ەكونوميكالىق ساياساتىمىزدىڭ ماقساتى ايقىن. بۇل – زامان تالابىنا ساي الەۋمەتتىك باعدارى بار نارىقتىق ەكونوميكا قۇرۋ جانە دامىتۋ. مەملەكەت باسشىسى «بۇل جۇيەنىڭ وزەگىندە قوعام الدىنداعى جاۋاپكەرشىلىگىن سەزىنە بىلەتىن كاسىپكەرلەرىمىزدىڭ اۋقىمدى توبى تۇراتىنى انىق. ياعني بۇل – ءوزىنىڭ جانە بالالارىنىڭ تاعدىرىن قازاقستانمەن عانا بايلانىستىراتىن كاسىپكەرلەر» دەپ قازاق كاسىپكەرلەرىنەن ۇمىتتەنەتىنىن ايتتى.
مەملەكەت باسشىسى ايتىپ وتكەندەي, كاسىپكەرلەر ەل بولاشاعى ءۇشىن وزىنە جاۋاپكەرشىلىك جۇكتەۋگە دايىن. سول سەبەپتى كاسىپكەرلىكتى دامىتۋ ءۇشىن جۇيەلى جۇمىس اتقارۋ وتە ماڭىزدى. وسىعان دەيىن مەملەكەت باسشىسى بيزنەسكە تۇسكەن بيۋروكراتيالىق سالماقتى ايتارلىقتاي ازايتىپ, ونىڭ ءوسىپ-وركەندەۋىنە جول اشاتىن زاڭعا قول قويدى. ۇكىمەت وسى زاڭنىڭ الەۋەتىن ناقتى ءىس جۇزىندە پايدالانۋى قاجەت دەپ ويلايمىن. جۇمىس جۇيەلى تۇردە جولعا قويىلسا, ءبىراز ماسەلە شەشىلەدى, اۋىلداعى بيزنەستىڭ كۇرەتامىرىنا قان جۇگىرەدى.
كاسىپكەر رەتىندە الىس-جاقىن شەتەلدەرگە كوپ شىعامىن. بارعان جەرىمدە بيزنەستىڭ تابيعاتىنا كوبىرەك نازار اۋدارۋعا تىرىسامىن. مىسالى, قحر-دا اۋىل شارۋاشىلىلىعى سەكتورىنان شىققان اۋقاتتى كاسىپكەرلەر وتە كوپ. سوڭعى كەزدە رەسەيدە دە, كورشىمىز وزبەكستاندا دا بايقالا باستادى. سوندىقتان مىسالى, ەلىمىزدىڭ باتىسىندا مۇناي وڭدەيتىن زاۋىتتار, وڭتۇستىكتە جەمىستى قايتا وڭدەيتىن, بالالارعا ارنالعان ءتۇرلى شىرىنداردى دايىندايتىن شاعىن كاسىپورىنداردى اشۋعا بولادى. ءسۇت ونىمدەرىنىڭ كلاستەرىن دە وسى وڭتۇستىك باعىتتا جانداندىرۋعا بولار ەدى. ءبىزدىڭ ەلدە بيزنەستى ورتالىقتا شوعىرلاندىرۋ ارقىلى بيزنەستىڭ مۇمكىندىگىن شەكتەپ وتىرمىز. ونىڭ زاردابى قانداي بولاتىنىن الماتى وقيعاسىنان كوردىك. قازىر ءىجو-دەگى شوب-تىڭ ۇلەسى ماردىمسىز. مۇنىڭ باستى سەبەبى, جوعارىدا ايتىپ وتكەندەي, بيزنەستىڭ تەك ورتالىقتا عانا شوعىرلانۋى. بۇل كوزقاراس كەزىندە ءوزىن ءوزى اقتاعان شىعار. ەندى ورتالىقتا تامىرلانعان بيزنەستىڭ اۋىلعا تامىر جايۋىنا مۇمكىندىك بەرۋ كەرەك.
الەۋمەتتىك جاعىنان از قامتىلعان وتباسىلاردىڭ باسىم كوپشىلىگى اۋىلدا تۇرادى. بۇل پروبلەمانى جاردەماقى ارقىلى شەشۋدىڭ مۇمكىن ەمەستىگى بەلگىلى. قازىر اۋىلعا جانىمىز اشىسا, بيزنەسىن اشىپ, اشىق نارىقتا ءوزىن ءوزى قامتاماسىز ەتۋگە مۇمكىندىك بەرۋ كەرەك. بۇل ورتالىقتان الىستا جۇرگەن تۇلعالاردىڭ ەل كولەمىندە تانىلۋىنا, قىزمەتتەرىنىڭ وسۋىنە جول اشادى.
ماحامبەت اساباەۆ,
كاسىپكەر
الماتى
