پاراليمپياداعا ەلىمىزدەن بەس سپورتشى قاتىسۋدا

سوچيدە قىسقى پاراليمپيادا ويىندارى وتۋدە. وعان  قازاقستاننان جولمادا العان بەس سپورتشىمىز قاتىسۋدا. بۇل تۋرالى Paralympic.kz حابارلادى. پاراليمپيادا مۇمكىندىگى شەكتەۋلى سپورتشىلار اراسىندا وتەتىن جارىس. ول ءتورت جىلدا ءبىر رەت وتەدى. بيىلعى پاراليمپيادا ويىندارى 7 ناۋرىز كۇنى باستالدى. ول 19 ناۋرىزعا دەيىن جالعاسادى. بۇل سىنعا بيىل الەمنىڭ 45 ەلىنەن 1650 مۇگەدەك سپورتشى قاتىسۋدا. سونىڭ ىشىندە العاش رەت پاراليمپيادا ويىندارىنا قاتىسىپ جاتقان ەلدەر دە بار. ماسەلەن, برازيليا, تۇركيا مەن وزبەكستان ەلدەرىنىڭ سپورتشىلارىن ايتۋعا بولادى. قازىر قولدا بار مالىمەتتەرگە قاراعاندا, سپورتشىلار سلەجحوككەي (وتىرىپ وينايتىن حوككەي), كەرلينگ, شاڭعى جارىسى, بياتلون, تاۋ شاڭعىسىنان 72 مەدال جيىنتىعىن ساراپقا سالۋدا. ال ءبىزدىڭ ەلگە كەلسەك, بيىلعى ويىندارعا قازاقستاننان العاش رەت بەس سپورتشىمىز قاتىسۋدا. ەستەرىڭىزدە بولسا, 1994 جىلى ليللەحامەردە (نورۆەگيا), 1998 جىلعى ناگانودا (جاپونيا), 2002 جىلى سولت-لەيك-سيتيدە (اقش) 2010 جىلى كانادانىڭ ۆانكۋۆەر قالاسىندا وتكەن ويىندارعا قازاقستاننان تەك ءبىر سپورتشى عانا جولداما العانى بەلگىلى. 2006 جىلى تۋريندە وتكەن جارىستا (يتاليا) ەكى جولداما يەلەنگەنبىز.  سول كەزدە جولداما العان سپورتشىلاردىڭ بارلىعى شاڭعىشىلار ەدى. ال بيىلعى سوچي پاراليمپياداسىنا العاش رەت ەلىمىز بياتلون سپورتىنان دا ليتسەنزيا الدى. قازاقستان پاراليمپيادا كوميتەتىنىڭ دەرەكتەرىنە قاراعاندا, ءبىزدىڭ سپورتشىلار سوچي سىنىنا جولدامانى كانادا, فينليانديا, گەرمانيادا وتكەن ىرىكتەۋ جارىستارىندا جەڭىپ العان. ەندى پاراليمپياداعا قاتىسىپ جاتقان سپورتشىلارىمىزعا كەلسەك, وعان ءبىزدىڭ ەلدەن ەكى ايەل, ءۇش ەر ادام قاتىسۋدا. ەڭ جاسى 23-تە بولسا, جاسى ۇلكەنى 51-دە. پاراليمپياداعا جولداما العانداردىڭ ەڭ جاسى  - جاڭىل بالتاباەۆا.  ول شاڭعىشىلار اراسىنداعى  LW12 باعدارلاماسى بويىنشا جارىسقا قاتىسۋدا. جاڭىل بالا كەزىنەن مۇگەدەك. سپورتپەن 13 جاسىنان بەرى اينالىسۋدا.  2013 جىلعى قازاقستان چەمپيونى. كەلەسى سپورتشىمىز قايرات قاناپيننىڭ كوزى ناشار كورەدى. ونىڭ جاسى 38-دە.  جۇمىس بارىسىندا كوزىنەن جاراقات العان ەكەن.  ول بياتلون مەن شاڭعى جارىسىنا قاتىسۋدا. سودان كەيىن 41 جاستاعى الەكساندر كوليادين دەگەن سپورتشىمىز دا شاڭعىنىڭ LW4 (تىزەدەن تومەن نەمەسە جوعارى پروتەزى بار سپورتشىلار اراسىنداعى جارىس) باعدارلاماسى بويىنشا باق سىناسۋدا. ايەلدەر اراسىندا 46 جاستاعى ەلەنا مازۋرەنكو شاڭعىشىلاردىڭ  LW6 (قولى پروتەزدەلگەن سپورتشىلار اراسىنداعى جارىس) باعدارلاماسى بويىنشا جارىس جولىنا شىعادى. ول سپورت شەبەرى ارىقازاقستان چەمپيونى. پاراليمپياداعا ءبىزدىڭ ەلدەن  51 جاستاعى ەرلان وماروۆ تا قاتىسۋدا. ول شاڭعىدان  LW2  باعدارلاماسى بويىنشا كۇش سىناسۋدا. جالپى, ەلىمىز سپورتشىلارى  وسى كەزگە دەيىن بەس قىسقى پاراليمپياداعا قاتىسقانىمەن, بىردە-ءبىر مەدال الماعان ەكەن.  وسىعان بايلانىستى ءبىزدىڭ مەملەكەتىمىز سوچي پاراليمپياداسىندا التىن العان سپورتشىعا 50 000, كۇمىس العان وتانداسىمىزعا 35 000, قولا العان سپورتشىعا 25 000 اقش دوللارى كولەمىندە سىياقى تاعايىندادى. قازىر ەلىمىزدە 600 000-عا جۋىق مۇگەدەك ادام بولسا, سونىڭ 15 مىڭى سپورتپەن شۇعىلدانادى داستان كەنجالين. دەرەككوز. http://www.paralympic.kz. فوتو: 112.ua.