2015 جىلى ەنەرگەتيكا مينيسترلىگى سەمەي پوليگونىنىڭ جەرلەرىن اۋىل شارۋاشىلىعى ماقساتىندا پايدالانۋعا تىيىم سالعان بولاتىن. بيىل ءوڭىردىڭ كوپتەگەن اۋداندارىندا اۋا مەن سۋدىڭ جاعدايى ادامدارعا قاۋىپ توندىرمەيتىنى حابارلاندى. وسى ارادا ۆەدومستۆو باسشىسى پوليگون جەرلەرىن پايدالانۋعا رۇقسات بەرۋ جونىندە تۇسىنىكتەمە بەردى.
ءمينيستردىڭ ايتۋىنشا, اتالعان ماسەلەنى رەتتەيتىن زاڭ جوباسى قر پارلامەنتى ءماجىلىسىنىڭ قاراۋىندا جاتىر.
«قازىر ماجىلىستە مينيسترلىك ازىرلەگەن جاڭا زاڭ جوباسى تالقىلانۋدا. بۇل سەمەي پوليگونى بويىنشا ماسەلەلەردى رەتتەيتىن زاڭ جوباسى بولادى. ءبىز ءتيىستى تالداۋ جۇرگىزدىك. ونىڭ مالىمەتىنشە, سەمەي پوليگونىنىڭ جالپى اۋدانى 18 مىڭ شارشى شاقىرىمدى قۇرايدى. ولاردىڭ جارتىسى اۋىل شارۋاشىلىعىنىڭ پايداسىنا بەرىلۋى مۇمكىن ۋچاسكەلەر. ياعني, وسى زاڭ جوباسى ءماجىلىس پەن سەناتقا وتكەننەن كەيىن اتالعان ۋچاسكەلەر پايدالانۋعا بەرىلەدى دەپ ۇمىتتەنەمىز», دەدى ەنەرگەتيكا ءمينيسترى.
