3 قاراشادا پوليتسەيلەر التاي اۋدانىندا ايۋ اۋلاعان ءبىر ازاماتتى انىقتاسا, 6 قاراشا كۇنى گلۋبوكوە اۋدانىنىڭ تارحانكا اۋىلىندا ايۋ اتىپ العان تاعى ءبىر كۇدىكتىنى قولعا تۇسىرگەن. قىسقى ۇيقىعا قامدانعان قوڭىر قوڭدانىپ, تەرىسى جىلتىراعان سوڭ براكونەرلەر قىزىعاتىن دا شىعار, كىم ءبىلسىن.
التاي اۋدانىنىڭ 45 جاستاعى تۇرعىنى تۇرسۇعىن اۋىلىنىڭ ماڭىندا تاعىنىڭ ىزىنە تۇزاق قۇرعان. ايۋدىڭ ەتىن ازىق ەتىپ, تەرىسىن ساتۋ ءۇشىن اۋلاعان كورىنەدى. پوليتسيا دەپارتامەنتىنىڭ باستىعى ساعات ماديەۆتىڭ ايتۋىنشا, اتالعان فاكتى بويىنشا قىلمىستىق كودەكستىڭ 337-بابى, ياعني زاڭسىز اڭ اۋلاۋ بويىنشا سوتقا دەيىنگى تەرگەۋ باستالعان. كەلتىرىلگەن شىعىن سوماسى انىقتالىپ جاتىر. تەرگەۋ-تەكسەرۋ جۇمىستارى اياقتالعان سوڭ كۇدىكتى ازامات ءۇش جىلعا باس بوستاندىعىنان ايىرىلۋى مۇمكىن.
ىزىنشە, 6 قاراشادا پوليتسيا قىزمەتكەرلەرى تارحانكا اۋىلىنىڭ ماڭىندا ءوزىنىڭ تىركەلگەن مىلتىعىمەن ايۋ اتقان وسكەمەن قالاسىنىڭ 51 جاستاعى تۇرعىنى انىقتالدى. كۇدىكتىنىڭ ايتۋىنشا, ايۋدى ەتىن ساتۋ ماقساتىندا اتقان ەكەن. سونداي-اق مايماقتىڭ تابانىن دا ساقتاپ قويعان.
ايتىلعانداي, تارحانكا توڭىرەگىندە ايۋ اتقان ازامات تا ءۇش جىلعا باس بوستاندىعىنان ايىرىلۋى مۇمكىن. جالپى, جەدەل الدىن الۋ ءىس-شاراسى كەزىندە 360-تان استام رەيدتىك شارا وتكىزىلىپ, 605 تابيعاتتى قورعاۋ زاڭناماسى بۇزىلعان. ونىڭ 394-ءى اڭ اۋلاۋعا قاتىستى. سونىمەن قاتار 10 براكونەر انىقتالىپ, ولارعا قاتىستى قىلمىستىق ءىس قوزعالدى. ءيا, تابيعاتقا, جانۋارلار دۇنيەسىنە زالال كەلتىرگەندەرگە جازا قاتاڭ. جازادان بۇرىن اركىم تۋعان جەرىنە, وسكەن ورتاسىنا قۇرمەتپەن قاراۋى كەرەك شىعار. جەدەل الدىن الۋ شاراسى اياقتالعانىمەن, تابيعاتتى قورعاۋ جۇمىستارى جالعاسا بەرمەك.
شىعىس قازاقستان وبلىسى
