ساحناداعى وقيعا تاق پەن تاجدەن, باق پەن بايلىقتان ابدەن زەرىگىپ, ءىشى پىسقان ءامىرشى مەن ونىڭ ءۋازىرىنىڭ اراسىنداعى اڭگىمەدەن ءوربيدى. بارىنەن مەزى بولعان سۇلتان ەل ءىشىن ارالاپ ءجۇرىپ ەڭ بيشارا بىرەۋدى تاۋىپ الىپ, بايعۇستى ءبىر كۇنگە ءوز تاعىنا وتىرعىزىپ مازاق ەتپەك بولادى. اقىرى قارابايىر كيىنىپ ءۋازىرىن ەرتىپ الىپ شاحاردىڭ ءىشىن شارلاپ كەتكەن ءامىرشى تاققۇمار تاقىر كەدەي ءابۋ ازاعا كەزدەيسوق كەزىگەدى. ىزدەگەنى وڭاي تابىلا كەتكەن سۇلتان ەسى كەتە قۋانىپ, الگى بيشارانى شاراپقا تويعىزىپ, سىلقيتا ماس قىلىپ, پاتشا سارايداعى ءوزىنىڭ قۇس توسەگىنە جاتقىزىپ قويادى.
وسىلايشا, ءبىر تاڭدا قۇدىرەتى شەكسىز بيلەۋشى بولىپ ويانعان ماسكۇنەم ءابۋ ەندى قولىنا توسىننان تيگەن بيلىكتى ۋىسىنان شىعارماۋعا بەكىنەدى. ءبىر ساتتە مۇلدە وزگەرىپ, قاتال ءامىرشى, قانىپەزەر سۇلتان بولىپ شىعا كەلەدى. پاتشا سارايىن دەرەۋ قاتاڭ تارتىپكە كەلتىرىپ, ابدەن كۇشەيىپ العان ءابۋ, ءتىپتى مۇستافا قاجى بولىپ كيىنگەن ناعىز ءامىرشىنىڭ ءوزىن مازاققا اينالدىرىپ, ايەلىنە دەيىن تارتىپ الادى.
ءابۋ ازانىڭ ءرولىن شەبەر سومداپ شىعىپ, كورەرمەندەردىڭ ىستىق ىقىلاسىنا بولەنگەن تەاتردىڭ كوركەمدىك جەتەكشىسى, باس رەجيسسەرى بااتىربەك شاامبەتوۆ بۇل جولى ءوزىنىڭ مىقتى رەجيسسەر عانا ەمەس, شەبەر اكتەر ەكەنىن دە كورسەتتى.
پرەمەرا اياقتالعان سوڭ وبلىستىق مادەنيەت باسقارماسىنىڭ باسشىسى ەرلان قالماقوۆ جاڭا كومەديا قازاق تەاترىنىڭ قورجىنىنا قوسىلعان جاۋھار دۇنيەنىڭ ءبىرى دەگەن باعا بەرىپ, قويىلىمعا قاتىسقان ارتىستەر ۇجىمىنا جۇرەكجاردى العىسىن ايتتى.
– بۇگىندە شىعارمالارى بىزدە عانا ەمەس, بىرنەشە مەملەكەتتىڭ تەاترلارىندا ساحنالانىپ جاتقان بارزۋ ابدۋراززاكوۆ قوستانايدا ءبىر اي بولىپ, وسى تەاتر ۇجىمىمەن شىعارماشىلىق جۇمىس جۇرگىزدى. بۇگىنگى قويىلىم وسى زالدا وتىرعان ءاربىر كورەرمەنگە ۇلكەن وي سالارى ءسوزسىز, – دەدى باسقارما باسشىسى.
قوستاناي وبلىسى
