ءبىلىمنىڭ جۇگى سالماقتى

قول جەتكىزگەن ەگەمەندىكتى ساقتاپ قالۋ جولىنداعى جانكەشتى جۇ­مىس تاعى بار. تاۋەلسىزدىكتىڭ تۇعى­رىن بيىك­تەتۋدە ءبىلىمنىڭ جۇگى سالماقتى. ويت­كەنى ەلباسى تىلگە تيەك ەتكەندەي, جاھاندى جايلاعان ىندەت ەڭبەك نارى­عىنا ايتارلىقتاي جاڭا وزگەرىستەر اكەل­دى. روبوتتار ادامداردى الماستىرا باس­تادى. ەندىگى جەردە جاڭا ماماندار, مۇلدە جاڭا داعدىنى يگەرگەن ۇرپاق كەرەك. الداعى ۋاقىتتا ءبىلىم بەرۋ سالاسى دا جاڭا زاماننىڭ سۇرانىسىنا ساي باعىت الىپ, جاڭارتىلىپ, وزگەرىپ وتىرۋعا ءتيىس.

مۇنداي جاڭا باعىتقا بەتبۇرىس ءبىلىم سالاسىندا قازىردىڭ وزىندە باي­قالىپ كەلەدى. سونىڭ ءبىرى رەتىندە مەك­تەپ­تەردەگى وقۋ باعدارلاماسىنا بيىل­­دان باستاپ ەنگىزىلگەن «كومپيۋ­تەرلىك ساۋاتتىلىق» ءپانىن اتاۋعا بولادى. بارلىق ءبىلىم بەرۋ جۇيەسىنىڭ ىرگەتاسى بالاباقشادا قالانادى. بالا مەكتەپتەگى قازىرگى باعدارلاماعا ىلەسىپ, قينالماي الىپ كەتۋى ءۇشىن ونى بالاباقشادان باستاپ جاڭا جۇيەگە بەيىمدەۋ قاجەت. تۇپتەپ كەلگەندە مەكتەپكە دەيىنگى ءبىلىم بەرۋدىڭ نەگىزگى مىندەتتەرىنىڭ ءبىرى – بالالاردى مەكتەپكە دايىنداۋ.

ال وسى مىندەتتى تۇڭعىش پرەزي­دەنتىمىز ن.نازارباەۆ جوعارىداعى ماز­مۇندى ماقالاسىندا اتاپ وتكەن روبوت تەحنيكاسى ينجەنەرى, كيبەرقاۋىپ­سىزدىك مامانىن دايارلاۋ ارقىلى ورىن­داۋ ءۇشىن بۇگىنگى جاس ۇرپاققا جاڭا داع­دىنى سىڭىرە بەرگەن ابزال. بۇل جۇ­مىستى نەعۇرلىم ەرتەرەك قولعا الساق, سوعۇرلىم جەمىستى بولاتىنى انىق. قازىردىڭ وزىندە ەلىمىز­دىڭ بىر­قاتار بالاباقشالارىندا روبوت تەح­نيكا­سى­نىڭ قاراپايىم ەلەمەنت­تەرىن ۇيرەتەدى. ونى وقىتاتىن مامان دا دايار­لانعان بولۋى ءتيىس قوي. ءبىزدىڭ پەداگو­گيكالىق جوعارى كوللەدجىمىزدەگى «مەكتەپكە دەيىنگى تاربيە جانە وقىتۋ» مامان­دىعىنىڭ ستۋدەنتتەرى World Skills Kazakhstan چەمپيوناتىنا قاتىستى. سونىڭ ناتيجەسىندە ءبىز بولاشاق تار­بيەشىلەرگە «امينا» پەداگو­گي­كالىق شىعارماشىلىق ورتالىعى­مەن بىرلەسىپ, روبوت تەحنيكاسىن وقىتۋدى باستاعالى وتىرمىز. بولاشاقتا وسى جانە كومپيۋ­تەرلىك ساۋاتتىلىق باعىتىنداعى ساعاتتار سانىن ارتتىرعان ابزال. بۇل ماسەلەنى, اسىرەسە, پەداگوگيكالىق كوللەدجدەر مەن ۋنيۆەرسيتەتتەر نازارعا السا يگى.

عازيزا ءدىلمانوۆا,

م.مامەتوۆا اتىنداعى پەداگوگيكالىق جوعارى كوللەدجىنىڭ ارنايى ءپان وقىتۋشىسى