ارداقتى انانىڭ جامباسى تيگەن جەر اۋدان ورتالىعىنان ەلۋ شاقىرىم قاشىقتا ورنالاسقان سۆوبودنىي اۋىلدىق وكرۋگىنىڭ ىرگەسى ەكەن. زيرات تۇرعان جەردى جەرگىلىكتى حالىق بۇعان دەيىن «زارباپ توبە» دەپ اتاپ كەلىپتى. اۋىل تۇرعىنى بولات مۇساتاەۆ قاريانىڭ ايتۋىنا قاراعاندا, بۇل توبەگە ەرتە كەزدە زيارات ەتىپ كەلۋشىلەر تىم كوپ بولعان ەكەن. ءتىپتى كەيبىر ولكەتانۋشىلار زارباپ انا اۋليەنىڭ ءوز كىندىگىنەن تاراعان دەيتىن پايىم ايتۋدا. وعان دالەل – نىساننىڭ ىرگەسىنە قويىلعان تانىستىرۋ تاقتادا «زارباپ انا قوجا احمەت ءياساۋيدىڭ ۇرپاعى» دەپ ايقارا ارىپتەرمەن جازىلىپتى (سۋرەتتە).
ءبىر وكىنەرلىك جاعداي, قاسيەتتى انا زيراتى رەسپۋبليكالىق, بولماسا وبلىستىق قاسيەتتى نىساندار تىزىمىنە تىركەلمەگەن. «بۇل زيرات ۇلى دالا مەن تۇركىستان ايماعىنىڭ ورتاعاسىرلىق رۋحاني تاريحىمەن بايلانىستى دەگەن پىكىردەمىز. زارباپ انا قوجا احمەت ياساۋي ۇرپاعىنان قازاق جەرىنىڭ سولتۇستىك دالالىق بولىگىندە عاجايىپ ءىز قالدىرعان تۇلعا. بۇل تاقىرىپتى بۇدان ءارى زەرتتەۋ يسلام ءدىنىنىڭ, سونىڭ ىشىندە قوجا احمەت ياساۋي ءىلىمىنىڭ قازاق جەرىنە تاراۋ بارىسىن ساراپقا سالۋعا, وي تۇيۋگە مۇمكىندىك بەرەدى», دەيدى ولكەتانۋشى-عالىم جامبىل ومار ۇلى.
اڭىز-اڭگىمەلەرگە قۇلاق تۇرسەك, زارباپ انانىڭ جۇبايى ساپولات ەرتە دۇنيە سالىپ, جەتىم قالعان ەكى ۇلى شايكوز, بارجاقسىنى ءوزى اسىراپ جەتكىزىپتى. قازىر وسى ەكى ۇلدىڭ ۇرپاعى قوس رۋلى ەلگە اينالىپ, ورتا ءجۇز قۇرامىندا ۋاق تايپاسىنىڭ ۇلكەن اتالىق توبىن قۇراپ وتىرعان كورىنەدى.
سونداي-اق توبە باسىنداعى زارباپ انا زيراتى اينالاسىندا توعىز قابىردىڭ سۇلباسى ساقتالعان. مۇمكىن, ولار دا بەلگىلى تۇلعالار, بالكىم ۇرپاقتارى بولار, دەيدى جەرگىلىكتى حالىق. ەل اۋزىنداعى اڭگىمەلەرگە سۇيەنسەك, زارباپ انا تۇركىستاننان سەگىز جاسىندا وسى جەرگە كەلگەن-مىس. كەيبىر دەرەكتەردە بويجەتكەن قىز رەتىندە ۇزاتىلىپ كەلگەن دەگەن دە نۇسقا بار.
ەل اراسىندا زارباپ انانىڭ كەرەمەتى تۋرالى اڭگىمەلەر كوپ ساقتالعان. اۋليە انا ءوزى جاتقان توبەنىڭ ۇستىنە شىعىپ, جىلدىڭ قالاي وتەتىندىگى, الدا بولاتىن قۋانىشتار مەن قاۋىپ-قاتەرلەر تۋرالى بولجام ايتادى ەكەن. سوعان قاراعاندا, زارباپ انا تابيعاتتىڭ تىلسىم سىرىن بىلەتىن, اي ەسەبىنە جەتىك, اۋا رايى مەن مەزگىل قۇبىلىسىن اڭداي الاتىن سۇڭعىلا ادام بولعانى انىق.
