ەلورداداعى ۇلتتىق اكادەميالىق كىتاپحانادا حالىقارالىق «التىن قىران» قايىرىمدىلىق قورىنىڭ دەمەۋشىلىگىمەن جارىق كورگەن جاس قالامگەرلەر كىتاپتارىنىڭ تۇساۋكەسەر ءراسىمى بولىپ ءوتتى.
ادەبيەت پەن مادەنيەتكە قال-قادەرىنشە قامقورلىق تانىتىپ كەلە جاتقان حالىقارالىق «التىن قىران» كومپانيالار توبى 2012 جىلى التى بىردەي جاس قالامگەردىڭ كىتابىن جارىققا شىعارعان بولسا, 2013 جىلى قادىرمەندى قالامگەر ءابدىجامىل نۇرپەيىسوۆتىڭ «قان مەن تەر» جانە «سوڭعى پارىز» كىتاپتارىنىڭ اعىلشىن تىلىنە اۋدارىلۋىنا دەمەۋشىلىك جاساعان ەدى.
ەندى, مىنە, سول يگىلىكتى شارا تاعى دا جالعاسىن تاۋىپ, قايىرىمدىلىق قورى بيىلعى جىلى جەتى قالامگەردىڭ شىعارمالارىن جەكە كىتاپ ەتىپ وقىرمانعا ۇسىنىپتى. بۇعان دەيىن «اينا» جىر جيناعىن وقىرمانعا ۇسىنعان بەيبىت سارىبايدىڭ «مەيىرىم» اتتى اڭگىمەلەر كىتابىنا سوڭعى جىلدارى جازعان تۋىندىلارى ەنگىزىلىپتى. اڭگىمەلەرىندە بالالىق شاقتىڭ ءموپ-ءمولدىر سەزىمىن, ادام مەن قوعام, ادام مەن تابيعات اراسىنداعى قاقتىعىستاردى شىنايى سۋرەتتەيتىن جازۋشىنىڭ ادامدار پسيحولوگياسىن شەبەر يگەرگەنى اڭعارىلادى. قايشىلىقتى قوعام تۇرعىندارىنىڭ مىنەز-قۇلقى, قالپى, ادامي قارىم-قاتىناسى ەش اسىرەلەۋسىز, قاز-قالپىندا باياندالادى. «شابىت» شىعارماشىلىق جاستار فەستيۆالىنىڭ لاۋرەاتى, رەسپۋبليكالىق ءمۇشايرالاردىڭ جەڭىمپازى ءاليا داۋلەتباەۆانىڭ «سول ءبىر ساۋلە» جيناعىنا ءبىر توپ ولەڭدەرى مەن «اي استىندا ءبىر كول بار...» اتتى پوەماسى ەنگىزىلىپتى. ال بىرنەشە جىر ءمۇشايرالارىنىڭ جەڭىمپازى جانار ابسادىقتىڭ «سەزىمدەر ماۋسىمى» ولەڭدەر جيناعىنا البىرت شاقتىڭ ادەمى ولەڭدەرى توپتاستىرىلىپتى.
تاياۋدا عانا «ەگەمەن قازاقستان» گازەتىنىڭ شىعىس قازاقستان وبلىسىنداعى مەنشىكتى ءتىلشىسى قىزمەتىنە كىرىسكەن دۋمان اناشتىڭ «اۋلەت» پۋبليتسيستيكالىق تۇڭعىش كىتابىندا ۇلتىمىزدىڭ وتكەن عاسىردىڭ العاشقى شيرەگىندە باستان وتكەرگەن قيلى اۋىرتپالىقتارى ءسوز بولادى. اسىرەسە, ۇلى حاكىم اباي مەن الاش كوسەمى ءاليحان بوكەيحان ۇلى ۇرپاقتارىنىڭ تاعدىرى بەيجاي قالدىرمايدى. اۋلەت قاسىرەتى ارقىلى ۇلتتىڭ باسىنان كەشىرگەن زوبالاڭى بەلگىلى عالىمداردىڭ, جازۋشىلاردىڭ كەلتىرگەن دەرەكتەرى مەن دايەكتەرى نەگىزىندە باياندالادى. بەلگىلى كاريكاتۋراشى, بىرنەشە حالىقارالىق كونكۋرستاردىڭ جۇلدەگەرى عالىم سماعۇل ۇلىنىڭ سۋرەتتى-البوم جيناعىنا سۋرەتشىنىڭ تاڭداۋلى 100-گە جۋىق تۋىندىسى توپتاستىرىلىپتى. عالىمنىڭ تاقىرىپ تاڭداۋدا تالعامىنىڭ جوعارى ەكەنىن كىتاپتى پاراقتاپ وتىرىپ بايقاۋعا بولادى. ونىڭ ءار شىعارماسى بوياماسىز ءدال بەينەلەنگەن. بايىپپەن قاراعان جان قوعام كورىنىسىن سۋرەتتەردەن جازباي تانيدى. تالانتتى اقىن, بىرنەشە جىر دودالارىنىڭ جۇلدەگەرى قۋانىش مەدەۋباەۆتىڭ «قارا جاشىك» اتتى دۇنيەسى اقىن جانىنىڭ ايناسى ىسپەتتى بولسا, «دارىن» مەملەكەتتىك جاستار سىيلىعىنىڭ لاۋرەاتى ازامات تاسقارا ۇلىنىڭ «جۋسان قىز» كىتابىنا اقىننىڭ ليريكالىق-فيلوسوفيالىق ولەڭدەرى ەنىپتى. ايدىنعا قانات قاققان جەتى جەلكەن دەپ, جەتى قالامگەردىڭ ءالى سياسى كەبە قويماعان رۋحاني قۇندىلىقتارى ۇلت ءۇشىن ابىرويلى ءىس دەپ بىلەمىز.
تۇساۋكەسەر راسىمىنە وراي وتكىزىلگەن ءباسپاسوز ءماسليحاتىندا اكادەميك سەيىت قاسقاباسوۆ, اقىن-جازۋشىلار اكىم تارازي, نۇرلان ورازالين, الدان سمايىل, سەرىك اقسۇڭقار ۇلى, بيگەلدى عابدۋللين, جاناربەك ءاشىمجان, داۋرەن بەرىكقاجى ۇلى مەن سۋرەتشى ايداربەك عازيز ۇلى سياقتى قوعام قايراتكەرلەرى مەن بەلگىلى اقىن-جازۋشىلار ءسوز الىپ, جەلكەن قاققان جەتى قالامگەرگە قامقورلىق كورسەتىپ وتىرعان كومپانيا ۇجىمىنا العىستارىن ءبىلدىردى. كىتابى جارىق كورىپ وتىرعان جاس قالامگەرلەردىڭ شىعارماشىلىعىنا توقتالىپ, ءوز وي-پىكىرلەرىن ورتاعا سالىپ, جازار كوبەيسىن دەگەن تىلەكتەرىن جەتكىزدى.
بەرىك سادىر,
«ەگەمەن قازاقستان».
–––––––––––––––––––––
سۋرەتتەردى تۇسىرگەن
ەرلان وماروۆ.
