ەڭ ۇلى جولدىڭ ءوزى شاعىن عانا قادامنان باستالادى. وسىدان 15 جىل بۇرىن «وتان» پارتياسى قۇرىلعان كەزدە ەلىمىزدىڭ سىندارلى كۇشتەرى, ناعىز پاتريوتتار ساياسي ۇيىمعا بىرىگىپ, ەلدى جاڭعىرتۋدى, ەكونوميكانى دامىتۋدى, الەۋمەتتىك ادىلدىكتىڭ ساقتالۋىن ءوز جاۋاپكەرشىلىگىنە الدى. «وتان» رسپ وڭتۇستىك قازاقستان وبلىستىق فيليالى 1999 جىلى 23 ناۋرىزدان باستاپ جۇمىس ىستەي باستادى. پارتيانىڭ ۇيىمداستىرۋ جۇمىسىنا ن. كابيروۆ, ر.احمەتوۆ, س.سەيتجانوۆ, د.شەرىمقۇلوۆ, ج.ماۋلەنقۇلوۆ, ت.ماقاشوۆا, ك.الەكەشوۆ, ل.رامانوۆا جانە ت.ب. بەلسەندى قاتىستى.
وسى جىلدارى پارتيا ءوزىنىڭ قالىپتاسۋ جانە دامۋ بارىسىندا كۇردەلى جولمەن نەبىر اسۋلاردان ءوتتى. پارتيا قوعام مەن مەملەكەت ءومىرىنىڭ بارلىق سالاسىندا قارقىندى جانە ءتيىمدى دامۋدى قامتاماسىز ەتۋگە ۇنەمى اتسالىسىپ كەلدى. وتكەن جىلدارى ءبىزدىڭ پارتيا پارلامەنتتىك كوپشىلىك بولىپ قالىپتاستى جانە جالپى حالىقتىڭ سەنىمىن يەلەندى, ەل بىرلىگىن بارىنەن جوعارى قويۋدىڭ ناعىز ۇلگىسىن كورسەتتى.
قازىرگى تاڭدا «نۇر وتان» ساياسي ينستيتۋتتاردىڭ ىشىندە كوشباسشى ەكەنى داۋسىز. حالىقتىڭ ۇلكەن سەنىمىنە يە پارتيا بۇگىندە ءبىر رەتتىك ءىس-شارالار ۇيىمداستىرۋدى ەمەس, ەلىمىزدەگى ساياسي, الەۋمەتتىك-ەكونوميكالىق, وزگە دە جاڭعىرتۋلاردىڭ باسى-قاسىندا ءجۇرۋدى ماقسات ەتەدى. ناعىز اتىنا زاتى ساي ەكەنىن سوزبەن ەمەس, ىسپەن دالەلدەۋدە.
بۇگىندە قازاق ەلىن سەرپىندى دامۋ جولىنا باستاۋ ەلىمىزدەگى ەڭ قۋاتتى ساياسي كۇش – «نۇر وتانعا» جۇكتەلىپ وتىر. وعان پارتيانىڭ بارلىق رەسۋرستارى بار, ەڭ الدىمەن, ارينە, ادامي رەسۋرستارى. ءبىزدىڭ وبلىستا 85796 ادام «نۇر وتان» پارتياسىنىڭ مۇشەسى بولىپ تابىلادى. ولار 310 باستاۋىش پارتيا ۇيىمدارىنا توپتاستىرىلعان. پارتيانىڭ مۇشەلەرى ەكونوميكالىق جانە حالىققا قىزمەت كورسەتۋ سالالارىندا – 9,8, دەنساۋلىق ساقتاۋ سالاسىندا 10,3, ءبىلىم بەرۋ مەكەمەلەرىندە 49,8 پايىزدى قۇرايدى. وبلىس تۇرعىندارىنىڭ 3,2 پايىزى «نۇر وتاننىڭ» مۇشەلەرى.
پارتيا قاتارىنا وتكىسى كەلەتىندەر ءبىلىم-بىلىگىنە, قوزقاراسى مەن ۇستانىمىنا قاراي ىرىكتەلەدى. ويتكەنى, قازىرگى كەزدە ساننان ساپا ماڭىزدى. وبلىستاعى دەپۋتاتتىق كورپۋستىڭ 92 پايىزى «نۇر وتان» مۇشەلەرى. قوعامدىق قابىلداۋ بولمەلەرى مەن جەمقورلىقپەن كۇرەس بويىنشا قوعامدىق كەڭەستەرى بار 19 ايماقتىق پارتيا فيليالدارى جۇمىس اتقارۋدا.
قوعامدىق قابىلداۋ – پارتيانىڭ باستى باعىتتارىنىڭ بiرi. وسى ارقىلى تiكەلەي حالىقپەن جۇزدەسiپ, وتىنىشتەرىن تىڭدايمىز, ولاردىڭ وڭ شەشiلۋىنە كومەكتەسەمىز. جىل باسىنان بەرى وبلىستىق پارتيا فيليالىنىڭ قوعامدىق قابىلداۋ بولمەلەرىنە 920 ازامات وتىنىشپەن كەلدى. ازاماتتاردى تولعاندىراتىن ماسەلەلەر نەگىزىنەن تۇرعىن ۇيمەن, جۇمىسپەن قامتاماسىز ەتۋ, ماتەريالدىق كومەك كورسەتۋ, تاعى باسقالار. كەلىپ تۇسكەن ارىز-شاعىمداردىڭ بارلىعى باقىلاۋعا الىنىپ, بىرقاتارى وڭ شەشىمىن تاپتى.
ەلباسى, پارتيا توراعاسى ن.ءا.نازارباەۆ «قازاقستان جولى-2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىندا ەلىمىزدىڭ الداعى دامۋ پەرسپەكتيۆالارىن كەزەڭ-كەزەڭىمەن بەلگىلەپ بەردى. پارتيامىز ەلىمىزدىڭ جەتەكشى ساياسي كۇشى رەتىندە ءوز جۇمىسىندا ءبىرىنشى كەزەكتە قازاقستاننىڭ ءاربىر ايماعىندا, ءاربىر قالاسى مەن اۋىلىندا ورنالاسقان جەرگىلىكتى باستاۋىش ۇيىمدارىنا ارقا سۇيەيدى. سوندىقتان پارتيا الدىندا بۇگىن جەرگىلىكتى ۇيىمداردىڭ قىزمەتىنىڭ ساپاسىن جاڭا دەڭگەيگە كوتەرۋ ماسەلەسى تۇر. باستى نازار وڭىرلىك فيليالدار مەن جەرگىلىكتى باستاۋىش ۇيىمدارىنىڭ جۇمىسىنا اۋدارىلادى.
بۇگىندەرى جەرگىلىكتى پارتيا ۇيىمدارىنىڭ الەۋەتىن نىعايتۋعا باعىتتالعان بىرقاتار جۇمىستار جۇزەگە اسىرىلدى. سونىڭ ناتيجەسىندە ءبىز پارتيا جۇمىسىنىڭ نەگىزگى باسىمدىلىعى وڭىرلەرگە اۋىسىپ جاتقانىن انىق كورەمىز. وڭىرلەردەگى فيليالداردىڭ ماتەريالدىق نەگىزى ايتارلىقتاي نىعايدى, ۇيىمداردىڭ كادرلىق قۇرامى جاڭاردى, قىزمەتكەرلەردىڭ جالاقىسى 15 پايىزعا ءوستى. قاراجاتتى ۇنەمدەۋ ناتيجەسىندە وڭىرلەردى قوسىمشا قارجىلاندىرۋ مۇمكىندىگى پايدا بولدى.
العاش رەت پارتيامىزدىڭ ورتالىق اپپاراتى قىزمەتكەرلەرىنىڭ اتتەستاتسياسى ءوتتى. ەندى اتتەستاتسيالاۋ ءوڭىرلەردە دە جۇرگىزىلەتىن بولدى. بارلىق ايماقتىق فيليالدار عيماراتتارمەن, اۆتوكولىكتەرمەن قامتاماسىز ەتىلدى. پارتيامىزدىڭ ينتەرنەت كەڭەستىگىندەگى دامۋ ستراتەگياسى دايىندالىپ, «ەلەكتروندىق پارتيا» جوباسى ىسكە قوسىلدى. الەۋمەتتىك جەلىلەردەگى پارتيانىڭ ىقپالى تۇراقتى وسۋدە, پارتيانىڭ جاڭا سيمۆوليكاسى جۇرت اراسىندا كەڭىنەن تانىستىرىلۋدا.
وتكەن كەزەڭدەردە كوپتەگەن ءىس-شارالار اتقارىلدى, ال الدىمىزدا ءالى كوپتەگەن مىندەتتەر تۇر. بىرىنشىدەن, پارتيامىزدىڭ جاڭارۋ ءۇردىسى ءارى قاراي جالعاستىرىلماق. ەندى پارتيانىڭ 2020 جىلعا دەيىنگى باعدارلاماسىن ەلباسىنىڭ حالىققا جولداۋىنداعى, سونداي-اق, ساياسي دوكترينادا بەلگىلەنگەن ماقساتتارعا ساي سايكەستەندىرۋ قاجەت.
پارتيا ەل پرەزيدەنتىنىڭ باسشىلىعىنا جانە جاڭا ساياسي دوكتريناعا سۇيەنە وتىرىپ, قازاقستاندىقتاردىڭ ساپالى ءومىر مەن ەلدىڭ دامۋىن قامتاماسىز ەتەدى. وسى تۇرعىدان العاندا, تاريحى تەرەڭ, ەڭبەگى ەرەن, قازاقي قايماعى بۇزىلماعان ءوڭىر – وڭتۇستىك قازاقستان وبلىسىنداعى ءاربىر پارتيا مۇشەسىنە, ازاماتىنا جۇكتەلگەن جاۋاپكەرشىلىك زور بولماق.
الماسبەك مامىتبەكوۆ,
«نۇر وتان» پارتياسى وڭتۇستىك قازاقستان وبلىستىق فيليالى توراعاسىنىڭ ءبىرىنشى ورىنباسارى.
وڭتۇستىك قازاقستان وبلىسى.
