Sensitive (سەزىمدىلەر) بال بيلەرى ءانسامبلىنىڭ وزىندىك ەرەكشەلىگى بار. ول ەستۋ قابىلەتى تومەن بالالاردىڭ پەتروپاۆلداعى مەكتەپ-ينتەرناتىندا 2006 جىلى قۇرىلعان. ادامداردىڭ ءبىر مۇشەسى كەم بولسا باسقا اعزانىڭ قابىلەتى ارتادى دەگەن قاعيدا ەجەلدەن بار. مۇنداعى جاستاردىڭ بيگە قابىلەتى زور بولۋى مۇمكىن ەكەنىن شامالاعان قىزىلجارداعى ە.سەركەباەۆ اتىنداعى ونەردە دارىندى بالالارعا ارنالعان مەكتەپ-ينتەرناتىنىڭ بي مامانى ولگا روستوۆششيكوۆا كەلىپ, وسىندا بي ءانسامبلىن قۇرعان. ماماننىڭ بولجامى ۇزاماي اقتالىپ, ە.ۆوروپاەۆا, ا.سايىنوۆا, د.قانعوجين, ا.راديتسا, م.نوۆيكوۆا, ە.كۋزمين, ە.چۋب, پ.تكاچەنكو سەكىلدى جاستار بيگە يكەمدىلىك تانىتىپ, جاقسى جەتىستىكتەرگە جەتە باستاعان. و.روستوۆششيكوۆا دا ولارعا 15 جىلدان بەرى ءبيدىڭ كاسىبي قىر-سىرلارىن ۇيرەتىپ كەلەدى. انسامبل 2017 جىلى «شاپاعات» مەدالىمەن ماراپاتتالدى.
2012-2013, 2017-2018 وقۋ جىلدارىندا ولگا نيكولاەۆنا «كرەاتيۆتىلىگى جانە شىعارماشىلىعى ءۇشىن» ديپلومدارىن العان. ءانسامبلدىڭ رەپەرتۋارى دا جاڭعىرتىلىپ, وعان لاتىنامەريكالىق, ەۋروپالىق جانە وسى زامانعى حورەوگرافيالىق جاڭا ناقىشتار ەنگىزىلىپ تۇرادى. قازىر انسامبل وبلىستىق, رەسپۋبليكالىق جانە حالىقارالىق كونكۋرستارعا قاتىسىپ جۇرگەن ەستۋ قابىلەتى تومەن ادامداردان تۇراتىن جالعىز رەسپۋبليكالىق ۇجىم. وسى جىلداردا Sensitive رەسپۋبليكالىق «جۇلدىزاي» كونكۋرسىنىڭ ءۇش دۇركىن جەڭىمپازى اتانىپ باسقا كونكۋرستاردان 6 گران-پري, 18 رەت ءبىرىنشى ورىندى جەڭىپ الدى.
جاستارى مەكتەپ تۇلەكتەرى قاتارىنان اسىپ كەتكەن سوڭ ۇجىم مۇشەلەرىن تاراتپاي, بىلتىر وبلىس اكىمىنىڭ شەشىمىمەن انسامبل ەستۋ قابىلەتى تومەن بالالاردىڭ مەكتەپ-ينتەرناتىنان س.مۇقانوۆ اتىنداعى قازاق مۋزىكالىق دراما تەاترىنا قوسىلعان. مىنە, ەندى انسامبل جاڭا ۇجىمىنا حالىقارالىق دەڭگەيدە ولجا سالىپ وتىر. تالانتتى ۇجىم مۇشەلەرىن مىسىرعا قازاق تەاترىنىڭ ءارتىسى, رەجيسسەردىڭ كومەكشىسى ايبول قاسىم باستاپ بارعان ەدى. ساپار ءساتتى بولىپ, بي ۇجىمى وبلىس قانا ەمەس ەلىمىز ءۇشىن ۇلكەن تابىسقا قول جەتكىزىپ وتىر. جەڭىستەرىڭىز جەڭىسكە ۇلاسسىن دەيمىز ءبىز دە...
سولتۇستىك قازاقستان وبلىسى
