«قىمباتتى قازاقستاندىقتار! وتكەن 2021 جىل ەلىمىز ءۇشىن 2020 جىلى بۇكىل الەمدى ءدۇر سىلكىندىرگەن COVID-19 پاندەمياسىنان كەيىن قالپىنا كەلۋگە بايلانىستى قيىن بولدى. پاندەميامەن جانە ونىڭ سالدارىمەن كۇرەس ۇكىمەتتەن ىندەتتىڭ تارالۋىن توقتاتۋ جانە سونىمەن بىرگە حالىق پەن ەل ەكونوميكاسى ءۇشىن ەلەۋلى تەرىس اسەردىڭ الدىن الۋ ءۇشىن بۇرىن-سوڭدى بولماعان شارالار قابىلداۋدى تالاپ ەتتى.
بۇل رەتتە, كۇردەلى جاعدايعا قاراماستان, مەملەكەتتىڭ بارلىق الەۋمەتتىك مىندەتتەمەلەرىن ورىنداۋ قامتاماسىز ەتىلدى» - دەلىنگەن سەرىك شاپكەنوۆتىڭ ۇندەۋىندە.
ءمينيستردىڭ ايتۋىنشا, 2021 جىلعى 1 قاڭتاردان باستاپ جاسىنا بايلانىستى زەينەتاقى مولشەرى 7% - عا, بازالىق زەينەتاقى مەن مەملەكەتتىك جاردەماقى مولشەرى 5% - عا ۇلعايدى.
رەسپۋبليكالىق بيۋدجەتتەن زەينەتاقى, مەملەكەتتىك جاردەماقى تولەۋگە, اتاۋلى الەۋمەتتىك كومەك پەن مەملەكەتتىك الەۋمەتتىك توپتاما بەرۋگە جالپى العاندا 5 ملن الۋشىعا 3,7 ترلن تەڭگە باعىتتالدى.
«2021 جىلدىڭ 11 ايىندا الەۋمەتتىك تاۋەكەلدەر باستالعان كەزدە مەملەكەتتىك الەۋمەتتىك ساقتاندىرۋ قورىنان تولەنەتىن تولەمدەرمەن جالپى سوماسى 309 ملرد تەڭگەگە 1,1 ملن ادام قامتىلدى. 11 ايدا 198,1 مىڭ وتباسىنىڭ 988,8 مىڭ ادامى اتاۋلى الەۋمەتتىك كومەكپەن قامتىلدى. ەڭبەككە قابىلەتتى الۋشىلاردىڭ 75%-ى جۇمىسپەن قامتىلعان جانە جۇمىسپەن قامتۋعا جاردەمدەسۋ شارالارىنا تارتىلعان. ااك الاتىن وتباسىلاردان شىققان 514,5 مىڭ بالا كەپىلدىك بەرىلگەن الەۋمەتتىك توپتامالارمەن قامتاماسىز ەتىلگەن. الەۋمەتتىك سالاداعى 670 مىڭ قىزمەتكەردىڭ جالاقىسىن كەزەڭ-كەزەڭىمەن ارتتىرۋ جالعاستىرىلدى: ءبىلىم بەرۋدە – 25%, دەنساۋلىق ساقتاۋدا – 20-30%, الەۋمەتتىك قامسىزداندىرۋ سالاسىندا – 50%», دەدى ول.
ءمينيستردىڭ كەلتىرگەن مالىمەتىنە سايكەس, ءۇشىنشى توقساننىڭ قورىتىندىسى بويىنشا حالىقتىڭ نومينالدى تابىسى وتكەن جىلدىڭ ۇقساس كەزەڭىمەن سالىستىرعاندا 11,8% – عا, ال ناقتى ماندە – 3,6% - عا ءوستى. 2021 جىلدىڭ ءۇشىنشى توقسانىندا ورتاشا جالاقى 243,7 تەڭگەگە جەتتى, بۇل وتكەن جىلدىڭ ءۇشىنشى توقسانىمەن سالىستىرعاندا 19% - عا جوعارى. بۇل رەتتە ينفلياتسيانى ەسكەرە وتىرىپ, ناقتى ماندە جالاقىنىڭ ءوسۋى 8,8% - دى قۇرادى.
سەرىك شاپكەنوۆتىڭ ايتۋىنشا, حالىقتى جۇمىسپەن قامتۋ بويىنشا ۇلكەن جۇمىس جۇرگىزىلگەن. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن, جۇمىسپەن قامتۋدىڭ جول كارتاسىن جانە باسقا دا مەملەكەتتىك باعدارلامالاردى ىسكە اسىرۋدىڭ ارقاسىندا جۇمىسپەن قامتۋعا جاردەمدەسۋدىڭ بەلسەندى شارالارىمەن 1,3 ملن. ادام قامتىلدى.
«جۇمىسسىزدىق دەڭگەيى 2020 جىلدىڭ ءۇشىنشى توقسانىنداعى 5%-دان ءۇشىنشى توقساندا 4,9% - عا دەيىن, ال جاستار اراسىنداعى جۇمىسسىزدىق 4-تەن 3,7% - عا دەيىن تومەندەدى. 2021 جىلى مەملەكەتتىك ەڭبەك ينسپەكتورلارى قازاقستاندىقتاردىڭ ەڭبەك قۇقىقتارىن قورعاۋ بويىنشا جۇمىستاردى بەلسەندى جۇرگىزدى. قابىلدانعان شارالار ناتيجەسىندە 23,1 مىڭ جۇمىسكەردىڭ الدىنداعى جالاقى بويىنشا بەرەشەك وتەلىپ, ولارعا 5,3 ملرد تەڭگە تولەندى», دەدى مينيستر.
ونىڭ ايتۋىنشا, بىلتىر مۇگەدەكتىگى بار ادامدارعا الەۋمەتتىك قولداۋ كورسەتۋ جۇيەسىن جەتىلدىرۋ بويىنشا دا ۇلكەن جۇمىس جۇرگىزىلگەن. 12 قازاندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى. قۇجاتتا: مۇگەدەكتىكتىڭ I توبى بار ادامداردى كۇتۋ جانە ولارعا ىلەسىپ ءجۇرۋ بويىنشا بىرىڭعاي جاردەماقىنى ەنگىزۋ; الىناتىن جاردەماقىنى ۇلعايتا وتىرىپ, 7 جاستان باستاپ بالالاردى مۇگەدەكتىك توپتارى بويىنشا ءبولۋ; مۇگەدەكتىگى بويىنشا جانە اسىراۋشىسىنان ايىرىلۋ بويىنشا ءبىر مەزگىلدە جاردەماقى الۋ; مۇگەدەكتىگى بار بالالاردى تاربيەلەپ وتىرعان وتباسىلارعا تۇرعىن ءۇي كەزەگىن ساقتاۋ كوزدەلەدى.
«ناتيجەسىندە 15,1 مىڭ ادام I توپتاعى مۇگەدەك ادامدارعا كۇتىم جاساۋ بويىنشا جاردەماقى الدى, 52,7 مىڭ بالا مۇگەدەكتىك توپتارى بويىنشا ءبولىندى, 2,8 مىڭ ادام ءبىر مەزگىلدە مۇگەدەكتىگى بويىنشا جانە اسىراۋشىسىنان ايىرىلۋ بويىنشا جاردەماقى الادى. سونداي-اق, ەرەكشە قاجەتتىلىكتەرى بار ادامدار تۇراقتى تۇراتىن نەمەسە قىزمەت الاتىن مەديتسينالىق-الەۋمەتتىك مەكەمەلەردىڭ قىزمەتىن جەتىلدىرۋگە مۇمكىندىك بەرەتىن بىرقاتار بۇيرىقتارعا وزگەرىستەر ەنگىزىلدى», دەدى سەرىك شاپكەنوۆ.
ءمينيستردىڭ حابارلاۋىنشا, الەۋمەتتىك جانە كاسىبي بەيىمدەۋ ماقساتىندا رەسپۋبليكانىڭ بارلىق وڭىرلەرىندە 19 «Ten Qogam» ورتالىعى جۇمىس ىستەيدى. الەۋمەتتىك وڭالتۋ قىزمەتتەرىن كەڭەيتۋ ءۇشىن بالالارعا ارنالعان 6 شاعىن جيناقتى وڭالتۋ ورتالىعى اشىلدى.
«مينيسترلىك مۇگەدەكتىكتى سىرتتاي انىقتاۋ بويىنشا پيلوتتىق جوبانى قازاقستاننىڭ بارلىق وڭىرلەرىندە ىسكە اسىرۋعا كىرىستى. مەديتسينالىق-الەۋمەتتىك ساراپتاما يەسىزدەندىرىلگەن مەديتسينالىق قۇجاتتاردىڭ نەگىزىندە, سىرتتاي, كورسەتىلەتىن قىزمەتتى الۋشى مەن كورسەتىلەتىن قىزمەتتى بەرۋشى اراسىنداعى بايلانىسسىز جۇرگىزىلەدى. جوبانى ءساتتى جۇزەگە اسىرعان جاعدايدا ءوتىنىش بەرۋشىلەر تەك مەديتسينالىق ۇيىمعا جۇگىنەدى. بۇدان باسقا, الەۋمەتتىك-ەڭبەك سالاسىندا مەملەكەتتىك قىزمەتتەردى الۋ راسىمدەرىن جەڭىلدەتۋ ءۇشىن مينيسترلىك ولاردى تسيفرلاندىرۋ بويىنشا بەلسەندى جۇمىس جۇرگىزۋدە. بۇگىنگى كۇنى ءبىز قىزمەتتەردىڭ 92% - ىن تسيفرلاۋدى قامتاماسىز ەتتىك, 45 قىزمەتتىڭ 41-ءى ەلەكتروندىق تۇردە كورسەتىلەدى, ولاردىڭ 21-ءى بەلسەندى», دەدى مينيستر.
ازاماتتاردىڭ جۇمىسپەن قامتۋ سالاسىنداعى مۇمكىندىكتەرىن كەڭەيتۋ ءۇشىن ەلەكتروندىق ەڭبەك بيرجاسى پورتالى جۇمىس ىستەيدى. ەندى رەسۋرستا جۇمىسپەن قامتۋ ورتالىقتارىنىڭ قىزمەتتەرى قولجەتىمدى, كاسىبي باعىتتاردىڭ كەڭ سپەكترى بويىنشا ونلاين كۋرستار سەرۆيسى ىسكە قوسىلدى, جۇمىس پەن كادرلاردى ىزدەۋ ەاەو ەلدەرى شەڭبەرىندە «شەكاراسىز جۇمىس» جوباسى شەڭبەرىندە مۇمكىن بولدى.
«وتكەن جىلى ەلىمىزدىڭ يگىلىگى ءۇشىن جاۋاپتى ەڭبەك ەتىپ, ءارى قاراي ونىڭ دامۋىنا ءوز ۇلەسىن قوسۋعا دايىن بارلىق ادامدارعا العىس ايتقىم كەلەدى. الداعى جىل بىزگە جاڭا پەرسپەكتيۆالار اشادى, ياعني جاڭا مىندەتتەر پايدا بولادى. ءبىزدىڭ مىندەتىمىز – ازاماتتاردىڭ ءومىر ءسۇرۋ ساپاسىنىڭ وزگەرۋىنە قول جەتكىزۋ. بۇعان تەك بىرلەسكەن قاجىرلى ەڭبەكپەن قول جەتكىزۋگە بولادى. بۇل ءبىزدىڭ قولىمىزدان كەلەتىنىنە سەنىمدىمىن. ەڭبەك جانە حالىقتى الەۋمەتتىك قورعاۋ مينيسترلىگى قىزمەتكەرلەرىنىڭ جانە وڭىرلەردەگى ارىپتەستەرىمىزدىڭ جوعارى كاسىبيلىگى مەن ەڭبەكقورلىعى وسىنداي سەنىمدىلىكتىڭ نەگىزى بولىپ تابىلادى», دەدى ول.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ قازاقتاندىقتاردى جاڭا جىلمەن قۇتتىقتادى.
«قۇرمەتتى ارىپتەستەر مەن وتانداستار! سىزدەردى كەلە جاتقان 2022 جىلمەن شىن جۇرەكتەن قۇتتىقتايمىن! جاڭا جىل – ارقايسىمىز ءۇشىن ەرەكشە مەرەكە. ءبىز ونىمەن ءوز ومىرىمىزدەگى جاقسى وزگەرىستەرگە, تۋعان ەلىمىزدىڭ سەنىمدى دامۋىنا ءۇمىت ارتامىز. 2022 جىلى حالقىمىزدىڭ ءومىر ءسۇرۋ ساپاسى ودان سايىن ارتسىن, وتباسى مەن رۋحاني قۇندىلىقتارىمىز نىعايا ءتۇسسىن دەپ شىن جۇرەكتەن تىلەيمىن! كەلەر جىل ەلىمىز ءۇشىن جاقسىلىق پەن جاسامپازدىق جىلى بولسىن! بارلىق قازاقستاندىقتارعا زور دەنساۋلىق, ءار شاڭىراققا اماندىق, باقىت پەن ماحاببات, قۋانىش پەن ءوزارا تۇسىنىستىك تىلەيمىن!» دەدى ول.
بارلىق قۇقىقتار قورعالعان. inform.kz بەلسەندى سىلتەمەنى پايدالانىڭىز https://www.kazinform.kz/kz/enbek-zhane-halykty-aleumettik-korgau-ministrliginde-2021-zhyldyn-zhumysy-korytyndylandy_a3880403
