بۇگىن, 14 ناۋرىز كۇنى قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ستۋدەنتتەر سارايىندا قازاقستاننىڭ ەڭبەك ەرى ابزال ەراليەۆپەن كەزدەسۋ ءوتتى. بۇل تۋرالى ۋنيۆەرستيتەت ءباسپاسوز قىزمەتى حابارلادى.
جيىنعا ابزال ەراليەۆتىڭ مەكتەپتەگى, ستۋدەنت شاقتاعى ۇستازدارى, دوستارى, وقۋ ورنىنىڭ پروفەسسور-وقىتۋشىلارى جانە ستۋدەنت-جاستار قاتىستى. كەزدەسۋدى اشقان ۋنيۆەرسيتەت رەكتورى, تەحنيكا عىلىمدارىنىڭ دوكتورى, پروفەسسور قىلىشباي بيسەنوۆ «اق كۇرىشتىڭ اتاسى» اتانعان سىر ءوڭىرى ەلىمىزدىڭ الەۋمەتتىك-ەكونوميكالىق دامۋى مەن وركەندەۋىندە وزىندىك ورنى بار ولكە ەكەنىن اتاپ ءوتتى.
رەكتور ءوز سوزىندە: «تۋعان اۋىلىڭىزدى تۇلەتۋگە, حالىقتىڭ الەۋمەتتىك, تۇرمىستىق جاعدايىن تۇزەتۋگە, اۋىل جاستارىنىڭ ءبىلىم الۋىنا, كاسىبي شىڭدالۋىنا ءسىزدىڭ قوسىپ كەلە جاتقان ۇلەسىڭىز قوماقتى. ءسىز ازاماتتىق-كاسىپكەرلىك ۇستانىمىڭىزدا ىزگىلىكتى جوعارى قويا ءبىلدىڭىز. ۋنيۆەرسيتەت ۇجىمى وزىڭىزدەي تۇلەگىن ءاردايىم ماقتانىش تۇتادى», - دەدى.
ابزال ەراليەۆ 1977-1982 جىلدارى سول كەزدەگى جامبىل گيدرومەليوراتيۆتىك قۇرىلىس ينستيتۋتىندا (قازىرگى قورقىت اتا اتىنداعى قىزىلوردا مەملەكەتتىك ۋنيۆەرسيتەتى) ءبىلىم العان. مەكتەپ قابىرعاسىندا ءوزىنىڭ ۇلگىلى ءتارتىبى مەن ۇزدىك ۇلگىرىمىمەن كوپكە ۇلگى بولا بىلگەن ازامات ستۋدەنتتىك شاقتا دا وسى ۇردىسىنەن تانبادى. ءاردايىم توپ باستاپ, زامانداستارىنىڭ كوشباسشىسى بولدى. وسىنداي ساپالى ءبىلىم مەن سانالى تاربيەنىڭ ناتيجەسىندە ابزال ەراليەۆ العاش ءۇي-قۇرىلىس كومبيناتىندا پروراب, قۇرىلىس ۋچاسكەسىنىڭ باستىعى قىزمەتتەرىن اتقاردى. 1994 جىلدان باستاپ «ابزال جانە كومپانيا» تولىق سەرىكتەستىگىنىڭ ىرگەسىن قالاپ, ونى ءىرى شارۋاشىلىققا اينالدىردى.
«الدىمەن 500 گەكتار جەرگە كۇرىش ەكتىك. ناتيجەسى جامان بولمادى. كەيىن باستاعان ءىستىڭ اۋقىمىن كەڭەيتتىك. قازىر جىل سايىن 5500 گەكتار جەرگە كۇرىش ەگىپ, ءونىم جيناپ وتىرمىز. بيىل كومپانياعا 20 جىل تولىپ وتىر. وسى ارالىقتا كوپتەگەن تابىستارعا قول جەتكىزدىك. مۇنىڭ بارلىعى شارۋاشىلىق قىزمەتكەرلەرىنىڭ تىنىمسىز ەڭبەگىنىڭ ناتيجەسى», - دەدى ابزال جۇماش ۇلى كەزدەسۋدە.
قازىر ەڭبەك ەرىنىڭ تۋعان جەرى كەڭەس وداعىنىڭ باتىرى ن.ءىلياسوۆ اتىنداعى ەلدى مەكەن «ءححى عاسىر اۋىلى» اتانعان. اۋىل حالقى زامان تالابىنا ساي جارىق شامدار, سۋبۇرقاقتار, تەگىس جولدار, مادەني-كوپشىلىك نىسانداردىڭ يگىلىگىن كورىپ وتىر. سونىمەن بىرگە, بيىل اۋىلدا ۇلكەن ستاديون سالىنباق. مۇنىڭ بارلىعى ەر ازاماتتىڭ تۋعان توپىراققا دەگەن قۇرمەتىنىڭ ناتيجەسىندە جۇزەگە اسىپ جاتقانى ءسوزسىز. ءبىر قىزىعى, بۇل اۋىلدى كەزىندە تاپ وسى ابزال جۇماش ۇلى سەكىلدى ەر ەڭبەكتىڭ تاعى ءبىر مايتالمان مامانى – قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ قازىرگى رەكتورى قىلىشباي بيسەنوۆتىڭ اكەسى, سوتسياليستىك ەڭبەك ەرى الدابەرگەن بيسەنوۆ تە ۇزاق جىلدار بويى باسقارىپ, سوۆحوزدى وبلىستاعى كۇرىشتەن 100 مىڭ تسەنتنەردەن استام ءونىم بەرەتىن ساناۋلى شارۋاشىلىقتاردىڭ قاتارىنا قوسىپ كەتىپ ەدى.
كەزدەسۋ بارىسىندا جاستار ەڭبەك ەرىنە دەگەن كوكەيلەرىندە جۇرگەن ءتۇرلى ساۋالدارىن جولدادى. ابزال جۇماش ۇلىنىڭ وتباسى جاعدايى, الداعى جوسپارلارى, قازىرگى جاستارعا دەگەن كوزقاراسى سىندى ساۋالدار ستۋدەنتتەردىڭ قىزىعۋشىلىعىن تۋدىردى. ابزال ەراليەۆ جاستاردىڭ بارلىق سۇراقتارىنا مۇدىرمەي جاۋاپ بەردى.
كەزدەسۋ بارىسىندا قازاقستاننىڭ ەڭبەك ەرى ابزال ەراليەۆكە ۋنيۆەرسيتەتتىڭ عىلىمي كەڭەسىنىڭ شەشىمىمەن «قورقىت اتا اتىنداعى قىزىلوردا مەملەكەتتىك ۋنيۆەرسيتەتى بيزنەس اكىمشىلىگىنىڭ قۇرمەتتى دوكتورى» اتاعى بەرىلدى.
ءاردايىم سىر حالقىمەن جانى, بولمىسى ءبىر ازاماتپەن كەزدەسۋ وسىلايشا ستۋدەنتتەرگە ۇلكەن اسەر قالدىردى. ەڭبەك ەرىنىڭ جاستارعا ايتقان ءاربىر ءسوزى ومىرلىك ۇلگى-ونەگە بولارى ءسوزسىز.
مۇرات ايتقوجا.
دەرەككوز: قىزىلوردا مەملەكەتتىك ۋنيۆەرسيتەتىنىڭ ءباسپاسوز قىزمەتى.
فوتو: قىزىلوردا مەملەكەتتىك ۋنيۆەرسيتەتىنىڭ ءباسپاسوز قىزمەتى.
