ەلباسى وتانىمىزدىڭ زاماندىق دامۋى مەن قازىرگى الەمدىك ساياسي احۋالدى بىرىكتىرە ساراپتايدى. وسى كەزەڭدە جانە بولاشاقتا ۇلت ىنتىماعىنىڭ مەيلىنشە مىقتى بولۋىن ايتا كەلە تاۋەلسىزدىكتىڭ باسقا قونعان باقىت ەكەندىگى, ونى باعالاۋ, قاستەر تۇتۋ – بارشامىزدىڭ قاسيەتتى پارىزىمىز بولاتىنىن جازادى.
اتالمىش ماقالادا وسكەلەڭ ۇرپاقتىڭ عىلىمي تالپىنىسىن ۇنەمى دەمەپ وتىرۋ, الەمدىك تەحنولوگيالىق ۇدەرىستەن قالماۋ تۋرالى دا جازىلعان. پاندەميا جاعدايىنداعى قاتەردى ازايتۋ ءۇشىن ۇلت مەديتسيناسىن دامىتۋ دا ەسكەرىلگەن.
وسى رەتتە ونەر-اعارتۋشىلىق سالاسىندا جۇرگەن سوڭ رۋحانيات سالاسىنا توقتالعىم كەلەدى. تاۋەلسىزدىك العان داۋىرىمىزدە ۇلتتىق ونەردى دامىتۋ سالاسىندا ەلباسىنىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» اتتى ۇلتتىق-مادەني باعدارلامالارى جاريالاندى. وسى باعدارلامالار اياسىندا ءان, كۇي, جىر, داستان انتولوگيالارى, عىلىمي زەرتتەۋلەر, مونوگرافيالار مەن ەنتسيكلوپەديالار جارىق كوردى. تاريحي تۇلعالار جونىندە مەملەكەتتىك تاپسىرىسپەن قىرۋار كىتاپ شىقتى. قازاقتىڭ ءداستۇرلى ونەرىن ناسيحاتتايتىن حالىقارالىق فەستيۆالدەر ۇيىمداستىرىلدى. وسىنىڭ ءبارى ەلباسىنىڭ رۋحانياتىمىزداعى ءجىتىن ماسەلەلەردى ءدوپ باسا الاتىن كورەگەندىگى دەپ باعالايمىز.
تاۋەلسىزدىگىمىزدىڭ العاشقى جىلدارى ەكونوميكالىق قيىندىقتارعا قاراماستان مادەنيەت ۇيلەرى, كونتسەرت زالدارى, وپەرا جانە بالەت تەاترلارى, ونەر ۋنيۆەرسيتەتتەرى مەن اكادەميالارى قۇرىلدى. قازاق ۇلىسىنىڭ تاريحى تۋرالى كينوەپوپەيالار ءتۇسىرىلدى. قازىرگى ەگەمەن ەلىمىزدىڭ داڭقىن الەمگە شىعارىپ جۇرگەن جاس دارىندارىمىز وسىناۋ وقۋ ورىندارىنىڭ تۇلەكتەرى. ايتا بەرسەك, تاڭعا سوزۋعا بولادى. تاۋەلسىزدىك پەن ەلباسى ەگىز ۇعىم ەكەنى انىق.
جانعالي ءجۇزباي,
كۇيشى, قازاقستاننىڭ ەڭبەك
سىڭىرگەن قايراتكەرى
