ءبىزدىڭ قوعامدا حالىقتىڭ تابىسى, اقشالاي كىرىسى اراسىندا, وتباسىلاردىڭ جاعدايى اراسىندا ايىرماشىلىق جوعارى. ونى باتىس ەلدەرىمەن ءتىپتى سالىستىرۋعا كەلمەيدى. جالپى ەكونوميكالىق ءوسىم, ورتاشا جالاقى تاعى دا باسقا كورسەتكىشتەر جوعارى بولعانىمەن, ونىڭ 10 پايىزى ەڭ كەدەي توپ, 10 پايىزى ەڭ باي توپ دەپ الاتىن بولساق, ەكەۋىنىڭ اراسىنداعى الشاقتىق جەر مەن كوكتەي. سوندىقتان ءبىزدىڭ قوعامداعى وسى كەدەيشىلىك ماسەلەسىن مويىنداۋىمىز قاجەت.
قاسىم-جومارت توقاەۆتىڭ سوزىندە ايتىلعانداي, حالىقتىڭ كىرىسى ەلدىڭ ەكونوميكالىق وسىمىمەن بايلانىستى بولۋى كەرەك. الايدا بىزدە ەكونوميكالىق ءوسىم ماكروەكونوميكالىق كورسەتكىشتەن, حالىقتىڭ تۇرمىس جاعدايىنان كورىنىس تاپپاي كەلدى. پرەزيدەنت نارىقتىق ەكونوميكانى دامىتقاندا ونىڭ الەۋمەتتىك باعدارىنا باسىمدىق بەرۋ, سوعان نازار اۋدارۋ جانە قازاقستان ءوزىن كونستيتۋتسيادا قۇقىقتىق دەموكراتيالىق جانە الەۋمەتتىك مەملەكەت رەتىندە بەكىتەتىنىن تاعى دا ءبىر ەسكە سالدى. جانە حالىقتىڭ كىرىسىن ۇلعايتۋ جونىندە ارنايى باعدارلاما جاساۋعا تاپسىرما بەردى. حالىقتىڭ كىرىسىن كوبەيتۋ ءۇشىن الەۋمەتتىك تولەمدەردىڭ تۇرلەرى مەن سانىن, كولەمىن كوبەيتۋدەن بۇرىن, ەڭ الدىمەن ايماقتاردا وڭدەۋشى ونەركاسىپتى, جاڭا, تۇراقتى جۇمىس ورىندارىن اشۋ وتە ماڭىزدى دەپ ويلايمىن.
ايتا كەتەتىن تاعى ءبىر ماسەلە, ەل وڭىرلەرىندە تولقۋلار بولدى. ءدىني-راديكالدىق تۇسىن ايتپاعاننىڭ وزىندە, الەۋمەتتىك تۇرعىدا ساۋالدامالار جۇرگىزگەندە شىنىندا دا نارازىلىقتار حالىقتىڭ الەۋمەتتىك كوڭىل كۇيىندە ەكەنى كورىنەدى. ونى جاسىرۋعا بولمايدى. ول ونسىز دا ءتۇرلى بەيبىت شەرۋلەردەن كورىنىس تاپتى. سوندىقتان وسى الەۋمەتتىك ماسەلەدە ەڭ ماڭىزدىسى – بىزدە ايماقتاردا جۇمىسسىزدىق ءالى دە بولسا وزەكتى. سونىمەن قاتار ايماقتاردىڭ دامۋىندا تەڭسىزدىك بايقالادى. نۇر-سۇلتان, الماتى, شىمكەنت سياقتى ءىرى قالالاردىڭ دامۋى مەن ايماقتارداعى شاعىن قالالاردىڭ دامۋى, ءتىپتى كەيبىر اۋىلداردىڭ جويىلىپ كەتۋى, ىشكى ميگراتسيا باعىتتارىنىڭ ارتۇرلىلىگى – بۇنىڭ ءبارى ءبىزدىڭ ايماقتىڭ تەڭگەرىمسىز دامۋىنا الىپ كەلدى. ساياسي رەفورمالار ءوز الدىنا, الەۋمەتتىك-ەكونوميكالىق تۇرعىدا دا تۇبەگەيلى وزگەرىستەر قاجەت-اق.
ەكونوميكا ينستيتۋتىنىڭ عىلىمي زەرتتەۋ جوبالارى اياسىندا جۇرگىزىلگەن الەۋمەتتىك ساۋالدامالار ناتيجەسى بويىنشا ەلىمىزدىڭ ايماقتارىندا حالىقتى جۇمىسسىزدىق, تابىس كولەمىنىڭ ازدىعى, اۋىل-اۋداندارداعى, شالعاي ەلدى مەكەندەردەگى الەۋمەتتىك-كولىك ينفراقۇرىلىمنىڭ تومەندىگى (مەكتەپ, اۋرۋحانا, اۋىز سۋ, گاز, جول جانە ت.ب.), ءبىلىم, مەديتسينا ساپاسى, كادر تاپشىلىعى جانە ت.ب. ماسەلەلەر تولعاندىراتىنى انىقتالعان ەدى. بۇل قوعامىمىزداعى الەۋمەتتىك تەڭسىزدىك, ادىلەتسىزدىك, حالىق كىرىسىندەگى جانە ايماقتار اراسىنداعى الشاقتىقتى ەسەلەپ تۋدىرىپ, حالىقتىڭ ءومىر ءسۇرۋ ساپاسىنىڭ تومەندىگىنە, بەيبىت حالىقتىڭ الەۋمەتتىك كوڭىل كۇيىنە تىكەلەي اسەر ەتىپ وتىرعانى بەلگىلى. وسى جانە باسقا دا ماسەلەلەر پرەزيدەنت قاسىم-جومارت توقاەۆتىڭ سوزىندە اشىق كوتەرىلدى. ارى قاراي جۇزەگە اسىرۋ تەتىكتەرى مەن ناقتى تاپسىرمالار بەرىلەدى دەپ ۇمىتتەنەمىن. اسىرەسە, جەمقورلىقپەن كۇرەسۋ, وڭدەۋشى ونەركاسىپتى دامىتۋ باعىتىندا باتىل قادامدار مەن ناقتى جوبالار قولعا الىنسا ەكەن. ورتاق ىسكە بارلىعىمىز ءوز دەڭگەيىمىزدە اتسالىسۋىمىز كەرەك دەپ ويلايمىن. ءبىز الەۋمەتتىك-ەكونوميكالىق باعىتتار بويىنشا ۇسىنىستار دايىنداپ, ارى قاراي دا تەرەڭىرەك زەرتتەۋ جاساۋعا دايىنبىز.
سونداي-اق مەملەكەت باسشىسى قاسىم-جومارت توقاەۆ ءماجىلىس وتىرىسىندا «قازاقستان حالقىنا» قورى قۇرىلاتىنىن جەتكىزدى. پرەزيدەنت ونداعى قاراجات دەنساۋلىق ساقتاۋ, ءبىلىم بەرۋ, الەۋمەتتىك قولداۋ سالالارىنداعى وزەكتى ماسەلەلەردى شەشۋگە باعىتتالاتىنىن ايتتى. «وسى قور قاراجاتىنان سيرەك اۋرۋعا شالدىققان بالالارعا كومەك كورسەتىلەدى. جانە قالالاردا, اۋداندار مەن اۋىلداردا بالالارعا سپورتتىق نىساندار سالىنادى. دارىندى بالالارعا قولداۋ بولادى. ب ۇلىكتەن كەيىنگى الماتى قالاسىن قايتا قالپىنا كەلتىرۋگە جۇمسالادى. سونىمەن قاتار اتالعان قور ەسەبىنەن قازا تاپقان پوليتسەيلەر مەن اسكەري قىزمەتشىلەردىڭ وتباسىلارىنا قولداۋ كورسەتىلەدى», دەدى مەملەكەت باسشىسى.
ايسۇلۋ تۇرسىنبايقىزى,
ءبىلىم جانە عىلىم مينيسترلىگى عىلىم كوميتەتى ەكونوميكا ينستيتۋتىنىڭ عىلىمي قىزمەتكەرى, الەۋمەتتانۋشى
