يرلانديانىڭ استاناسى – ءدۋبليننىڭ ءدال ىرگەسىندە ورنالاسقان كراملين قالاسىندا تۋىپ-وسكەن كونور قارا جۇمىسقا ەرتە جەگىلدى. ءوزىنىڭ ەڭبەك جولىن سانتەحنيك بولىپ باستاعان ول 20 جاستان اسقان شاعىندا ارالاس جەكپە-جەككە دەن قويدى. ءوزىنىڭ تاباندىلىعى مەن جانكەشتىلىگىنىڭ ارقاسىندا ەلەۋلى تابىستارعا قول جەتكىزدى. ارادا بەس جىل وتكەن سوڭ الەمدەگى ەڭ بەلدى ۇيىم – UFC ماماندارىنىڭ نازارىنا ىلىكتى. امەريكاعا كەلگەن بەتتە ماكگرەگور قاتارىنان جەتى جەكپە-جەكتە جەڭىسكە جەتىپ, جارتىلاي جەڭىل سالماقتا چەمپيوندىق بەلبەۋدى يەلەندى. ودان تاياق جەگەندەر اراسىندا ماركۋس بريمەيدج, ماكس حوللوۋەي, ديگەۋ براندان, داستين پورە, دەننيس زيفەر, چەد مەندەس جانە جوزە الدۋ سىندى ساڭلاقتار بولدى. جوعارىدا اتاپ وتكەن جەتى كەزدەسۋدىڭ التاۋىن كونوردىڭ مەرزىمىنەن بۇرىن اياقتاعانىن دا ايتا كەتكەنىمىز ابزال.
كەلتتەر ەلىنەن كەلگەن جىگىتتىڭ ونەرى بىردەن جانكۇيەرلەردىڭ كوڭىلىنەن شىقتى. ول وزىنە عانا ءتان ستيلىمەن كوزگە ءتۇستى. ءجۇرىس-تۇرىسى بولەك, ءوز-ءوزىن ۇستاۋ مانەرى وزگەشە, سوزگە شەشەن سپورتشى ءار جەكپە-جەكتى شوۋعا اينالدىرا ءبىلدى. ونىڭ قاتىسۋىمەن وتكەن ءباسپاسوز ءماسليحاتى نەمەسە كوز ءتۇيىستىرۋ ءراسىمى ءار كەز داۋ-دامايمەن اياقتالاتىن. جانجال شىعىپ, ارتى توبەلەسكە ۇلاسقان كەزدەر دە از ەمەس. ال جەكپە-جەك دەسە دەلەبەسى قوزىپ, قانى قىز-قىز قاينايتىن كورەرمەندەرگە دە كەرەگى سول. ءبىر سوزبەن ايتساق, ول ارالاس جەكپە-جەك ونەرىن جاڭا دەڭگەيگە كوتەردى.
ءبىر قىزىعى, بىلتىر 33 جاستاعى ماكگرەگور نەبارى ەكى كەزدەسۋ وتكىزىپ, ەكى رەتىندە دە ءوزىنىڭ سىرالعى قارسىلاسى – امەريكالىق داستين پورەدەن تەحنيكالىق نوكاۋتپەن ۇتىلدى. وكتاگوندا بار-جوعى 752 سەكۋند ايقاستى. سونىڭ ءوزى بايلىققا بەلشەدەن باتۋ ءۇشىن جەتكىلىكتى بولدى. يرلانديا وكىلىنىڭ تازا سپورتتاعى تابىسى 22 ميلليون دوللارىن قۇراسا, جارنامادان تۇسكەن كىرىس – 158 ميلليون دوللار. بارلىعى – 180 ميلليون دوللار. ۇلكەن ءومىرىن سانتەحنيك بولىپ باستاعان قاراپايىم جۇمىسشى قازىرگى كەزدە ۇلدە مەن بۇلدەگە ورانىپ وتىر. نە ىشەمىن, نە جەيمىن دەمەيدى. كەرىسىنشە, اقشاسىن قايدا جۇمسارىن بىلمەي, ءتۇرلى برەندتەر ويلاپ تابۋدا. كونور وسىنىڭ بارلىعىنا ءوزىنىڭ ەڭبەگى مەن تاباندىلىعى, ەپتىلىگى مەن ىسكەرلىگىنىڭ ارقاسىندا قول جەتكىزدى. مىنە, وسىدان كەيىن «اركىمنىڭ ءوز تاعدىرى ءوز قولىندا» دەگەنگە سەنبەي كورىڭىز!
باي-قۋاتتى سپورتشىلاردىڭ تىزىمىندە ەكىنشى جانە ءۇشىنشى ورىنداردى الەمدىك فۋتبولدىڭ شوقجۇلدىزدارى – ليونەل مەسسي مەن كريشتيانۋ رونالدۋ ءوزارا بولىسۋدە. ارگەنتينانىڭ ماقتانىشى 130 ميلليون (ەڭبەكاقى مەن سىياقى – 97 ملن دوللار+جارناما – 33 ملن دوللار) تابىس تاپسا, پورتۋگاليالىق سۇرمەرگەننىڭ كىرىسى – 120 ملن دوللار (70 ملن دوللار+50 ملن دوللار). سونداي-اق «توپ-10» سپورتشىنىڭ قاتارىندا امەريكالىق فۋتبول وكىلدەرى داك پرەسكوتت (107,5 ملن دوللار) پەن توم برەدي (76 ملن دوللار), باسكەتبولشىلار دجەيمس لەبرون (96,5 ملن دوللار) مەن كەۆين ديۋرانت (75 ملن دوللار), فۋتبولشى نەيمار (95 ملن دوللار), تەننيسشى رودجەر فەدەرەر (90 ملن دوللار) جانە «فورمۋلا-1» سپورتىنىڭ سەركەسى ليۋيس حەميلتون (82 ملن دوللار) سىندى سپورتشىلار بار.
Forbes وتكەن جىلى ەڭ كوپ تابىس تاپقان ايەلدەردىڭ دە ەسىمدەرىن جاريا ەتتى. بۇل تىزىمگە مىنالار ەندى: ناومي وساكا (تەننيس) – 57,3 ملن دوللار, سەرەنا ۋيليامس (تەننيس) – 45,9 ملن دوللار, ۆينۋس ۋيليامس (تەننيس) – 11,3 ملن دوللار, سيمونا بايلز (سپورتتىق گيمناستيكا) – 10,1 ملن دوللار, گاربينە مۋگۋرۋسا (تەننيس) – 8,8 ملن دوللار, كو دجين يانگ (گولف) – 7,5 ملن دوللار, پۋسارلا ۆەنكاتا سيندحۋ (بادمينتون) – 7,2 ملن دوللار, ەشلي بارتي (تەننيس) – 6,9 ملن دوللار, نەللي كوردا (گولف) – 6,2 ملن دوللار جانە كەنديس پاركەر (باسكەتبول) – 5,7 ملن دوللار.
