فرانتسيانىڭ تالعامپاز كورەرمەندەرىن تاڭعالدىرعان قازاقستاندىق ارتىستەر وتاندىق كلاسسيكالىق مۋزىكانىڭ ۇزدىك ۇلگىلەرىن پاش ەتتى. بۇل – قازاقستاندىق تريونىڭ فرانتسيا ەلىندەگى ءۇشىنشى كونتسەرتى.
ۇجىمنىڭ حالىقارالىق گاسترولى نانسي قالاسىنداعى مەريانىڭ تاريحي سارايىندا ءوتتى. اتاقتى ورتاعاسىرلىق ستانيسلاۆ الاڭىندا ورنالاسقان بۇل زال باي تاريحىمەن جانە قايتالانباس اكۋستيكاسىمەن ەرەكشەلەنەدى. كونتسەرتتى تاماشالاۋعا كەلگەن كورەرمەندەردىڭ قاراسى قالىڭ بولدى.
تريو ارتىستەرى – قر ەڭبەك سىڭىرگەن قايراتكەرى, ۇجىمنىڭ نەگىزىن قالاۋشى تيمۋر ۋرمانچەەۆ (فورتەپيانو), حالىقارالىق بايقاۋلاردىڭ لاۋرەاتتارى مۇرات ناربەكوۆ (ۆيولونچەل) پەن شولپان مانكەەۆا (سكريپكا) وتاندىق مۋزىكالىق ونەردى جوعارى دەڭگەيدە كورسەتە ءبىلدى. ولار روزا باعلانوۆا اتىنداعى قازاق كونتسەرتتىڭ قىزمەتكەرلەرى ەكەنىن اتاپ وتكەن ءجون.
بۇل كەشتە قازاقستاندىق كومپوزيتورلاردىڭ تۋىندىلارى مەن ەۋروپالىق كلاسسيكا جاۋھارلارى شىرقالدى. شەتەلدىك كورەرمەندەردى تامساندىرعان ارتىستەر حالقىمىزدىڭ ۇلتتىق قۇندىلىقتارى كورىنىس تاپقان «ياپۋراي» جانە «كوروعلى» تۋىندىلارىن ۇسىندى. سونداي-اق س.راحمانينوۆ, ك.دەبيۋسسي, ي.برامس سىندى الەمدىك كومپوزيتورلارىنىڭ ۇزدىك شىعارمالارى ورىندالدى.
كورەرمەن قاۋىم قازاقستاندىق تريونىڭ شەبەرلىگىنە ءتانتى بولىپ, زور ىقىلاس ءبىلدىردى.«قازاقستاندا كلاسسيكالىق ونەردىڭ جوعارى دەڭگەيدە دامىعاندىعىن بىلمەپپىن. مۋزىكا ارقىلى قازاقستان حالقىنىڭ تاريحىن سەزىنە الدىم. تريو ارتىستەرى بىزگە ناعىز مەرەكە سىيلادى, العىسىمدى بىلدىرەمىن», دەپ جەتكىزدى ءوز پىكىرىن Abdelrhani Azzab ەسىمدى كورەرمەن.
الداعى ۋاقىتتا «FORTE-TRIO» ۇجىمى حالىقارالىق گاسترولدەر اياسىنداعى سوڭعى كونتسەرتتەرىنە دايىندىعىن باستايدى. سوڭعى كونتسەرت 22 جەلتوقسان كۇنى ليون قالاسىنداعى اتاقتى «موliere» زالىندا وتكىزىلمەك.
