«مەملەكەت باسشىسىنىڭ قر پرەزيدەنتىنىڭ جانىنداعى ۇلتتىق قوعامدىق سەنىم كەڭەسىنىڭ ءۇشىنشى وتىرىسىنىڭ قورىتىندىسى بويىنشا بەرگەن تاپسىرماسىنا سايكەس, جوو-لاردى جىكتەۋ مودەلى ازىرلەندى, ونى جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ جانە وڭتايلاندىرۋ جونىندەگى كەڭەس ماقۇلدادى. سونىمەن قاتار جوعارى وقۋ ورىندارىن جىكتەۋدىڭ بۇل مودەلى «قازاقستان رەسپۋبليكاسىنىڭ ءبىلىم بەرۋ سالاسىنداعى كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قاراستىرىلعان», دەپ جازدى ەرالى توعجانوۆ دەپۋتاتتىق ساۋالعا بەرگەن جاۋابىندا.
جوو-لار كەلەسى توپتار بويىنشا بولىنەدى:
- ءبىرىنشى توپ - حالىقارالىق جانە ۇلتتىق دەڭگەيدەگى جوو-لار;
- ەكىنشى توپ - وڭىرلىك دەڭگەيدەگى جوو-لار;
- ءۇشىنشى توپ - سالالىق دەڭگەيدەگى جوو-لار.
قالعان جوو-لار اتالعان توپتاردان تىس بولادى, ياعني ءتورتىنشى توپقا جاتادى. العاش رەت قۇرىلاتىن جوو ءتورتىنشى توپقا جاتادى.
جوعارى وقۋ ورىندارىن توپتار بويىنشا جىكتەۋ ءبىلىم بەرۋ, عىلىمي قىزمەت, ينتەرناتسيونالداندىرۋ ناتيجەلەرىنە, سونداي-اق ەل, ءوڭىر جانە (نەمەسە) سالا ەكونوميكاسىنا قوسقان ۇلەسىنە نەگىزدەلەتىن بولادى.
العاشقى ءۇش توپقا كىرەتىن جوعارى وقۋ ورىندارى ءۇشىن ءبىلىم بەرۋ باعدارلامالارىن اككرەديتتەۋ, ولاردىڭ كاسىبي ستاندارتتارعا سايكەستىگى قاجەت. عىلىمي قىزمەتتىڭ تابىستىلىعى پروفەسسورلىق-وقىتۋشىلىق قۇرامنىڭ دايەكسوزدىلىك دەڭگەيىنە, عىلىمي كوللابوراتسياعا, عىلىمي جوبالاردى كوممەرتسيالاندىرۋدان تۇسەتىن كىرىستەرگە, رەيتينگتىك جۋرنالدارداعى جاريالانىمدار سانىنا بايلانىستى ايقىندالاتىن بولادى.
