دسۇ باسشىسى 2020 جىلى 1,8 ميلليون ادام قايتىس بولسا, 2021 جىلى 3,5 ميلليون ادام قايتىس بولعانىن جانە ناقتى سانى الدەقايدا جوعارى ەكەنىن ايتتى.
«بۇل – ۆيرۋستىڭ ۇزاق مەرزىمدى اسەرىنە تاپ بولعان ميلليونداعان ادامدى قوسپاعانداعى كورسەتكىش. بىراق ءالى دە بيىل پاندەميانىڭ قيىن كەزەڭىن اياقتاپ قانا قويماي, دەنساۋلىق ساقتاۋ سالاسىنداعى قاۋىپسىزدىكتى نىعايتۋ ماسەلەسىن دامىتا الاتىنىمىزعا سەنىمدىمىن. ۇجىمدىق كۇرەستى جاقسارتپاساق, بۇل ۆيرۋس دامىپ, دەنساۋلىق ساقتاۋ جۇيەلەرىنە قاۋىپ توندىرەدى», دەدى تەدروس ادحانوم گەبرەيەسۋس.
ونىڭ ايتۋىنشا, «دەلتا» جانە «وميكرون» شتامدارى ەكى ەسە قاۋىپ توندىرەدى. سونداي-اق بۇل جاعدايلاردىڭ سانىن رەكوردتىق دەڭگەيگە دەيىن ارتتىرىپ, اۋرۋحاناعا جاتقىزۋ دەرەگى مەن قايتىس بولعاندار سانى كۇرت ارتۋىنا اكەلەدى.
ۆاكتسينا ماسەلەسىندە دسۇ-عا مۇشە 194 مەملەكەتتىڭ 92-ءسى 40 پايىزعا جەتپەگەنى ايتىلدى. بۇل كوبىنەسە تابىسى تومەن ەلدەردە بايقالادى. گەبرەيەسۋس 2022 جىلى شىلدەنىڭ باسىندا بارلىق ەلدە حالىقتىڭ 70 پايىزى تولىعىمەن ۆاكتسينا العانىن قالايتىنىن ايتتى.
بۇعان دەيىن دۇنيەجۇزىلىك دەنساۋلىق ساقتاۋ ۇيىمىنىڭ ديرەكتورى تەدروس ادحانوم گەبرەيەسۋس «دەلتا» مەن «وميكرون» شتامدارى جاعدايدى ۋشىقتىرۋى مۇمكىن ەكەنىن ايتقان بولاتىن.
