ازەربايجاننىڭ استاناسى باكۋدەگى «شاگان» وليمپيادالىق سپورت كەشەنىندە بوكستان ەرەسەكتەر اراسىنداعى ءداستۇرلى « ۇلى جىبەك جولى -2014» ءتۋرنيرى بولىپ ءوتتى.
وتكەن جەكسەنبىدە مارەسىنە جەتكەن باسەكە قورىتىندىسى بويىنشا قازاق ەلىنىڭ بوكسشىلارى 2 التىن, 1 كۇمىس جانە 1 قولا مەدالعا يە بولدى.
الەمنىڭ 9 ەلىنەن 130 بىلعارى قولعاپ شەبەرلەرى قاتىسقان ايتۋلى جەكپە-جەكتە ەلىمىزدىڭ تالانتتى بوكسشىلارى ولجاس ساتتىباەۆ (52 كگ) پەن زاكير سافيۋللين (60 كگ) تۋرنير جەڭىمپازى اتاندى. ال داۋرەن ەلەۋسىنوۆ (81 كگ) كۇمىس مەدالدى ولجالادى. قولا مەدال ساعادات راحمانقۇلوۆقا بۇيىردى.
«اقتوبە» – سۋپەركۋبوك يەگەرى
سەنبى كۇنى «اقتوبە» كومانداسى ەلىمىزدىڭ بىلتىرعى چەمپيونى قاراعاندىنىڭ «شاحتەر» كلۋبىن قازاقستان سۋپەركۋبوگى ءۇشىن وتكەن ماتچتا 1:0 ەسەبىمەن ۇتتى. كەزدەسۋدە جالعىز دوپتى دانيلو نەكو سوقتى. ول ويىننىڭ 68-مينۋتىندا مارات ءحايرۋلليننىڭ ادەمى پاسىن پايدالانىپ, موكيننىڭ تورىنا توعىتتى. وسى ەسەپ ماتچتىڭ سوڭىنا دەيىن ساقتالىپ قالدى. جالپى, بۇل كەزدەسۋدە «اقتوبە» قارسىلاستارىنا قاراعاندا ادەمى ويىن ورنەگىن كورسەتتى. مۇنى ويىننىڭ سوڭىندا بەرگەن سۇحباتىندا «شاحتەردىڭ» باس جاتتىقتىرۋشىسى ۆيكتور كۋمىكوۆتىڭ ءوزى مويىندادى. داستان كەنجالين, «ەگەمەن قازاقستان».
