مەملەكەت باسشىسى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
اڭگىمەلەسۋ بارىسىندا ەكى ەلدىڭ باسشىلارى حالىقارالىق كۇن تارتىبىندەگى وزەكتى ماسەلەلەر جونىندە, سونىڭ ىشىندە ۋكرايناداعى قوعامدىق-ساياسي احۋالدىڭ دامۋىنا قاتىستى پىكىر الماستى.
نۇرسۇلتان نازارباەۆ قازاقستاننىڭ ستراتەگيالىق سەرىكتەس رەتىندە ۋكرايناداعى از ۇلتتار قۇقىعىن, سونداي-اق, ءوزىنىڭ قاۋىپسىزدىگىنىڭ مۇددەسىن قورعايتىن رەسەيدىڭ ۇستانىمىنا ءتۇسىنىستىكپەن قارايتىنىن اتاپ ءوتتى.
مەملەكەت باسشىسى بارلىق مۇددەلى قاتىسۋشىلار بايىپتىلىق تانىتاتىنىنا جانە كەلىسسوزدەر جولىمەن جاعدايدى تەزدەتىپ قالپىنا كەلتىرۋ شارالارىن قابىلدايتىنىنا ۇمىتتەنەتىنىن ءبىلدىردى.
قازاقستان پرەزيدەنتى ۋكرايناداعى داعدارىستى ەگەمەندىكتى ساقتاۋ نەگىزىندە جانە حالىقارالىق قۇقىق نورمالارىنا سايكەس بەيبىت جولمەن رەتتەۋ قاجەتتىگى تۋرالى ءوزىنىڭ پىكىرىن ءبىلدىردى.
ۋكرايناداعى جاعدايعا نازار اۋدارىلدى
مەملەكەت باسشىسى نۇرسۇلتان نازارباەۆ اقش پرەزيدەنتى باراك وبامامەن تەلەفون ارقىلى سويلەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. اڭگىمەلەسۋ كەزىندە قازاقستان-امەريكا قارىم-قاتىناستارىنىڭ جاي-كۇيى مەن پەرسپەكتيۆالارى, سونداي-اق الداعى 24-25 ناۋرىزدا گااگادا وتەتىن يادرولىق قاۋىپسىزدىك جونىندەگى جاھاندىق سامميتكە دايىندىق بارىسى تالقىلاندى. ەكى مەملەكەتتىڭ باسشىلارى حالىقارالىق جانە وڭىرلىك قاۋىپسىزدىك ماسەلەلەرى جونىندە پىكىر الماستى. ۋكرايناداعى ىشكى ساياسي جاعدايدىڭ دامۋىنا ايرىقشا نازار اۋدارىلدى. قازاقستان مەن اقش پرەزيدەنتتەرى ۋكرايناداعى داعدارىستى وسى ەلدىڭ اۋماقتىق تۇتاستىعىن قامتاماسىز ەتەتىن جانە بارلىق مۇددەلى تاراپتاردى جاقىنداستىرۋعا سەپتىگىن تيگىزەتىن ديپلوماتيالىق ادىستەردى پايدالانا وتىرىپ بەيبىت جولمەن رەتتەۋ قاجەتتىگىن قۋاتتادى. نۇرسۇلتان نازارباەۆ بۇل ءماسەلە ۇدەرىسكە قاتىسۋشىلاردىڭ بارلىعىنىڭ كەلىسسوزى ارقىلى عانا شەشىلۋگە ءتيىس ەكەنىن اتاپ ءوتتى. ءوز كەزەگىندە باراك وباما ۋكرايناداعى جاعدايدى رەتتەۋ ءۇشىن بۇۇ نەمەسە ەقىۇ ءتارىزدى حالىقارالىق ۇيىمداردىڭ اتسالىسۋىمەن پارمەندى تەتىكتەر قالىپتاستىرۋ قاجەتتىگىنە توقتالدى.مۇددەلى تاراپتار ۇنقاتىسۋى – ۇتىمدى قۇرال
مەملەكەت باسشىسى نۇرسۇلتان نازارباەۆ گەرمانيا فەدەرالدىق كانتسلەرى انگەلا مەركەلمەن تەلەفون ارقىلى سويلەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. ەكى ەلدىڭ باسشىلارى قازاقستان-گەرمانيا ەكىجاقتى قارىم-قاتىناستارىنىڭ جاي-كۇيى مەن پەرسپەكتيۆالارىن, سونداي-اق, قازاقستان پرەزيدەنتىنىڭ گەرمانياعا ساپارى بارىسىندا قول جەتكىزىلگەن ۋاعدالاستىقتار نەگىزىندەگى ساۋدا-ەكونوميكالىق ىنتىماقتاستىق اياسىن كەڭەيتۋ ماسەلەلەرىن تالقىلادى. بۇعان قوسا, نۇرسۇلتان نازارباەۆ پەن انگەلا مەركەل ۋكرايناداعى ىشكى ساياسي احۋالدىڭ دامۋىمەن قاتار, حالىقارالىق كۇن تارتىبىندەگى وزەكتى ماسەلەلەر ءجونىندە پىكىر الماستى. اڭگىمەلەسۋ بارىسىندا قازاقستان پرەزيدەنتى ۋكراينالىق داعدارىستى بارلىق مۇددەلى تاراپتار اراسىنداعى ۇنقاتىسۋ جولىمەن, بۇل ەلدىڭ اۋماقتىق تۇتاستىعىن قامتاماسىز ەتۋ, سونداي-اق, ءوزارا كۇش كورسەتۋ مەن ۋلتيماتۋمداردان باس تارتۋ ءۇشىن حالىقارالىق بىتىمگەرشىلىكتىڭ ىقتيمال تەتىكتەرىن پايدالانا وتىرىپ, ديپلوماتيالىق تۇرعىدا رەتتەۋدىڭ ماڭىزدىلىعىن قۋاتتادى. نۇرسۇلتان نازارباەۆ قازاقستان قاجەت بولعان جاعدايدا ۋكرايناداعى احۋالدىڭ بەيبىت جولمەن شەشىلۋى ءۇشىن ىمىرالى شەشىمدەردى ازىرلەۋگە ءوزىنىڭ سىندارلى ۇلەسىن قوسۋعا دايىن ەكەندىگىن جەتكىزدى.
