وبلىستاعى جالپى احۋال تۇراقتى. وسى كۇندەرى وڭىردە بىردە-ءبىر ادام زارداپ شەككەن جوق. ادامداردىڭ جەكە بوستاندىعى مەن مۇلكىنە قول سۇعۋشىلىق تا بولعان ەمەس. تۇرعىندار ءتارتىپ ەنگىزۋ شارالارىنا تۇسىنىستىكپەن قاراپ, قولداۋ بىلدىرۋدە. پەتروپاۆل قالاسىنا كىرەتىن كۇرە جولدارعا بەس بلوك-بەكەت قويىلعان, ال جالپى وبلىس بويىنشا بۇدان باسقا 20 وتكىزۋ بەكەتى ورناتىلعان. وسى كۇنگە دەيىن بلوك-بەكەتتەردە 17 مىڭ بىرلىك كولىك تەكسەرىلدى. ونىڭ اراسىندا قازاقستان اۋماعىنا وتۋگە سەنىمدى نەگىزى بولماعان 451 كولىك قايتارىلدى.
مەملەكەتتىك ورگاندار مەن ماڭىزدى نىساندار شتاتتىق رەجىمدە جۇمىس ىستەۋدە. ازىق-ت ۇلىك تاپشىلىعى جوق, باعا ءبىرشاما تۇراقتى. ق.اقساقالوۆ سولتۇستىك قازاقستاندا گاز باعاسى ەلدەگى ەڭ قىمبات دەگەن پىكىردى جوققا شىعاردى. «بىزدەگى گاز باعاسى اقمولا, الماتى, قوستاناي, قاراعاندى جانە پاۆلودار وبلىستارىمەن بىردەي», دەدى ول.
ينتەرنەت وبلىستا بەلگىلى ءبىر ۋاقىتقا عانا بەرىلىپ تۇر. اكىمنىڭ ايتۋىنا قاراعاندا, بۇل بىرتىندەپ ۇزارتىلاتىن كورىنەدى. «وبلىستا بانكوماتتارعا اقشا سالۋ جۇمىستارى جۇرگىزىلۋدە, نەگىزگى بانكوماتتاردا اقشا بار. قالاداعى بىرقاتار سۋپەرماركەتتە ارنايى جەلى ارقىلى اقشاسىز تولەمدەر قابىلدانادى. «حالىق بانكتىڭ» وبلىستاعى بولىمشەلەرى ءوز جۇمىسىن باستادى. بانكتەرگە ارنايى كۇزەت قويىلدى», دەدى اكىم.
ەلىمىزدىڭ بارلىق ءوڭىرى سياقتى سولتۇستىك قازاقستاندا دا تەرروريزمگە قارسى ساقتىق وپەراتسيالارى جۇرگىزىلۋدە. جالعا بەرىلەتىن بارلىق تۇرعىن ۇيلەر تەكسەرىلىپ, ولاردىڭ تۇرعىندارى انىقتالۋدا. اكىم ءوزىنىڭ سوزىندە تىنىشتىقتى ساقتاۋعا بارلىق تۇرعىننىڭ قاتىسۋىن سۇرادى. «ماڭايلارىڭىزدا كۇدىكتى ادامدار بايقالسا, دەرەۋ +7 778 363 3780 تەلەفونىنا حابارلاسىڭىزدار», دەدى ول.
تج ەنگىزىلگەننەن بەرى پوليتسيا ورگاندارىنا بارلىعى 255 ادام جەتكىزىلگەن بولسا, ولاردىڭ 72-ءى – توتەنشە جاعداي تارتىپتەرىن بۇزعاندار. سولاردىڭ ىشىندە 34 جەكە تۇلعاعا سوتتىڭ شەشىمىمەن اكىمشىلىك جاۋاپكەرشىلىك جۇكتەلدى. ال سپيرتتىك سۋسىندار ساتقان 4 زاڭدى تۇلعاعا ايىپپۇل سالىندى.
قازىر وبلىستىق باق ارقىلى كومەندانتتىق ساعاتتىڭ تارتىپتەرى مەن ماڭىزدىلىعى ايتىلىپ, كومەندانت حالىقتى قۇلاقتاندىرىپ تۇرادى.
سولتۇستىك قازاقستان وبلىسى
