بەلارۋس دالاسىندا تۋىپ, فرانتسيادا جان تاپسىرعان جاسامپاز سۋرەتشى لەۆ باكستتى بەرتىنگى جۇرت «لەون» دەپ اتايدى. ءوزى دە پاريجگە تابانى تيگەن سوڭ ەسىمىن وزگەرتىپ, شىعارماشىلىق سەرپىلىس جاساۋعا نيەتتەنسە كەرەك. اسىرەسە ادەبيەتكە قۇشتارلىعى الىپ شاھارعا دەگەن سەزىمىن ەسەلەيدى. وعان دالەل ءوزى ءسۇيىپ وقيتىن جازۋشى الەكسەي تولستويدىڭ پورترەتى. شىعارما 1909 جىلى ليتوگرافيا جانە گرافيكا تەحنيكاسىن پايدالانا وتىرىپ جازىلعان. جۇمىسقا سۇر قاعاز, گرافيت قارىنداش, اكۆارەل, سيا, اك, التىن, كۇمىس ءتۇستى ماتەريالدار قولدانىلعان ەكەن.
پورترەتتە قىلقالام شەبەرى مودەلدىڭ وزىنە ءتان ەرەكشەلىكتەرى مەن كوڭىل كۇيىن جەتكىزە الاتىن تاماشا دەتالداردى نەگىزگە الادى. باقساڭىز, تەك كولەڭكەلى سىزبالار مەن بوياۋلار عانا ەمەس, سونىمەن قاتار نەعۇرلىم باتىل ورنەك قۇرالدارى, ياعني كولەمدى جانە جالپاق كەسكىندەردىڭ كونتراستىن كورەسىز. شىنىندا ءارتۇرلى ادىستەردى قولدانا وتىرىپ, اسقان شەبەرلىكپەن بەينەلەگەن.
تولستويدىڭ پورترەتىندە كولەمدى باستىڭ ەفيرلىك دەنەمەن ۇيلەسىمى بۇزىلماعان. وسىلايشا, ول كەيىپكەرمەن وقىرماننىڭ بايلانىسىن جاقىنداتا ءتۇسىپ, جازۋشىنىڭ بەت الپەتىن كورەرمەن نازارىندا ۇستايدى. قالامگەردىڭ كوزدەرى باقىلاۋشىعا الدەبىر رەنىشپەن قاراپ تۇرعانداي. ونىڭ نە جىميىپ, نە كۇلىپ نەمەسە الدەنەگە نارازىلىق ءبىلدىرىپ تۇرعانىن انىقتاۋ قيىن. جۇزىنەن ومىردەن شارشاعان, كوڭىلسىز ادامنىڭ وبرازىن وقيسىز, ءتىپتى كۇدىك تە بايقالادى.
شاش ۇلگىسى جازۋشىعا ءتان ستيلدە بەرىلگەن. ورالعان ءجىپ ءتارىزدى رەتىمەن ورنالاسقان جىڭىشكە سىزىقتار باستىڭ ءپىشىنىن قايتالايدى. قانشا سۋلاسا دا ەركىنە باعىنباعان شاشتارى پورترەتكە جان بەرەدى. كيىمى تەك تۇسپالمەن سىزىلعان. بىرنەشە شتريح گالستۋكتىڭ, جاعانىڭ كونتۋرىن جاسايدى. كوستيۋمنىڭ ۇستىڭگى بولىگىندەگى قالىڭ سىزىقتار بىرتە-بىرتە بوزارىپ, ايقىندىلىعىن جوعالتادى. وسىلايشا, مودەل ميميكاسىنىڭ, قويۋ كوزدەرىنىڭ ماڭىزدىلىعىن كورسەتەدى.
كورەرمەن جازۋشىنىڭ باسى مەن يىعىن عانا كورگەنىمەن, كەيىپكەر ەندى ورنىنان تۇرىپ, قيالىن سەيىلتىپ, ءوز ىسىمەن اينالىساتىن سياقتى بەينەلەنگەن. ل.باكست شىعارمالارىنا ءتان ەنەرگەتيكالىق قاسيەت, قوزعالىسقا, ەركىندىككە ۇمتىلىس ا.ن.تولستوي پورترەتىندە دە بار. بارىپ كورەم دەسەڭىز, اتالعان كارتينا ماسكەۋدەگى ترەتياكوۆ گالەرەياسىندا ساقتاۋلى تۇر.
