ۋنيۆەرسيتەت مۇنداي ءبىلىم گرانتىن وقۋشىنىڭ ءبىلىم سالاسىنداعى جەتىستىكتەرى مەن ەرەكشە داعدىلارى ءۇشىن بەرگەن. بەيبارىس اتالعان جوعارى وقۋ ورنىندا ەلەكتر جانە كومپيۋتەر ينجەنەرياسى سالاسى بويىنشا ماماندانا الادى.
– بەيبارىسقا بۇل ۋنيۆەرسيتەتتە اعىلشىن تىلىندە ءبىلىم الۋ مۇمكىندىگى بەرىلدى. تەك نەمىس تىلىندە بەرىلەتىن ءبىلىم گرانتتارىنىڭ قاسىندا بۇل ۇلكەن جەتىستىك دەپ سانايمىز. بولاشاعىنان ءۇمىت كۇتتىرەتىن زياتكەردىڭ كورسەتكىشتەرى وتە جوعارى. ماسەلەن, اعىلشىن ءتىلىنىڭ حالىقارالىق ەمتيحانى IELTS-قا وزدىگىنەن دايىندالىپ, 7,5 بالل جينادى, – دەيدى مەكتەپتەگى كاسىبي باعدار جونىندەگى كەڭەسشى اسەل يسماحانبەتوۆا.
بەيبارىس ورىنباسار – اقتاۋداعى زياتكەرلىك مەكتەپتەگى ۇزدىك وقۋشىلاردىڭ ءبىرى. بىرنەشە حالىقارالىق ءپان وليمپيادالارىنىڭ جۇلدەگەرى. سونىمەن قاتار جەڭىل اتلەتيكادان دا ۇزدىك ناتيجەلەر كورسەتىپ كەلەدى.
– ۋنيۆەرسيتەتكە قۇجات تاپسىرۋ ءۇشىن ەڭ الدىمەن حالىقارالىق دەڭگەيدە قاجەتتى ەمتيحانداردى تاپسىرىپ, جوعارى بالل جيناۋعا جۇمىستاندىم. بۇل تۇرعىدا ۇستازدارىمنىڭ كومەگى شەكسىز. سونداي-اق ۋنيۆەرسيتەتتە وقۋعا لايىقتى ستۋدەنت ەكەنىڭدى دالەلدەيتىن موتيۆاتسيالىق حات, ەسسەلەردى اعىلشىن تىلىندە جازىپ تاپسىردىم. مەنىڭ ويىمشا, گرانت تاعايىنداۋ ماسەلەسىندە بۇعان دەيىنگى وليمپيادا مەن جارىستارداعى جەتىستىكتەرىم شەشۋشى ءرول وينادى دەپ ويلايمىن, – دەيدى بەيبارىس.
زياتكەر ءالى دە جوعارى وقۋ ورىندارىندا باعىن سىناپ كورمەك. سول ءۇشىن دە قىزۋ دايىندىق ۇستىندە.
ماڭعىستاۋ وبلىسى
