ايگۇل مۇكەي جاڭا قىزمەتكە تاعايىندالدى

جاقىندا تاراتىلعان «ەل ارنا» تەلەكومپانياسىنىڭ ديرەكتورى ايگۇل مۇكەي «استانا ەكسپو-2017» ۇلتتىق كومپانياسى» اكتسيونەرلىك قوعامى ءباسپاسوز قىزمەتىنىڭ جەتەكشىسى بولىپ تاعايىندالدى. بۇل تۋرالى ول ءوزىنىڭ فەيسبۋكتەگى پاراقشاسىندا حابارلادى. «مەن ەندى «استانا ەكسپو-2017» ءباسپاسوز قىزمەتىنىڭ جەتەكشىسىمىن. ءدال سول ۇيىمعا سىزدەردىڭ كوپ ساۋالدارىڭىز بار, دوستار. بىرگە پىسىقتايتىن بولامىز, قاتتى سىناي كورمەڭىزدەر, سونىمەن قاتار سىپايىلىق پەن ادەپتىلىك ساقتايىق», - دەپ جازدى ول. ەسكە سالا كەتەيىك, ايگۇل مۇكەي بۇنىڭ الدىندا «ەل ارنا» تەلەارناسىنىڭ ديرەكتورى قىزمەتىن اتقاردى. ارنانىڭ جابىلاتىنىن پارلامەنت ءماجىلىسىنىڭ وتىرىسىندا «2014-2016 جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ حابارلاعان بولاتىن. تاعى ءبىر توقتالا كەتەتىن جايت, بيۋدجەت جوباسىن تالقىلاۋ بارىسىندا دەپۋتاتتار مينيستردەن «ەل ارنا» تەلەارناسىنىڭ جۇمىسى توقتاتىلۋ سەبەپتەرىن ءتۇسىندىرۋدى سۇراعان بولاتىن. بۇعان جاۋاپ بەرگەن ە.دوساەۆ سوندا: «ءبىز جىل سايىن «ەل ارنا» تەلەارناسىنا 2 ملرد. تەڭگە ءبولىپ كەلدىك. الايدا, رەيتينگ بويىنشا وسى ارنا 300 ملن. تەڭگەنىڭ عانا قايتارىمىن جاساي الادى, بۇل - بىرىنشىدەن. ەكىنشىدەن, مەملەكەت باسشىسىنىڭ ۇكىمەتكە بىلتىرعى جىلدىڭ قازان ايىنداعى كەڭەيتىلگەن وتىرىسىندا بەرگەن تاپسىرمالارى بار. وندا پرەزيدەنت كونتەنت بويىنشا سۇرانىسقا يە تەلەارنالاردى عانا قولداۋدى جالعاستىرۋدى جۇكتەگەن بولاتىن. ال «ەل ارنا» كونتەنتى, وزدەرىڭىز بىلەتىندەي, جارتىلاي ساتىپ الىنعان, اۋدارىلعان حابارلاردان قۇرالادى, ال ءوزىنىڭ جاساپ وتىرعان كونتەنتى جەتكىلىكسىز», - دەگەندى ايتتى. ونىڭ ايتۋىنا قاراعاندا, ەندى «ەل ارناعا» ءبولىنىپ كەلگەن 2 ملرد. تەڭگەنىڭ تەڭ جارتىسى, ياعني 1 ملرد. تەڭگەسى «24.kz» تەلەارناسىنىڭ ايماقتىق تىلشىلەر قوسىنىن كەڭەيتۋگە بولىنبەكشى. بۇدان بولەك, 992 ملن. تەڭگە سوماسىنداعى بيۋدجەت قاراجاتىن جاڭا فيلمدەر تۇسىرۋگە جۇمساۋ قاراستىرىلىپ وتىر. مۇرات ايتقوجا. دەرەككوز: Nur.kz.