ۇشاقتىڭ جوعالۋىنا نە سەبەپ؟

مالايزيالىق ەڭ ءىرى اۋە كومپانياسىنىڭ بىرىنە قاراستى Boeing 777 اۋە لاينەرى كۋالا-لۋمپۋر قالاسىنان بەيجىڭگە بەت الىپ ۇشىپ شىققاننان كەيىن ەكى ساعاتتان سوڭ, بەلگىسىز جاعدايدا جوعالىپ كەتكەن. ۇشاق بورتىندا 12 ەكيپاج مۇشەسى جانە الەمنىڭ 14 ەلىنەن 227 جولاۋشى بولعان كورىنەدى. الدىن الا مالىمەتتەر بويىنشا, ولاردىڭ 154-ءى قىتاي ازاماتتارى بولىپ تابىلادى. سونىمەن بىرگە, ۇشاقتا مالايزيانىڭ – 38, ءۇندىستاننىڭ – 5, يندونەزيانىڭ – 7, اۆستراليانىڭ – 7, اقش-تىڭ – 4, فرانتسيانىڭ 3 ازاماتى, جاڭا زەلانديا, كانادا جانە ۋكراينانىڭ – 2-دەن, سونىمەن بىرگە, رەسەي مەن نيدەرلاندىدان ءبىر-بىردەن ازاماتتار بولعان. جوعالىپ كەتكەن Boeing 777 ۇشاعىن ىزدەۋ وپەراتسياسىنا مالايزيانىڭ, قىتايدىڭ, سينگاپۋردىڭ, ۆەتنامنىڭ, ءفيليپپيننىڭ جانە يندونەزيانىڭ اۆياتسيالارى مەن كەمەلەرى قاتىسۋدا. اقش وڭتۇستىك قىتاي تەڭىزىنە ەكى ەسمينەتس جانە ىزدەۋ-قۇتقارۋ جۇمىستارىنا ارنالعان جابدىقتارى بار «وريون» اسكەري ۇشاعىن جىبەردى. ىزدەۋ جۇمىستارىنا جالپى سانى 40 كەمە مەن 22 ۇشاق قاتىسۋدا. الدىن الا جۇرگىزىلگەن تەكسەرۋلەر جوعا­لىپ كەتكەن اۋە لاينەرىنىڭ بورتىندا بوتەن بىرەۋلەردىڭ قۇجاتتارىن پايدالانىپ, ۇشاققا وتىرعان ەكى جولاۋشىنىڭ بولعانىن انىقتاپ وتىر. مالايزيا ازاماتتىق اۆياتسيا دەپارتامەنتىنىڭ باسشىسى ازحارۋددين ابدۋل راحماننىڭ ءباسپاسوز ءماسليحاتىندا حابارلاعانىنداي, ۇرلانعان پاسپورتتار بويىنشا ۇشاققا وتىرعان ەكى جولاۋشى قارا ناسىلدىلەر بولعانىمەن, افريكالىقتار ەمەس كورىنەدى. تەرگەۋ انىقتاعانداي, ولاردىڭ ەكەۋى دە بيلەتتى يراننان جاسالعان برون بويىنشا كۋرورتتى پاتتايا قالاسىندا ساتىپ العان ەكەن. سونىمەن بىرگە, كورولدىك پوليتسياسىنىڭ باسشىسى حاليد ابۋ باكار بوگدە تولقۇجاتپەن ۇشاققا وتىرعان ەكى ادامنىڭ ءبىرىنىڭ كىم ەكەندىگىنىڭ بەلگىلى بولعاندىعىن دا ايعاقتاپ وتىر. بىراق, پوليتسيا باسشىسى ونىڭ مالايزيالىق ەمەس ەكەنىن عانا جەتكىزىپ, كۇدىكتىنىڭ ناقتى ۇلتىن ايتۋدان باس تارتقان. قازىرگى ۋاقىتتا ىزدەۋ وپەراتسياسىنا قا­­­تىسۋشىلار لاينەر ديسپەتچەرمەن بايلانىستى جوعالتقاننان كەيىن كۋالا-لۋمپۋر اۋەجايىنا قايتا ورالدى دەگەن نۇسقانى قاراستىرۋدا. انىقتالماعان سوڭعى مالىمەتتەرگە قاراعاندا, وڭتۇستىك قىتاي تەڭىزىنىڭ ۆەتنام جاعالاۋىندا جوعالىپ كەتكەن ۇشاق بولشەكتەرىنە ۇقساس سىنىقتار تابىلعان.