بۇگىندە باتىس قازاقستان وبلىسىندا 656,3 مىڭ ادام تۇرادى. جايىق بويىندا جاراسىم تاپقان جۇرتتىڭ ىشىندە 82 ەتنوس وكىلى بار ەكەن. مۇنداعى بارلىق حالىقتىڭ 76,3%-ىن قازاقتار قۇرايدى. ودان كەيىنگى ەڭ ءىرى ەتنوستىق توپ ورىس – 125 مىڭ (19,3%), ۋكراين – 9210 (1,4%), تاتار – 8400(1,3%), بەلارۋس – 1806, ازەربايجان – 1668, نەمىس – 1257. وسى حالىقتىڭ جارتىسىنا جۋىعى, ياعني 47,4 پايىزى وبلىس ورتالىعى ورال قالاسىندا تۇرادى.
بۇگىنگى تاڭدا باتىس قازاقستان وبلىسىندا 54 ەتنومادەني بىرلەستىك بار. ولاردىڭ 31-ءى مەملەكەتتىك ورگاندا تىركەۋدەن وتكەن. ال قالعان 23 ۇيىم تىركەۋسىز جۇمىس اتقارۋدا. وبلىس ورتالىعىنداعى دوستىق ۇيىندە جابدىقتالعان ارنايى بولمەلەردە 17 ەتنومادەني بىرلەستىك ورنالاسىپ, جۇيەلى جۇمىس ىستەيدى.
باتىس قازاقستان وبلىسى قازاقستان حالقى اسسامبلەياسى كەڭەسى 196 مۇشەدەن قۇرالعان. ال رەسپۋبليكالىق اسسامبلەيا كەڭەسىنىڭ قۇرامىنا اقجايىق وڭىرىندەگى ەتنومادەني بىرلەستىكتەردىڭ, قۇرىلىمدىق بولىمشەلەردىڭ, قوعامدىق ۇيىمداردىڭ جەتەكشىلەرى, بارلىعى 29 مۇشە كىرەدى.
ەتنومادەني بىرلەستىكتەردىڭ باستاماسىمەن وبلىس ورتالىعىندا ءار ەتنوستىڭ «دوستىق الاڭقايلارىن» جابدىقتاپ, اشۋ بويىنشا جۇمىس جۇرگىزىلۋدە. سونىمەن قاتار باتىس قازاقستان وبلىستىق قازاقستان حالقى اسسامبلەياسى ەتنومادەني بىرلەستىك توراعالارى مەن وكىلدەرى حالىققا الەۋمەتتىك كومەك كورسەتۋ ماقساتىندا ءتۇرلى قايىرىمدىلىق جۇمىستارىمەن دە بەلسەندى اينالىسىپ كەلەدى.
باتىس قازاقستان وبلىستىق قازاقستان حالقى اسسامبلەياسى رەسپۋبليكا بويىنشا 2014 جىلى العاشقىلاردىڭ ءبىرى بولىپ وبلىستا, اۋدان ورتالىقتارى مەن اۋىلدىق وكرۋگتەردە جانە كاسىپورىنداردا قوعامدىق كەلىسىم كەڭەستەرىن قۇرۋ جۇمىسىن قولعا الدى. بۇگىندە قوعامدىق كەلىسىم كەڭەستەرى كەز كەلگەن سالادا قوردالانعان ماسەلەنى شەشۋگە بەلسەنە ارالاسىپ, تاتۋلىق پەن تۇراقتىلىقتىڭ ساقتالۋىنا جەرگىلىكتى بيلىك وكىلدەرىمەن بەلسەنە قىزمەت اتقارسا, عىلىمي-ساراپتامالىق كەڭەسى ەتنوساياسات سالاسىنداعى ماسەلەلەردىڭ شەشىلۋىنە عانا ەمەس, ەتنوسارالىق قارىم-قاتىناستى زەرتتەۋگە ۇلەس قوسۋدا. ال اقساقالدار كەڭەسى قازاقستاندىق ءپاتريوتيزمدى نىعايتۋ, ازاماتتىق, رۋحاني جانە مادەني قوعامدى قالىپتاستىرۋدا ءوز ۇلەستەرىن قوستى. انالار كەڭەسى وتباسى ينستيتۋتىن قالىپتاستىرۋعا ۇيىتقى بولىپ, وتباسى قۇندىلىقتارىن دارىپتەۋدە. كاسىپكەرلەر قاۋىمداستىعى شەتەلدەرمەن ارىپتەستىك قارىم-قاتىناس ورناتۋ, وڭىرىمىزگە ينۆەستيتسيا تارتۋ ماقساتىندا قىزمەت اتقارسا, «تاتۋلاسۋ» ورتالىعى بىتىمگەرشىلىك جۇيەسىن ناسيحاتتاپ, كوپتەگەن داۋدىڭ ءتيىمدى شەشىلۋىنە مۇرىندىق بولىپ وتىر. ال ء«تىل مۇرا» قوعامدىق قوزعالىسى وڭىردەگى بارلىق ۇلتقا مەملەكەتتىك ءتىلدى تەگىن وقىتىپ, ءتىل ۇيرەنگىسى كەلگەن ازاماتتارعا جاعداي جاساپ وتىر.
پاندەميا جاريالانعالى بەرى باتىس قازاقستان وبلىستىق قازاقستان حالقى اسسامبلەياسى كوپتەگەن قايىرىمدىلىق شارا ۇيىمداستىردى. وسى كەزگە دەيىن مۇقتاج جاندارعا 190 ملن تەڭگەنىڭ كومەگى كورسەتىلگەن. سونىڭ ىشىندە «30 قايىرىمدى ءىس» رەسپۋبليكالىق مارافونى اياسىندا وبلىستىق اسسامبلەيانىڭ ەتنومادەني بىرلەستىكتەرى مەن قۇرىلىمدىق بولىمشەلەرى, «جاڭعىرۋ جولى» جاستار قوزعالىسى, ەرىكتىلەر «قايىرىمدىلىق كەرۋەنى» اكتسيالارىن وتكىزىپ, 13 مىڭعا جۋىق از قامتىلعان جانە كوپبالالى وتباسىلارعا, ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە كومەك كورسەتتى.
وڭىردەگى ۇلتارالىق احۋال قالىپتى جاعدايدا. الەۋمەتتىك زەرتتەۋلەر ناتيجەسى كورسەتكەندەي, ساۋالناماعا قاتىسۋشىلاردىڭ باسىم كوپشىلىگى, ياعني 96,4%-ى وبلىستا قالىپتاسقان ەتنوسارالىق قارىم-قاتىناستى تۇراقتى ءارى جاقسى دەپ سانايتىنىن ايتقان. سۇراۋ سالۋشىلاردىڭ 96,2%-ى ۇلتىنا بايلانىستى كەمسىتۋ, قۇقىعى بۇزىلۋ وقيعاسىنا تاپ بولماعان ەكەن.
تاۋەلسىزدىگىمىزدىڭ 30 جىلدىعى تۇسىندا حالقىمىزدىڭ ء«بىر كۇنگى ۇرىس ءجۇز كۇنگى ىرىستى قاشىرادى» دەگەن قاناتتى ءسوزىنىڭ ءمانى مەن ماعىناسىن تەرەڭ سەزىنىپ, تاتۋلىقتى تۋ ەتىپ كوتەرىپ كەلەمىز. قازىر قازاقستاندى مامىراجاي مەرەكەگە بولەپ وتىرعان دا ءدال وسى ىنتىماققا قونعان ىرىس دەپ بىلەمىز.
عالي ەسقاليەۆ,
باتىس قازاقستان وبلىسىنىڭ اكىمى, بقو قازاقستان حالقى اسسامبلەياسىنىڭ توراعاسى
