پرەزيدەنت • 12 قاڭتار، 2022

الەم كوشباسشىلارى قر پرەزيدەنتىنە كوڭىل ايتۋ جەدەلحاتىن جولدادى

89 رەت كورسەتىلدى

قاسىم-جومارت توقاەۆتىڭ اتىنا قازاقستانداعى قايعىلى وقيعالارعا بايلانىستى الەمدىك كوشباسشىلار مەن حالىقارالىق قۇرىلىمدار وكىلدەرىنەن كوڭىل ايتۋ جەدەلحاتتارى كەلىپ تۇسۋدە، دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.

قحر توراعاسى سي تسزينپين قاسىم-جومارت توقاەۆقا جولداعان جەدەلحاتىندا مەملەكەت ءۇشىن شەشۋشى ساتتە پرەزيدەنت رەتىندە جاعدايدى ءوز باقىلاۋىنا الىپ، باتىل ءارى ناقتى شارالار قابىلداعانىن جازدى.

«وسىدان ءسىزدىڭ ساياساتكەر جانە ەلىڭىز بەن حالقىڭىزدىڭ الدىندا زور جاۋاپكەرشىلىك ارقالاعان تۇلعا رەتىندەگى ەرلىگىڭىز كورىنەدى. مەن مۇنى جوعارى باعالايمىن! قىتاي تاراپى قازاقستاننىڭ تۇراقتىلىعىنا نۇقسان كەلتىرەتىن، ونىڭ قاۋىپسىزدىگىنە قاۋىپ توندىرەتىن، قازاقستان حالقىنىڭ تىنىشتىعىن بۇزاتىن كەز كەلگەن كۇشتەرگە جانە قازاقستاندا سانالى تۇردە حاوس تۋعىزىپ، ء«تۇرلى-ءتۇستى رەۆوليۋتسيا» جاسايتىن سىرتقى كۇشتەرگە باتىل قارسى شىعادى. قازاقستان مەن قىتاي اراسىنداعى دوستىققا سىنا قاعۋعا جانە ەكىجاقتى ىنتىماقتاستىققا كەدەرگى كەلتىرۋگە تىرىساتىن كەز كەلگەن ارەكەتكە باتىل قارسى تۇرادى»، دەلىنگەن سي ءتسزينپيننىڭ جەدەلحاتىندا.

وزبەكستان پرەزيدەنتى شاۆكات ميرزيوەۆ ءوزىنىڭ حاتىندا قاسىم-جومارتتوقاەۆقا جانە قازاقستان حالقىنا كوڭىل ايتىپ، ەلىمىزدەگى بەيبىتشىلىكتى ساقتاۋ جولىندا قازا تاپقان جانداردىڭ جاقىندارى مەن تۋىستارىنىڭ قايعىسىنا ورتاقتاساتىن جازعان.

«باۋىرلاس قازاقستاندا بەيبىتشىلىك پەن تۇراقتىلىقتى قامتاماسىز ەتۋ جولىنداعى ءسىزدىڭ باتىل كۇش-جىگەرىڭىزدى تولىق قولدايتىنىمىزدى تاعى دا ناقتىلاعىم كەلەدى»، دەپ جازدى وزبەكستان كوشباسشىسى.

قىرعىزستان پرەزيدەنتى سادىر جاپاروۆ جولداعان جەدەلحاتىندا قازاقستاندا بولعان قايعىلى وقيعالاردى زور كۇيزەلىسپەن قابىلداعانىن اتاپ ءوتىپ، قىرعىزستان حالقىنىڭ جانە جەكە ءوزىنىڭ اتىنان قاسىم-جومارت توقاەۆقا جانە بارشا قازاق حالقىنا كوڭىل ايتتى.

«مىزعىماس دوستىق، تاتۋ كورشىلىك جانە ءوزارا سىيلاستىققا نەگىزدەلگەن حالىقتارىمىزدىڭ كوپ عاسىرلىق ورتاق تاريحي، رۋحاني جانە مادەني بايلانىستارىن ەسكەرە وتىرىپ، قىرعىزستان قازاقستان رەسپۋبليكاسىن قاشاندا نيەتتەس، سەنىمدى كورشى ءارى ستراتەگيالىق ارىپتەس رەتىندە قولدايدى»، دەلىنگەن قىرعىزستان باسشىسىنىڭ جەدەلحاتىندا.

بەلارۋس پرەزيدەنتى الەكساندر لۋكاشەنكو كوپتەگەن ادامنىڭ قۇربان بولۋىنا جانە عيماراتتاردىڭ قيراۋىنا اكەپ سوققان  سودىرلار توبىنىڭ ەلىمىزگە جاساعان شابۋىلى حالىقارالىق تەرروريزم رەتىندە الەمگە زور قاۋىپ توندىرەتىنىن  جازعان.

«ەكسترەميستەردىڭ تۇپكى ماقساتى – كوپۇلتتى قازاقستانداعى جاعدايدى تۇراقسىزداندىرۋ، ەلدە حاوس ورناتىپ، كونستيتۋتسياعا قارسى توڭكەرىس جاساۋ جانە ساياسي باعداردى وزگەرتۋ ءۇشىن باۋىرلار اراسىندا سوعىس وتىن ءورشىتۋ ەكەنى ايقىن»، دەپ جازدى الەكساندر لۋكاشەنكو.

تاجىكستان پرەزيدەنتى ەمومالي راحمون جانە تۇرىكمەنستان پرەزيدەنتى گۋربانگۋلى بەردىمۇحامەدوۆ جانە بۇۇ وركەنيەتتەر اليانسىنىڭ جوعارعى وكىلى ميگەل انحەل موراتينوس تە قازاقستان ازاماتتارىنا قولداۋ ءبىلدىرىپ، قايعىرىپ كوڭىل ايتتى.

جەدەلحاتتار ءالى دە كەلىپ تۇسۋدە.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار