باستى ايقاسقا دەيىن بىرنەشە قازاقستاندىق بوكسشى شارشى الاڭعا كوتەرىلىپ, سپورت سارايىنا جينالعان جانكۇيەرلەر مەن تەلەديدار ارقىلى تاقىم قىسىپ وتىرعان كورەرمەنگە تارتىستى جەكپە-جەك ۇسىندى.
بوكس كەشىنىڭ شىمىلدىعىن وتانداسىمىز ەلحان تابىنباەۆ (2-0, 1 كو) اشىپ بەردى. ازەربايجان وكىلى ەلمار ابدۋللاەۆپەن قولعاپ تۇيىستىرگەن ەلحان تورەشىلەردىڭ ءبىراۋىز شەشىمىمەن جەڭىسكە جەتتى. كاسىپقوي بوكستاعى كارەراسىن جەڭىلىسپەن باستاعان جەرلەسىمىز وسىلايشا قاتارىنان ءۇشىنشى جەڭىسىنە قول جەتكىزدى. تابىنباەۆتان سوڭ رينگكە شىققان ءبىرىنشى جارتىلاي ورتا سالماقتاعى قازاقستاندىق اقنيەت ءالىمباي دا 19 جاستاعى وزبەكستاندىق قارسىلاسى زاينوبيددين سوبيروۆتان ءتورت راۋند قورىتىندىسى بويىنشا ۇپاي سانىمەن باسىم ءتۇستى.
ءۇشىنشى بولىپ شارشى الاڭعا كوتەرىلگەن اسقات جانتۇرسىنوۆ (5-0, 4 كو) جەرلەستەرىنىڭ جەڭىستى جولىن جالعاي المادى. كاسىپقوي بوكستاعى تىرناقالدى جەكپە-جەگىن وتكىزگەن ازەربايجاندىق بوكسشى سۋرات گاراەۆ التى راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىسكە جەتتى.
كەزىندە 75 كيلو سالماقتا ەل چەمپيونى اتانىپ, ۇلتتىق قۇراما ساپىندا بىرقاتار بايراقتى باسەكەدە ەل نامىسىن قورعاعان ساپارباي ايداروۆ دا كەشەگى بوكس كەشىندە ءوزىنىڭ التىنشى كەزدەسۋىن وتكىزىپ, قارسىلاسىن ەش كۇمانسىز جەڭدى. ەكىنشى ورتا سالماقتا جۇدىرىقتاساتىن ول ۋكراينالىق اندرەي شەمەتوۆپەن (6-1-1, 4 كو) كەزدەستى. التى راۋندقا جوسپارلانعان ايقاس ايداروۆتىڭ پايداسىنا اياقتالدى. سونىمەن قاتار داۋلەت داۋكەنوۆ تە وزبەكستاندىق قارسىلاسىن ۇپاي سانىمەن قاپى قالدىردى.
بوكس كەشىندەگى العاشقى نوكداۋن التىنشى جۇپتىڭ جەكپە-جەگىندە تىركەلدى. قازاقستاندىق ايدار شارىباەۆ (8-1, 7 كو) رەسەيلىك شوحرۋح ابديەۆتى (9-2-1, 3 كو) ءۇشىنشى راۋندتا ەكى مارتە ەسەڭگىرەتكەنىمەن, ەكى بوكسشى دا تولىق التى راۋند جۇدىرىقتاسىپ شىقتى. ناتيجەسىندە, شارىباەۆ ۇپاي سانىمەن باسىم ءتۇستى.
تاۋەلسىزدىك كۇنىنە ارنالعان بوكس كەشىندە قىزدار دا شارشى الاڭدا ءوز ونەرلەرىن ورتاعا سالدى. ۇلتتىق قۇراماداعى داۋ-دامايعا بايلانىستى كاسىپقوي بوكسقا اۋىسۋعا ءماجبۇر بولعان انگەلينا لۋكاس دەبيۋت جەكپە-جەگىندە جەڭىسكە جەتتى. ۋكراينالىق دەبيۋتانت سۆەتلانا ۆاسيلەۆسكايامەن جۇدىرىقتاسقان ول ءتورت راۋندتىڭ قورىتىندىسى بويىنشا تورەشىلەردىڭ شەشىمىمەن ۇزدىك دەپ تانىلدى.
ءبىر قىزىعى, بوكس كەشى اياقتالماي جاتىپ-اق لۋكاس-ۆاسيلەۆسكايا ايقاسى وسى كەشتىڭ ۇزدىك جەكپە-جەگى دەپ تانىلىپ, ەكەۋىنە 5 مىڭ اقش دوللارى كولەمىندە قارجىلاي سىياقى تابىستالدى.
داۋرەن ەلەۋسىنوۆ وسى بوكس كەشىنىڭ نەگىزگى جەكپە-جەكتەرىمەن قوسا, مەرزىمىنەن بۇرىن اياقتالعان كەزدەسۋلەر سەرياسىن دا باستاپ بەردى. كاسىپقوي بوكستا 12-ءشى كەزدەسۋىن وتكىزگەن ەلەۋسىنوۆتەردىڭ ۇلكەنى ازەربايجاندىق ءالي ماممادوۆتى (13-4, 3 كو) ءۇش راۋند بويى اۋىر سوققىنىڭ استىنا الىپ, قارسىلاسىن باس كوتەرتپەدى. ازەربايجاندىقتىڭ جەكپە-جەكتى ءارى قاراي جالعاستىرسا ومىرىنە قاۋىپ تونەتىنىن ەسكەرگەن تورەشى ايقاستى مەرزىمىنەن بۇرىن توقتاتۋعا ءماجبۇر بولدى.
داۋرەننەن كەيىن شارشى الاڭعا شىققان جانقوش تۇراروۆ (24-0, 17 كو) قارسىلاسىن نەبارى 45 سەكۋندتا سۇلاتىپ سالدى. مىسىردان كەلگەن ابدۋمون سايد (22-1-1, 11 كو) وتانداسىمىزعا ءبىر مينۋت تا قارسىلىق كورسەتە المادى. جانقوشتىڭ سول قولىمەن ىشتەن ۇرعان اۋىر سوققىسىنان كەيىن قارسىلاسى ەكى بۇكتەلىپ, ورنىنان تۇرا الماي قالدى. ءسويتىپ, 10 راۋندقا جوسپارلانعان باسەكە ءبىرىنشى راۋندتىڭ ءبىرىنشى مينۋتى اياقتالماي جاتىپ ءوز مارەسىنە جەتتى.
بوكس كەشى اياسىندا ەكىنشى جەڭىل سالماقتاعى ەرجان زاليلوۆ (12-3-2, 6 KO) پەن ەسكەندىر حارسان اراعا 20 جىل سالىپ قازاقستان چەمپيونى اتاعىن ساراپقا سالدى. ەكى بوكسشى العاشقى راۋندتى تەڭ دارەجەدە وتكىزگەنىمەن, بار ماسەلە ەكىنشى راۋندتىڭ سوڭىندا شەشىلدى. بوكسشىلاردىڭ ۇزىلىسكە شىعۋىنا 30 سەكۋند قالعاندا ءزاليلوۆتىڭ سول قولىمەن جاساعان سوققىسى ەسكەندىردى اۋىر نوكاۋتقا جىبەردى. سوققىنىڭ اۋىر بولعانى سونشالىقتى حارسان ۇزاق ۋاقىت وزىنە كەلە الماي, رينگ ورتاسىنان تۇرا الماي جاتتى. دارىگەرلەردىڭ كومەگىنەن كەيىن عانا بوكسشى وزىنە كەلىپ, ءارى قاراي ونى اۋرۋحاناعا الىپ كەتتى.
اۋىر سالماقتاعى بوكسشىمىز يۆان دىچكو دا (10-0, 10 كو) مەرزىمىنەن بۇرىن جەڭىسكە جەتتى. كاسىپقوي بوكستا 11-ءشى ايقاسىن وتكىزگەن ول رەسەيلىك الەكساندر ۋستينوۆپەن (36-5-1, 27 كو) كەزدەسىپ, تەحنيكالىق نوكاۋتپەن باسىم ءتۇستى. دىچكونىڭ سەريالى سوققىلارىنان كەيىن رەسەيلىك بوكسشىنىڭ باپكەرلەرى شارشى الاڭعا ورامال لاقتىرىپ, شاكىرتىنىڭ جەڭىلگەنىن مويىندادى. وسىلايشا, يۆان دىچكو 11-ءشى ايقاسىن دا ەرتە اياقتادى.
دىچكونىڭ جارقىن جەڭىسىنەن كەيىن جانكۇيەرلەر كوپتەن كۇتكەن دانيار ەلەۋسىنوۆ (10-0, 6 كو) پەن ارگەنتينالىق حۋان ەرنان لەاو (15-1, 4 كو) IBO تۇجىرىمىنىڭ التىن بەلبەۋىن ساراپقا سالعان نەگىزگى جەكپە-جەك باستالدى.
دانيار ءبىرىنشى مينۋتتان بەلسەندى قيمىلداپ, شارشى الاڭنىڭ قوجايىنى كىم ەكەنىن بىردەن اڭعارتتى. ەكىنشى راۋندتا قارقىنىن ارتتىرعان ەلەۋسىنوۆ وڭتۇستىك امەريكادان كەلگەن قارسىلاسىن ەكى رەت ەسەڭگىرەتىپ الدى. بىراق تەز ەس جيىپ ۇلگەرگەن لەاو كەزدەسۋدى ءارى قاراي جالعاستىرۋعا دايىن ەكەنىن ايتتى. كەيىنگى ءۇش مينۋتتا دا ارگەنتينالىق تاعى ءبىر رەت نوكداۋنعا ءتۇستى.
حۋان ەرنان لەاو العاشقى ءۇش راۋندتا ءۇش مارتە نوكداۋن العانىنا قاراماستان تولىق 12 راۋند جۇدىرىقتاسىپ شىقتى. كەيىنگى راۋندتاردا ەلەۋسىنوۆ تە قارسىلاسىنا ەش امال-ايلا جاساي المادى. 12 راۋندتىڭ قورىتىندىسى بويىنشا تورەشىلەر جەڭىستى ءبىراۋىزدان ەلەۋسىنوۆكە بەرىپ, قازاق بوكسشىسى جارتىلاي ورتا سالماقتا IBO چەمپيونى اتاندى.
وسىلايشا, دانيار ەلەۋسىنوۆ تولىققاندى بەس چەمپيوندىق بەلبەۋدىڭ بىرەۋىن يەلەنگەن بەسىنشى قازاقستاندىق بوكسشىنىڭ قاتارىنا قوسىلدى. مۇنىڭ الدىندا IBO تۇجىرىمىنىڭ چەمپيوندىق بەلدىگىن ۆاسيلي جيروۆ, گەننادي گولوۆكين, جانات جاقيانوۆ پەن بەيبىت شۇمەنوۆ جەڭىپ العان ەدى.
