سەمينارعا قر بعم مەكتەپكە دەيىنگى جانە ورتا ءبىلىم كوميتەتىنىڭ باس مامانى گۇلميرا كۋلساريەۆا, رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنىڭ ديرەكتورى ەلدوس نۇرلانوۆ, كورەيانىڭ قازاقستانداعى ەلشىسىنىڭ ورىنباسارى, مينيستر-كەڭىسشى چوي دەحۋن, كورەيتانۋ زەرتتەۋ ورتالىعىنىڭ عىلىم دوكتورى دجاڭ گي حوڭ, وقۋلىق اۆتورى, ءال-فارابي اتىنداعى قازۇۋ شىعىستانۋ فاكۋلتەتىنىڭ پروفەسسورى نۇرجامال الدابەك, 11-سىنىپقا ارنالعان «گەوگرافيا» وقۋلىعىنىڭ اۆتورى, ەلتانۋ, گەوگرافيا جانە ەكولوگيا كافەدراسىنىڭ پروفەسسورى ءباحادۇرحان ءابدىماناپوۆ, BMSO ماماندارى, پەداگوگتەر مەن باسپا ۇيلەرىنىڭ وكىلدەرى قاتىستى.
ءىس-شارا قازاق جانە كورەي تىلدەرىندە ۇيىمداستىرىلدى. جيىن مودەراتورى بولعان ەلدوس بولاتحان ۇلى العاشقى ءسوز كەزەگىن كورەيانىڭ قازاقستانداعى ەلشىسىنىڭ ورىنباسارى, مينيستر-كەڭىسشى چوي دەحۋنگە ۇسىندى.
سپيكەر ۇيىمداستىرۋشىلارعا العىس ايتىپ, بۇل سەميناردىڭ ماقساتىنا توقتالىپ ءوتتى. سونداي-اق قازاقستانمەن ءبىلىم-تاجىريبەمەن الماسۋعا نيەتتى ەكەنىن ءبىلدىردى.
«كورەيا رەسپۋبليكاسىنىڭ عىلىم مينيسترلىگى شەتەل وقۋلىقتارىنا زەرتتەۋ جۇرگىزۋدى 2003 جىلى قولعا الدى. سول ۋاقىتتان بەرى 139 ەلدىڭ 5 200-گە جۋىق وقۋ باسىلىمىندا كورەيا كونتەنتى قالاي بەرىلىپ كەلگەنىن زەردەلەپ, قاجەت بولسا تۇزەتۋلەر ەنگىزدى. قازىرگى تاڭدا قازاقستان وقۋلىقتارىنداعى دەرەكتەردى سارالاۋ ماقساتىن قويدىق. كورەيا مەن قازاقستان اراسىندا ەموتسيونالدىق ۇقساستىق بار. وسىنداي ءوزارا تۇسىنىستىكتى ارتتىرعان ءجون. ەكى ەل تاراپىنىڭ وقۋلىق ازىرلەۋ جانە ساراپتاۋ پروتسەستەرى بويىنشا تاجىريبە الماسۋىنىڭ ماڭىزى جوعارى», دەدى د. چوي.
جيىن سوڭىندا BMSO ديرەكتورى ەلدوس بولاتحان ۇلى ەلشىلىككە قازاق مادەنيەتى مەن سالت-داستۇرىنەن تانىمدى دا تاعىلىمدى مالىمەت ۇسىناتىن كىتاپتار تارتۋ ەتتى.
