جەمقورلىقتىڭ ءبىر ءتۇرى – جىلۋ جيناۋ

قىزىلوردا وبلىسىنىڭ مەكتەپتەرىندە ءتۇرلى سىلتاۋمەن اتا-انالاردان جىلۋ جيناۋ بۇگىندە قاتەرلى ىسىكتەي قاتتى تامىرلاپ كەتكەن. جاعدايدىڭ وسىلايشا ءوزىنىڭ شارىقتاۋ شەگىنە جەتكەنىن وبلىس اكىمى قىرىمبەك كوشەرباەۆ تا جاقسى بىلەدى. ول سوندىقتان دا جەمقورلىققا قارسى كۇرەس كوميسسياسىنىڭ سوڭعى وتىرىسىندا جەمقورلىققا قارسى كۇرەستى مەكتەپتەردەن باستاۋ كەرەك ەكەنىن اشىپ تا, اشىنىپ تا ايتتى. ايماق باسشىسى ماجىلىستە مەكتەپتەردەگى كەڭ ەتەك جايعان وقۋشىلاردان رەتسىز اقشا جيناۋ ءۇردىسىنىڭ تامىرىنا بالتا شابۋعا شاقىردى. جيىندا ۇستىمىزدەگى جىلى ءبىلىم سالاسىنا ءبولىنىپ وتىرعان قارجىنىڭ ءۇش ەسەگە جۋىق ارتىپ وتىرعانى تىلگە تيەك ەتىلىپ, وقۋ ورىندارىنىڭ اقشادان مۇقتاجدىق كورەتىن رەتتەرى جوق ەكەندەرى العا تارتىلدى. ءبىلىم جۇيەسىندە بالدىرعانداردى بالالار باقشاسى مەن مەكتەپتەرگە ورنالاستىرۋدان باستاپ, پەداگوگتاردى وسى مەكەمەلەرگە جۇمىسقا الۋ, اتتەستاتسيادان وتكىزۋ, ولاردى وقىتۋ سەكىلدى ۇدەرىستەردىڭ ءاربىر كەزەڭى ەشبىر بۇكپەسىز اشىق جۇرگىزىلۋلەرى كەرەك. سوندا پارا الۋعا دا جول بەرىلمەيدى. وسىعان وراي, ءبىلىم بەرەتىن مەكەمەلەرگە اتا-انالاردىڭ ارىزدارى مەن شاعىمدارىن قابىلدايتىن جاشىكتەر ورناتىپ, مەكتەپتەر مەن بالالار باقشالارىندا دەمەۋشىلىك كومەك دەگەن جەلەۋمەن اتا-انالاردان اقشا جيناۋدى ءۇزىلدى-كەسىلدى توقتاتۋ تاپسىرىلدى. «مەكتەپ باسشىلىعى وسىلايشا تۇر­مىستارى تومەن وتباسىلارىن تىعىرىققا تىرەپ, ولاردىڭ بالالارىن وزدەرىن كەم سەزىنۋگە الىپ باراتىن جاعدايلارعا جەتكىزەدى. وسىنداي بولماۋى ءۇشىن بىروڭكەي مەكتەپ كيىمىنىڭ ۇلگىسى دە جاسالدى. ال وتباسىلارى ءال-اۋقاتىنداعى ايىرماشىلىقتاردى بىلدىرمەۋ ءۇشىن ەنگىزىلگەن مۇنداي شارالار, اسىرەسە, باستاۋىش سىنىپتارداعى وقۋشىلار اراسىندا قاتتى قولعا الىندى. مۇعالىمدەر دەمەۋشىلىك كومەك رەتىندە اقشا جيناۋ ارقىلى اتا-انالاردىڭ ءارتۇرلى جاعدايدا ەكەندەرىن انىق بايقاتاتىن قادامداردى جاسايدى. وسىعان كونگەن اكە-شەشە بالالارىن ءتو­مەندەتپەۋ ءۇشىن كورشىلەرىنەن قا­رىزعا اقشا الۋعا دەيىن بارىپ جا­تادى. ءبىز بۇعان جول بەرە المايمىز», – دەدى ايماق باسشىسى. مەكتەپ مۇعالىمدەرىنىڭ مو­رال­دىق بەت-بەينەلەرى – بولەك اڭگىمەنىڭ تاقىرىبى. ولار بارلىق جاعىنان وزدەرى ساباق بە­رە­تىن وقۋشىلارعا ۇلگى-ونەگە بولۋعا ءتيىس. الايدا, مەكتەپتەردە كەي جاعدايدا قو­لاي­سىز پسيحولوگيالىق احۋال قالىپتاسىپ, ديرەك­توردىڭ توڭىرەگىندە ءارتۇرلى قيتۇرقى ويىندار وينالىپ جاتادى. «قىزىلجارما كەنتىندەگى №144 ورتا مەكتەپتە ورىن العان ديرەكتوردىڭ وقۋشىلارمەن جانە تۇرعىندارمەن «تۇتاس سوعىس» اشقان وقيعاسى بىزگە بەلگىلى. ەندى تاياۋدا دەنساۋلىق ساقتاۋ سالاسىندا قوردالانىپ قالعان وزەكتى ماسەلەلەردى شەشۋگە كوڭىل بولگەنىمىزدەي, ءبىلىم بەرۋ جۇيەسىن دە سوزىلمالى سىرقاتىنان «ەمدەۋىمىز» كەرەك. الايدا, بۇل ەمدەۋ وتكەن جىلى 27 مەكتەپ ديرەكتورىن ورىندارىنان العانىمىز سياقتى ءدامى اششىلاۋ دارىلەردى تاعايىنداۋىمىزدى كەرەك ەتەدى», – دەدى ق.كوشەرباەۆ. وبلىس اكىمى وسىعان بايلانىس­تى قالا جانە اۋداندار اكىمدەرىنە ماڭىزدى ماسەلەلەردى شەشەردە «تايپاارالىق شايقاستاردىڭ» تۋىپ كەتۋ مۇمكىندىگىن جوققا شى­­عاراتىن جاريالىلىق پەن اشىق­­تىقتى قامتاماسىز ەتە وتىرىپ, باقىلاۋشى ورگاندارعا «قو­لاي­سىز» ادامداردى بەلگىلەۋدى, ءسويتىپ, بۇل باعىتتاعى جۇمىستاردى جانداندىرا ءتۇسۋدى تاپسىردى. قۇرىش نۇرىمبەت.