ەلباسى داۋىلدار مەن دابىلدار, «جان الىسىپ, جان بەرىسكەن», «ەگەۋلى نايزا» ۇستاعان ىقىلىم زامانداردان بەرى ۇلتىمىزدىڭ باعا جەتپەس وزىندىك داستۇرلەرى مەن عۇرپىن, ەركىندىكتىڭ رۋحى مەن رۋحاني كەڭىستىگىن, عاجايىپ ءتىلى مەن سۇلۋ سازىن ساقتاپ قالعان قاسيەتتەرىن تەبىرەنە جازادى.
عاسىرلار توعىسىندا ادامزات تاريحىندا, ونىڭ ىشىندە قازاقستان تاريحىندا ەرەكشە ورنى بار تاۋەلسىزدىك سالماعىن كوتەرۋ ءوز تاعدىرىنا تيەسىلى ەكەنىن جوعارى جاۋاپكەرشىلىكپەن جەتكىزەدى. ارينە ەلباسى جۇرەگىندەگى ءسوز – تاريح ءسوزى, زامان ءسوزى, ۇرپاق ءسوزى.
راسىندا, ەلباسى جازعانداي قازاقستان حالقى ء«بىر جاعادان باس شىعاردى». ورتاق ماقسات ءۇشىن نەبىر قيىندىقتاردى جۇمىلا جەڭدى, ۇلتتىق بىرلىك پەن تاتۋلىققا قول جەتكىزدى. وتكەن تاريح – كەتكەن تاريح ەمەس. ول – ۇلت جادىندا, ۇرپاق ساناسىندا قالاتىن قيىن, زوبالاڭ جىلدارعا ۇلاسقان تاريح بولسا دا, بابالار ارمانىن جۇزەگە اسىرعان تاريح.
ماقالادا ەلباسى حالىق رۋحىنا باس يەدى. قيىنشىلىققا كوندى, بىراق مويىعان جوق, ءۇمىتى ۇزىلەر جەردە – بولاشاققا سەندى, كەرى ەمەس – العا ءجۇردى. ۇلى وتان سوعىسى جىلدارىندا وتان ءۇشىن وت كەشتى. كەڭەس وداعىنىڭ تاريحي جولدارىنا شولۋدى دا وسى ماقالادان تابا الاسىڭ. وتكەن عاسىردىڭ 70-جىلدارىنداعى جاعداي, ودان كەيىن گورباچەۆتىك «قايتا قۇرۋ» ساياساتى دا قالاي كۇيرەگەنىن ەلباسى اشىق جازادى.
بۇل – تاعىلىمدىق ماقالا. بۇل – تاۋەلسىزدىك جولىنىڭ جىلناماسى. وتىز جىل بويى ەلباسى ءوزىنىڭ بۇكىل عۇمىرى مەن ساياساتى حالىق تاعدىرىن, ۇلت تاعدىرىن, تاۋەلسىزدىكتى ساقتاۋعا ارنالعانىن ەلىنە, جاس ۇرپاققا سىر ەتىپ ايتادى. سونىڭ ناتيجەسىندە, قازاقستان وركەنيەتتى ەلدەردىڭ قاتارىنا قوسىلىپ وتىر.
ماقالا ۇلتتىق مۇراتتارىمىزدى سارالايدى. بولاشاق جولىمىزدى ايعاقتايدى. ەلباسى جۇرەگىنەن شىققان ءسوز تاريحيلىعىمەن, شىنايىلىعىمەن ەرەكشەلەنەدى. ءوزى قۇرعان جانە قالىپتاستىرعان تاۋەلسىزدىك قۇندىلىقتارىنىڭ ۇلتتىق بىرەگەيلىك پەن ۇلتتىق تاتۋلىق سيمۆولى رەتىندە, تاريحي جادىگەر رەتىندە قالا بەرەدى. ەلباسى جولى – قازاقستان جولى ەكەنىنە كوز جەتكىزەسىڭ.
باقىتجان جۇماعۇلوۆ,
پارلامەنت سەناتىنىڭ دەپۋتاتى
