنى ءۇشىن قازاقستان ۇكىمەتىنە ريزاشىلىعىمدى بىلدىرگىم كەلەدى»، دەدى ەلشى قۇتتىقتاۋ سوزىندە.

ە.پ.كۋ حونگ-سوك قازاقستانداعى ەلشى قىزمەتىنە 2020 جىلعى ماۋسىمدا كىرىسكەن. «قازاقستاندىقتاردىڭ كورەياعا دەگەن ۇلكەن قىزىعۋشىلىعىنا قۋانىپ، تاڭ قالعانىم ءالى كۇنگە دەيىن ەسىمدە. سونىمەن قاتار قازاق مادەنيەتىنىڭ كورەي مادەنيەتىمەن ۇقساستىعى تاڭىرقاتتى. مىسالى، قوناقجايلىلىق، ۇلكەندەرگە قۇرمەت كورسەتۋ، ءبىر-بىرىنە سىيلاستىقپەن قاراۋ سياقتى داستۇرلەر ماعان ەرەكشە ىستىق. اسىرەسە، 2014 جىلى ەكى ەل اراسىنداعى ۆيزانى الىپ تاستاۋ تۋرالى كەلىسىم كۇشىنە ەنگەننەن بەرى ازاماتتار اراسىنداعى مادەني جانە ەموتسيونالدى ۇقساستىقتارعا نەگىزدەلگەن ءوزارا الماسۋ تۇراقتى تۇردە كەڭەيە باستادى. سوڭعى ۋاقىتتا پاندەمياعا بايلانىستى ساياحاتتار ۋاقىتشا قىسقارعانىنا قاراماستان، جاقىن ارادا ازاماتتار اراسىنداعى بايلانىس قايتا جاندانادى دەپ سەنەمىن.

كورەيا مەن قازاقستان اراسىنداعى قارىم-قاتىناس­تاردىڭ، اسىرەسە ورتاق بايلانىستىرۋشى بۋىن – كورەي دياسپوراسىنىڭ ارقاسىندا ودان ءارى دامۋىنا الەۋەتى جەتەدى دەپ سانايمىن. قازىرگى ۋاقىتتا قازاقستاندا تۇ­را­تىن 108 مىڭعا جۋىق ەتنوستىق كورەيلەر رەسەيدىڭ قيىر شىعىسىنان كۇشتەپ دەپورتاتسياعا ۇشىراعان كورەيلەردىڭ ۇرپاقتارى. ەتنوستىق ازشىلىقتاردىڭ قانداي دا ءبىر كەمسىتۋسىز دامۋىنا جانە تابىسقا جەتۋىنە ەرەكشە كوڭىل ءبولىنىپ، قولداۋ كورسەتىلەتىن قازاقستان ۇكىمەتى جۇرگىزىپ وتىرعان ۇلتارالىق كەلىسىم ساياساتىنىڭ ناتيجەسىندە كورەي دياسپوراسىنىڭ وكىلدەرى بۇگىندە ماڭىزدى ءرول اتقارادى جانە قازاقستاندىق قوعام ومىرىنە بەلسەندى قاتىسادى»، دەپ تۇيىندەدى ءسوزىن كورەيالىق ديپلومات.