مەنىڭ ەڭبەك جولىم سوناۋ تىڭ يگەرۋ جىلدارى باستالدى. 1956 جىلدان باستاپ تىڭگەر جاستارمەن قويان-قولتىق ارالاستىم. قىستا سوۆحوزدىڭ مالىن باعىپ, جازدا تراكتور تىزگىنىنە وتىردىم. ونان كەيىنگى جىلدارى ءار ءتۇرلى جاۋاپتى قىزمەتتەر اتقاردىم. ەلباسىنىڭ ماقالاسىن وقىپ وتىرىپ, ءوزىم كۋا بولعان مىنا ءبىر جاي ەسىمە ورالدى.
ەلباسى سوناۋ توقسانىنشى جىلدارى, العاشقى پرەزيدەنت سايلاۋى قارساڭىندا ءبىزدىڭ وڭىرگە كەلىپ, وبلىس اكتيۆىمەن كەزدەسكەنى ەسىمدە. سول جيىندا نۇرسۇلتان نازارباەۆ مىنبەرگە شىعىپ ۇزاق سويلەدى. ءبىر اڭعارعانىم, ونىڭ ەل جاعدايىنا جەتە قانىقتىعى. الدا تالاي اۋىرتپالىقتار كۇتىپ تۇرعانىن, الايدا ول سىننان وتە الماعان حالىقتىڭ بولاشاعى ب ۇلىڭعىر بولاتىنىن ايتا كەلىپ, حالىققا قيىندىقتان شىعۋ جولدارىن ءتۇسىندىردى. «تاۋەلسىز مەملەكەت قۇرۋ بۇرىن-سوڭدى ءبىزدىڭ تاجىريبەمىزدە بولعان جوق. بىراق دانا حالقىمىزدا «شەشىنگەن سۋدان تايىنبايدى» دەگەن ناقىل بار, ءبىز قازىر كەڭەستىڭ كونەرگەن شاپانىن يىعىمىزدان ىسىرىپ تاستاپ, تاۋەلسىزدىك دەگەن الىپ مۇحيتتىڭ جاعاسىندا تۇرمىز. ول مۇحيت سىرتتاي سۇلۋ كورىنگەنىمەن, ەل بولىپ ەسكەگىمىزدى تەڭ ەسپەسەك, قاۋىپتى اۋىر تولقىندارى ءتۇپسىز تۇڭعيىعىنا تارتىپ اكەتۋى مۇمكىن. سوندىقتان, ەڭ ءبىرىنشى بىرلىك, سودان كەيىن تىرلىك كەرەك», دەگەنى جادىمدا جاتتالىپ قالىپتى.
نۇرسۇلتان نازارباەۆ ءسوزىن اياقتاپ بولعان سوڭ, زالدان كوپتەگەن سۇراقتار ءتۇستى. سونىڭ بارىنە تابان استىندا, قىسقا دا, نۇسقا كوڭىلگە قونىمدى جاۋاپ بەرىپ جاتتى. ول كەز جەلتوقسان وقيعاسىنان كەيىن ءبىزدىڭ باس كوتەرە الماي جۇرگەن كەزىمىز ەدى. سول جەردە وتىرعان ساعىندىق ورىنتاەۆ جولداسىم ەكەۋمىز وزگە ءتىلدى اۋديتوريانى ءاپ-ساتتە باۋراپ العان باۋىرىمىزعا كەرەمەت ريزا بولىپ, توبەمىز كوككە جەتكەندەي بولدى. وسىدان كەيىن-اق, ەل تىزگىنى ناعىز لايىقتى تۇلعانىڭ قولىندا ەكەنىنە كۇمانىم قالمادى. مەن ءوز باسىم سول الاساپىران زاماندا ساياسي ارەنادا نۇرسۇلتان سياقتى باتىل قيمىلدايتىن, جىگەرلى قازاقتىڭ بولعانىن تاعدىردىڭ بىزگە جاساعان ەڭ ۇلكەن سىيى دەپ بىلەمىن.
مۇنى ايتىپ وتىرعان سەبەبىم, ەلباسىنىڭ «تاۋەلسىزدىك تاعىلىمى» اتتى ماقالاسىندا ايشىق تاپقان كەسەك ويلار مەن بۇگىندە ەلىمىز باعىندىرعان بيىك بەلەستەردىڭ كوبى سول جيىندا الدا ورىندالاتىن ماقساتتار, جۇزەگە اسىرىلاتىن جوسپار-مىندەتتەر رەتىندە ايتىلدى. ماقالانى وقىپ وتىرىپ, نۇرسۇلتان نازارباەۆ ەلىمىزدىڭ كەلەشەك دامۋ باعىتىن وسىدان وتىز جىل بۇرىن ايقىنداپ قويعان ەكەن عوي دەگەن ويعا قالدىم. سول مىنبەردە ايتىلعان اۋىرتپالىقتاردى بۇگىندە بىرلىك پەن تاباندىلىقتىڭ ارقاسىندا تۇگەلدەي ەڭسەرىپ, كەمەل كەلەشەككە ۇمتىلعان تاۋەلسىزدىگى باياندى ەلگە اينالدىق. سوندىقتان تۇڭعىش پرەزيدەنتتىڭ تاۋەلسىزدىكتىڭ 30 جىلدىعىنا وراي ايتقان تاعىلىم-وسيەتىن قازاقستاننىڭ ءاربىر ازاماتى, اسىرەسە, وسكەلەڭ ۇرپاق – جاستار جادىنا توقىپ, ونەگە الۋى كەرەك دەپ بىلەمىن.
مىرزاعالي قۇرمانوۆ,
زەينەتكەر
قوستاناي وبلىسى,
توبىل قالاسى
