ىنتىماقتاستىقتىڭ ىستىق ىقىلاسى

ۇلتىمىزدى ۇلى مۇراتتارعا باستايتىن «ماڭگىلىك ەل» ۇلتتىق يدەياسىن قولداۋعا ارنالعان پاتريوتتىق اكتسيا ارايلى اقتوبە وڭىرىنە دە كەلىپ جەتتى. اسقار التايدان باستالعان اكتسيانى اقتوبەلىكتەردىڭ دە اسىعا كۇتكەنى اڭعارىلدى. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتتەر سارايىنا جينالعان ارداگەرلەردىڭ دە, ۇكىمەتتىك ەمەس ۇيىمدار, كاسىپوداق, زيالى قاۋىم وكىلدەرىنىڭ دە, ەتنومادەني بىرلەستىكتەر جەتەكشىلىرىنىڭ دە, جوعارى جانە ارناۋلى وقۋ ورىندارى ستۋدەنتتەرىنىڭ دە ءجۇزى جارقىن, كوڭىلدەرى كوتەرىڭكى. بۇل دا تۇسىنىكتى, بۇل شارا قازاقستان پرەزيدەنتى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا باياندالعان «ماڭگىلىك ەل» يدەياسىن جۇزەگە اسىرۋدىڭ باستاۋى دەسە دە بولعانداي. ماڭگىلىك ەل بولۋعا ۇمتىلعان قازاقستاننىڭ جاسامپازدىق ىستەرىنىڭ زاڭدى جالعاسى دا. ستۋدەنتتەر سارايىن كەرنەگەن جاستاردىڭ ۇرانداتقان داۋىسىنان پاتريوتتىق سەزىمنىڭ, وتانشىلدىقتىڭ اسقاق رۋحى اڭعارىلادى. بويىڭدى ەلىڭە دەگەن شەكسىز سۇيىسپەنشىلىكتىڭ كۇشى كوتەرمەلەپ كەتكەندەي سەزىلەدى. اكتسيا بارىسىندا پاتريوتتىق تاقىرىپتا بەينەتاسپا كورسەتىلىپ, ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىس كۇشتەرى اسكەري ينستيتۋتىنىڭ كۋرسانتتارى «ماڭگىلىك ەل» ەمبلەماسى بەينەلەنگەن تۋ ۇستاپ, ارنايى مۋزىكالىق كومپوزيتسيا قويدى. سالتاناتتى جيىندى وبلىس اكىمىنىڭ ورىنباسارى سارا نۇرقاتوۆا اشىپ, اكتسياعا قاتىسۋشىلارعا ءسوز ارنادى. ول اقتوبەلىكتەردىڭ ەلباسىنىڭ, قازاقستاننىڭ باستامالارىنىڭ قاندايىن دا قىزۋ قولدايتىنىن جەتكىزە كەلىپ, ەلىمىزدىڭ ايقىن مۇراتتارى بەلگىلەنگەن «ماڭگىلىك ەل» ۇلتتىق يدەياسى بيىلعى جولداۋدىڭ باستى تۇعىرناماسى, تەمىرقازىعى ەكەنىنە توقتالدى. باسقا قاتىسۋشىلار دا وسىعان ورايلاس وي تولعادى. «ماڭگىلىك ەل» ۇلتتىق يدەياسىن قولداۋشى­لار اكتسياسىنا قاتىسۋشىلاردىڭ قولدارى قويىلعان «حالىق تىلەگى» كىتابى س.نۇرقاتوۆاعا تاپسىرىلدى. بۇل پاتريوتتىق فورۋم بىرلىككە, ىنتىماققا ۇندەگەن شارا رەتىندە اقتوبەلىكتەردىڭ ەسىندە قالدى. اكتسيا بارىسىندا «ماڭگىلىك ەل» ۇلتتىق يدەياسىن قولداۋعا ارنالعان وبلىس تۇرعىندارىنىڭ ۇندەۋى جولداندى. القالى جيىندا ق.جۇبانوۆ اتىنداعى وبلىستىق فيلارمونيانىڭ انشىلەرى ورىنداعان «قازاقتاي ەل قايدا», «اتامەكەن» اندەرى اكتسياعا قاتىسۋشى جاس پەن كارىنىڭ بويىندا ەلگە دەگەن سۇيىسپەنشىلىك سەزىمىن وياتىپ, جىگەرلەندىردى. ال «العا, قازاقستان» انىنە قويىلعان حورەوگرافيكالىق قويىلىمى دا وزگەشە پاتريوتتىق اسەرگە بولەدى. اكتسياعا قاتىسۋشى جالىندى جاستار «ماڭگىلىك ەل, ماڭگىلىك ءتىل, ماڭگىلىك رۋح» دەپ ۇرانداتىپ, شارانى قازاقستان رەسپۋبليكاسىنىڭ ءانۇرانىن اسقاق رۋحتا شىرقاپ اياقتادى. اكتسياعا 500-دەن استام ادام قاتىستى. مۇنداي شارالار وسىمەن ءبىر مەزگىلدە وبلىستىڭ ون ەكى اۋدانىندا وتكىزىلدى. ساتىبالدى ءساۋىرباي, «ەگەمەن قازاقستان».   اقتوبە وبلىسى.