مىندەتتەر سارالانىپ, مەجە بەلگىلەندى

الماتىدا قالالىق دەنساۋلىق ساقتاۋ باسقارماسىنىڭ 2013 جىلعى قورىتىندىسى بويىنشا كەڭەيتىلگەن القا ءماجىلىسى ءوتتى. شاھار باسشىسى احمەتجان ەسىموۆ, قالالىق ءماسليحاتتىڭ حاتشىسى تولەۋبەك مۇقاشەۆ, دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ, سونداي-اق, اۋدان اكىمدەرى, رەسپۋبليكالىق عىلىمي ورتالىقتاردىڭ, جەكەمەنشىك ەمدەۋ مەكەمەلەرىنىڭ, ەمحانا مەن اۋرۋحانالار باسشىلارى مەن وتاندىق مەديتسينانىڭ مايتالمان ارداگەرلەرى قاتىستى. جيىندا وتكەن جىلى قالاداعى دەنساۋلىق ساقتاۋ سالاسىنداعى جۇمىستار, قول جەتكىزگەن جەتىستىكتەر مەن كەمشىلىكتەر تالقىلانىپ, الداعى 2014 جىلى اتقارىلار مەجەلى مىندەتتەر ايقىندالدى. ادەتتەگىدەي, القا ماجىلىسىندە قا­لالىق دەنساۋلىق ساقتاۋ باس­قارماسىنىڭ باسشىسى جانات قاسىمجانوۆا بايانداما جاسادى. – بىلتىر الماتىلىقتارعا 83 قالالىق, 15 رەسپۋبليكالىق عى­لىمي-زەرتتەۋ ينستيتۋت پەن ور­تالىق, 4 ۆەدومستۆولىق جانە 14 جەكەمەنشىك ەمدەۋ مەكەمەسى مە­ديتسينالىق قىزمەت كورسەتتى, – دەدى جانات كاكىمسەيىتقىزى. – كادرلىق الەۋەت تە جەتكىلىكتى دايىندالدى. وسى رەتتە ءاربىر ءۇشىنشى دارىگەر مەن ءاربىر ەكىنشى مەدبيكە ءبىلىمىن قايتا جەتىلدىردى. ءۇش جىلدا دەنساۋلىق ساقتاۋ مەكەمەلەرىنىڭ جۇيەسى جاڭاردى. ماسەلەن, سا­لىنعان 12 ەمدەۋ مەكەمەسىنىڭ 5-ءۋى ستاتسيونارلىق, 7-ءۋى العاشقى مەديكو-سانيتارلىق كومەك نىساندارى. سونىمەن قاتار, ءۇش جىلدا دەنساۋلىق ساقتاۋ بيۋد­جەتى 33 پايىزعا, ال 2013 جىلى 14 پايىزعا ارتتى. بايانداماشىنىڭ ايتۋىنشا, قان تامىرلارى جۇيەسى 32 پا­يىزعا, ياعني 100 مىڭ ادامعا شاققاندا 231,3-كە, ال ينفاركتتان ءولىم كورسەتكىشى 12,7-دەن 10,4-كە تومەندەگەن. تۋبەركۋلەزبەن اۋىراتىندار سانى 12-گە, ال ءولىم-ءجىتىمى 38 پايىزعا ازايعان. ءسويتىپ, رەسپۋب­ليكادا جوعارى كورسەتكىشكە قول جەتكىزگەن. ترانسپلانتاتسيا سالاسىندا №7 قالالىق كلينيكالىق اۋرۋحانا ەلىمىز بويىنشا ال­دىڭعى قاتاردا. 16 جەلتوقساندا قالامىزدا تۇڭعىش رەت باۋىر الماستىرۋ وتاسى, سونداي-اق, №4, №5, جشمك, ورتالىق كلينيكالىق اۋرۋحانالاردا دا بىرەگەي وتالاردىڭ جاسالۋى – وتاندىق مەديتسينانىڭ ىلگەرىلەۋىنە قوسىلعان ۇلەس دەۋگە بولادى. مىنە, وسىنداي جۇيەلى اتقارىلعان جۇمىس ناتيجەسىندە شاھار ۇرپاقتىڭ ومىرگە كەلۋ بويىنشا 2011 جىلمەن سالىستىرعاندا – 4, تۇرعىنداردىڭ تابيعي ءوسىمى 11 پايىزعا وسسە, جالپى ءولىم-ءجىتىم 11 پايىزعا, ءسابي ءولىمى 9,6-عا ءتو­مەندەگەن. الماتىلىقتاردىڭ ءومىر ءسۇرۋ جاسى 77,66-عا جەتىپ, ءۇش جىلدا ەكى جاس قوسىلعان. القالى جيىندا دەنساۋلىق ساقتاۋ ۆيتسە-ءمينيسترى ەرىك باي­­جۇنىسوۆ الدىمەن ەلباسى جول­دا­ۋ­ىندا الەۋمەتتىك سالاعا, ونىڭ ىشىندە مەديتسيناعا ەرەكشە كو­ڭىل ءبولىپ, الدىمىزعا ۇلكەن ءمىن­دەتتەر قويىپ وتىرعانىن, وسى جونىندە مينيسترلىك قانداي جوس­پارلار مەجەلەپ, شارالار اتقا­رىپ جاتقاندىعى جايلى كە­ڭىنەن بايانداپ ءوتتى. الماتىنىڭ دەنساۋلىق ساق­تاۋ سالاسى وزگە وڭىرلەرمەن سالىس­تىرعاندا, الدا ەكەندىگىنە ەكپىن تۇسىرگەن ۆيتسە-مينيستر, اسىرەسە, ترانسپلانتولوگيادا بۇگىنگە دەيىن ەلىمىزدە 177 اعزا الماستىرىلسا, وسىدان بەس جىل بۇرىن ءبىردى-ەكىلى وقيعا عانا بولعانىن, بۇل رەتتە ۇلتتىق حيرۋرگيا ورتالىعى كوش باستاسا, الماتىداعى پروفەسسور بولات بايماحانوۆ باسقارعان №7 قالالىق كلينيكالىق اۋرۋحانانىڭ بەلسەندىلىگى قۋانتىپ وتىرعانىن العا تارتتى. – مەگاپوليستە جەتەكشى بەيىندى  ينستيتۋتتار شوعىرلانعان, مۇندا ەڭ وزىق عىلىمي-زەرت­حانالىق ادىستەر قولدانىلۋدا. بىلتىر سالا 528 مامانمەن تو­لىقتى. دەسە دە, الىپ شاھاردا ءالى دە مەديتسينا قىزمەتكەرلەرى جەتىسپەيدى. الماتى قالاسىندا ەكى جوعارى وقۋ ورنى بولا تۇرا مامان تاپشىلىعىن قالاي تۇسىنۋگە بولادى؟ بىلۋىمشە, جۇمىس ءجار­مەڭكەسى كەزىندە ءبىر دە ءبىر رەت وسى سالانىڭ ماماندارىنىڭ وتىر­عانىن كورمەدىم. سوندىقتان ال­داعى ۋاقىتتا قانشا ستۋدەنت بار, ونىڭ قانشاسى الماتى قالاسىندا جۇمىس ىستەگىسى كەلەدى, بارلىعىن ەسەپتەپ مامان ماسەلەسىن شەشۋ كەرەك, – دەدى ە.ءبايجۇنىسوۆ. جيىندى قورىتقان قالا اكىمى ا.ەسىموۆ 2013 جىلى كوپتەگەن پارامەترلەر بويىنشا مەگاپوليستىڭ دەنساۋلىق ساقتاۋ سالاسى ورتا رەس­پۋبليكالىق كورسەتكىشتەن اسىپ تۇسكەنىن العا تارتتى. اكىم سون­داي-اق, «بىرىڭعاي ۇلتتىق جۇيە نە­گىزىندە الماتىلىقتار كەپىلدى مە­ديتسينالىق كومەكتى تولىق اۋقىم­دا الۋى ءتيىس», دەپ قاداپ ايتىپ, دەنساۋلىق ساقتاۋ مينيسترلىگى وزگە وڭىرلەردەن كەلۋشىلەر سانىنىڭ ارتۋىنا بايلانىستى الماتىلىق ەمحانالاردى ماتەريالدىق جا­عىنان جاراقتاندىرۋدى ۇلعايتۋ قاجەت­تىگىن اتادى. «مەملەكەت باسشىسىنىڭ تاپسىرماسى بويىنشا ۇستىمىزدەگى جىلدىڭ 1 ساۋىرىنەن باستاپ دەن­ساۋلىق ساقتاۋ سالاسى قىزمەت­كەرلەرىنىڭ جالاقىسىنا 10 پايىز قوسىمشا تولەنەدى. كەلەر جى­لى سالا قىزمەتكەرلەرىنىڭ الەۋ­مەتتىك پاكەتى قايتا قارالىپ, 2015 جىلدىڭ 1 شىلدەسىنەن جالاقى 28 پايىزعا دەيىن وسەدى», دەدى احمەتجان ەسىموۆ. گۇلزەينەپ سادىرقىزى, «ەگەمەن قازاقستان». الماتى.